Nos ta bay papia di… Energia, atrobe…?

Nos ta bay papia di energia, atrobe. Algo importante, haciendo nos parti pa deshaci di combustible fosil cu ta aporta tanto na e efecto invernador cu ta haci temperatura subi na henter mundo, ta pone e capanan di ijs di polo norte y sur dirti, y ta ocasiona aumento drastico di nivel di lama, entre otro. E pregunta no ta realmente si nos mester discuti riba posibilidad di energia renovable, naturalmente nos mester haci esey.

Ademas e ta un di e metanan importante di e 17 metanan di desaroyo sostenible pa aña 2030, cu Nacionnan Uni a adopta y cu Aruba tambe a scoge como meta. Esey no ta algo di ultimo tempo so, gobierno anterior tambe a brasa e metanan aki cu tanto fervor, cu practicamente no tabatin resultado. Esey ta loke nos mester evita: un repiticion di papia hopi y finalmente nada ta sucede. Nos no ta bisa esaki pa ta negativo, pero mas bien como advertencia pa nos no subi e caminda ey atrobe.

Esaki ta pone naturalmente bastante presion, riba nos mes tambe. Ban purba anto di ta practico y no perde nos mes den tur sorto di ilusion cu no ta realisable. Pa motibo practico anto, nos ta cuminsa unda nos a keda. Gobierno a caba di declara cu e deseo di gabinete anterior pa logra un Aruba liber di combustible fosil pa 2020, aunke solamente pa produccion di coriente, a resulta irealistico. Nos ta completamente di acuerdo cu e ponencia ey, pero kico sí por logra anto?

Realmente mester bisa cu ultimo añanan nos no a avansa tanto mas den substitui energia di combustible fosil pa energia renovable. Produccion di coriente ta bin parcialmente di energia di biento, aunke esaki a keda na e mesun nivel di mas di 10 aña pasa, tempo cu e parke di molina na Vader Piet a cuminsa opera. E segundo parke na Alto Vista no a bira realidad, loke a haci hopi hende contento, pero hecho ta cu no a bin nada acerca. Despues di e proyecto na aeropuerto di panel solar esaki a haya un follow up riba tereno di e refineria, loke ta un bon avance, pero…, te ey nos a yega. WEB ta produci keto bay mayoritariamente cu heavy fuel oil, di cual e contaminacion ta bon conoci pa e situacion na waf di Barcadera. E cambio pa gas natural nunca a cristalisa, loke ta relaciona tambe cu e fracaso cu yama refineria. Asina mes ta existi e posibilidad pa cambia pa gas, cu ta combustible fosil tambe, pero en todo caso menos contaminante.

Pero laga nos no enfoca solamente riba loke gobierno ta haci den proyecto mas grandi, pero en cambio purba visualisa loke e ciudadano mes por haci. Aki ta surgi algun pregunta: kico ta e motibo pa cual practicamente no ta mira avance den proyecto individual di panel solar na cas o empresa? Kico ta e obstaculonan cu ta existi? Prijs? Financiamento? Nos por imagina cu aki tin un problema cu no ta facil pa soluciona: na un prijs di alrededor di Afl. 0,35 pa KWh y un consumo promedio di 750 – 800 KWh pa luna, es decir un gasto di Afl. 250 ,- pa Afl. 300,- pa luna, no ta atractivo pa bay paga mas pa haya paga e inversion di e instalacion priva ey. Na e nivel aki ta bira dificil pa tuma e decision pa bay financia un proyecto personal di varios 10 mil florin pa varios aña, si e beneficio directo no ta grandi. Otro ta e situacion pa un empresa cu por tin e posibilidad di cuminsa un proyecto un poco mas grandi, cu un rendimento mayor tambe. O participa den un proyecto grandi como consumidor individual, sin e problema di financia tur cos personalmente. E tipo di proyecto comun aki no ta existi actualmente. Si nada no cambia, energia solar ta keda pega na e nivel unda e ta awor. Tin otro tipo di energia renovable cu no a haya entrada aki ainda; nos no ta bay trata nan aki.

Conclusion mester ta cu no ta mira tanto avance den proximo añanan? Si no tin proyecto den preparacion actualmente, esey lo mester ta e conclusion. Sin embargo, tin otro tereno cu nos no mester descarta, unda tambe ta haci uso di energia di origen fosil cu igualmente ta produci CO₂ y otro gas toxico: e cantidad enorme di vehiculo di motor pa un isla chikito asina. Esey tambe ta yuda aumenta nos ‘carbon footprint’. Tin alternativa? Sigur, por ehemplo: auto electrico. Aruba ta ideal pa e tipo di vehiculo aki, pasobra e distancianan cortico ta haci cu ta relativamente facil pa carga bateria na cas mes. Aunke ta bon pa por conta cu un red limita di punto di carga bateria, esaki no ta asina esencial manera den un pais grandi. Tambe por pensa riba prohibicion di ATV riba gasolin, loke lo yuda pa kita e boroto y gas cu esakinan ta produci. Bon pa nos medio ambiente, bon pa Parke Nacional, bon pa flora y fauna.

Un cos ta sigur: si no ta bin iniciativa di tanto gobierno como sector priva, nos no ta mira cambio pronto. Y no por keda unda nos ta, y no por warda te 2030 tampoco.