Nos ta atendiendo… Nos presupuesto…?

Despues di e payasada den parlamento di diaranzon pasa, ta reina paz atrobe. Esey talvez no ta e bon palabra, mas bien e ta cu tin silencio atrobe den e edificio unda e supuesto organo mas halto di nos pais ta biba. Ta parce cu pa e aña aki por lo pronto e show di e siman aki tabata e climax y cu no ta asina sigur cu lo tin espectaculo mas grandi e aña aki mas… Pero warda, tin hopi mas cos cu mester trata e aña aki ainda… Un di nan ta presupuesto 2021, pa cual e fecha di entrega a pasa sin cu un musca a bula.

Ningun comentario, como si fuera e asunto mas normal di mundo. Por ta cu hopi hende ta haya cu den e tempo di crisis aki mester duna gobierno un poco espacio, mientras cu nos ta kere cu sigur den un tempo di crisis bo mester tin mihor control ainda di bo entrada y gastonan. Pues toch e pregunta: pakico no tin un presupuesto entrega na parlamento? Sikiera por a señala cu e presupuesto ta laat e aña aki pasobra tin demasiado factor insigur aden, esey nos por comprende. Di otro banda, den un aña normal o abnormal, hopi di e gastonan coriente ta conoci caba pa fin di juni di cada aña, y banda di esey ta keda pa clarifica e asuntonan excepcional. Gran parti di e gastonan di gobierno ta concerni e famoso 8.000 plus salarionan cu mester paga tur luna, y pa esey lo mester tin tur cos calcula caba. Igualmente otro gastonan fiho den cual di aña pa aña no tin tanto cambio.

Sin embargo, por ta cu nos ta completamente ekiboca y gobierno ta wardando riba e decision tocante e acuerdo cu Hulanda pa dicidi cu kico nos por conta pa otro aña… Un señal cu finalmente ta bay firma toch? Esey ta di spera, pasobra ningun hende ta mira un alternativa. Manera nos a comenta anteriormente, tabatin algun rumor tocante un Sinterklaas cu lo a bin cu dragon envez di cabay, e biaha aki di China, pero despues riba e frente aki tambe a bira keto. Ta bon mes, pasobra no mester dedica tanto tempo na e opcion idiota ey. En todo caso, esey ta mustra nos mas fuerte ainda cu no tin otro alternativa cu bay di acuerdo cu e proposicion Hulandes? Nos tin e impresion cu nos Promer Ministro ta dispuesto pa haci lo corecto pa salvaguardia futuro di e pais aki, y esey ta significa firma e documento ey. No cu esey lo keda sin consecuencia. Den su partido mes tin varios di e generacion cu a lucha banda di Betico pa Aruba haya su gobernacion autonomo, cu tin hopi problema pa acepta e idea cu pa un tempo Aruba lo ta bao di un supervision estricto di Hulanda. Sin embargo, por ripara cu un gran parti di e poblacion no tin problema cu esey, mas ainda pasobra nan ta pertenece na e grupo cu no tin trabao, o cu por perde loke nan tin ainda si no firma cu Hulanda y nos economia sigui cay. Y e cifranan di promer mitar di aña no ta gaña. Gobierno a haya den e promer dos kwartaalnan di e aña aki como 200 miyon florin menos na entrada. Di otro banda, e gastonan di e mesun periodo tabata un poco mas halto cu e periodo comparable di e aña anterior. Y tin otro señal mas den ki direccion nos ta bayendo, si no bin un cambio. Por ehemplo, un bon indicador di nos actividad economico manera entrada di BBO, den e di dos kwartaal tabata na mas o menos mitar di loke e tabata aña pasa. Y loke tin e asunto wanta ainda ta parcialmente e efecto positivo di e subsidio di salario cu actualmente ta mantene e poder di compra na un nivel un poco mas halto… di unda esey tabata bin atrobe…?

Pero nos no mester contempla solamente e problema economico cu ta casi sin solucion na e momento aki. Ayera scolnan a habri, y nos ta spera cu esey ta bay bon. Banda di esey, no ta comenta ningun caminda cu basicamente nos no tin e recursonan pa realmente equipa e scolnan di tal manera cu nan tin sikiera un oportunidad pa duna nos hubentud e educacion cu nan mester. A perde hopi tempo caba e aña aki, y un aña mas di desastre ta pone futuro di hopi mucha na riesgo.

Y ta esaki ta e cosnan cu lo nos tin gana di mira trata den un presupuesto di 2021. Si no tin nada extra pa inverti den enseñanza, pa atende e situacion di crisis aki, nos mester saca e conclusion cu algun scol na Aruba, esunnan cu semper tabatin mas recurso y mas resultado tambe, lo por salba nan mes, pero e gran mayoria lo cay den un abismo grandi, sigur si presenta problema di salud cu ta para actividad escolar. Basicamente gobierno tin un manera so pa libra mas recurso, y esey ta corta mas ainda den e payroll cu ta costando mas di mitar di presupuesto. Por ta cu p’esey tin un silencio tambe, pasobra tampoco por tuma decision ainda den e asuntonan aki? Nos ta keda pendiente.