Carnaval ta un actividad practicamente di deporte di nivel halto. Den un solo fin di siman para y baila oranan largo den solo ta casi ekivalente na un etapa di e competencianan profesional manera Tour de France, Giro di Italia, o Vuelta a España. Pa loke ta esey, respet pa esnan cu ta participa, pero alavez miho nan percura tambe pa nan ta den bon condicion fisico.
Cu tur esey, a mira hopi aña pasa caba e necesidad di proclama e dialuna di carnaval un dia festivo, mas bien un dia di descanso, pa laga tur hende ‘bin bij.’ Pero en todo caso, semper tabata normal pa spera di tur hende cu nan ta presenta na trabao diamars mainta, cu un color un poco diferente a causa di tanto solo, y cu hopi cos pa conta nan coleganan, cu no a haya mucho menos solo tampoco, para banda di caminda pa tambe gosa na nan manera di e fiesta unico aki. Por ta hasta cu e curpa ta un tiki kibra ainda, pero usa esaki como pretexto pa no aparece na trabao diamars, esey nunca tabata e caso.
Grandi tabata nos sorpresa anto pa tende cu nos dirigentenan di enseñansa ta considera pa duna tur scol henter un siman liber despues di carnaval, pa nan por recupera ‘tankilamente’ di tur e esfuersonan fisico di e temporada di carnaval, y specialmente di e ultimo fin di siman cu ta un berdadero asalto riba condicion di esnan cu ta participa y esnan na banda. E sorpresa di nos ta asina grandi pasobra como medio di comunicacion, cu ta kere cu nos ta basta bon informa di loke ta pasa y biba den comunidad, nunca a haya e señal aki di cu hende ta lamenta cu nan yiunan no ta haya un siman pa descansa.
Al contrario, nos ta kere cu si e cos aki bira realidad, prome cos cu pareha cu yiu ta haci ta cuminsa sclama, ta unda nan mester bay laga na yiu(nan) atrobe, pasobra nan si mester traha. Por ta cu e empleado publico lo por haya cuatro dia di e famoso ‘ATV-dagen’ den e mesun siman, cu en todo caso nan no mester preocupa pa nan yiunan, pasobra nan tambe ta na cas. Di otro banda, e no ta parce nos un bon idea pa ‘shutdown’ gobernacion pa un gran parti. Di mes cu e ciudadano promedio no ta nada contento cu e servicio gubernamental, cu ta pensa un monton di cos cu cual nan mes no por cumpli, manera e re-introduccion di plachi di number pa cada aña, aparentemente cu e argumento, no expresa, cu un hende mester gana placa cu e ‘tradicion’ aki. En todo caso, pa e miles di mayornan cu ta traha den sector priva, esaki no ta parce solamente un mal idea, pero ta surgi, cerca nos tambe, e siguiente pregunta: na e ministerio y departamento concerni, nan no tin nada drechi di haci?
Di e centenares di problema cu eneseñansa conoce, di kleuter te universidad, ta net esaki mester bira un issue? Anto nos no a ni toca e problemanan cu esaki ta causa, sin cu ta conoci ta cual problema e ‘move’ aki ta bay resolve. Pa cuminsa, e ‘medida’ aki lo corta e tempo efectivo cu e studiantenan di examenklas lo ta na scol prome cu algun luna despues nan momento di examen yega. Esey riba su mes caba ta suficiente argumento pa benta e idea aki den bari di sushi. Ademas cu e medida tin como consecuencia pa e mesun examenklasnan aki, cu esnan cu ta prepara despues di gradua pa bay afo, cu nan tin menos tempo pa prepara, aunke esey no ta asina grave manera e argumento di e cercania di temporada di examen despues di carnaval.
Pero pa bolbe riba e punto cardinal di nos asombro, y iritacion aki: na e ministerio y e departamento nan no tin nada otro di haci? Ta un realidad grandi, y pa esey no ta culpa esnan cu ta traha den e sector aki, cu casi tur problema den comunidad ta haya nan refleho den sector di educuacion. For di abao bay ariba, tin un cantidad, nos por bisa ‘desperante’ di asunto pa atende. For di gobierno anterior nos ta bin ta critica e atencion unilateral cu tabatin pa e problema di prestacion na nivel di Havo/Vwo, mientras cu den e debate no tabata mustra riba e atraso cu nos muchanan tin caba ora nan pasa di scol basico pa enseñansa avansa. E discusion ey a ripiti recientemente, mientras atrobe no ta mustra riba e raiznan profundo pa e prestacionnan pober di nos enseñansa cu ta scondi den e prome añanan di nos sistema di enseñansa. Y den esaki nos ta keda leu tambe di e discusion di Papiamento, pasobra tin un monton di asunto cu ta influencia negativamente, cu no tin di haci cu e idioma.
Si esnan cu supuestamente ta dirigi nos enseñansa no tin nada miho pa haci cu wak con pa gana popularidad cerca hobennan cu no ta mira nan mes interes den caba nan scol lo miho posible, anto si nos ta leu for di cas. Miho busca caminda di scol atrobe pa siña e palabra ‘prioridad’.
