Depende con bo mir’e
Entrante 1 di januari 2018 a adapta e salario minimo na e hermana isla, den su diferente categorianan. Esey ta interesante, importante? Pa esun cu no gusta compara, e no ta un tema cu lo atrae su atencion. Pero nos en todo caso ta interesa pa compara continuamente loke ta sosodiendo den e mundo rond di nos, pa por tin un miho bista riba kico nos mes ta haci. Ban tira un bista.
E salario minimo na Curaçao conoce algun diferencia clave compara cu esun di nos, aunke nan a nace di e mesun cuna di Antias Hulandes. Pa cuminsa, e isla conoce un salario minimo pa ora. Esaki a aumenta e siman aki cu 17,5 cen pa bira NAf 9,175 pa ora, cu ta duna NAf 1589,11 bruto pa luna, pa esunnan cu ta traha un siman di 40 ora. Esaki pa persona di 21 aña pariba, pasobra Curaçao conoce tambe un salario minimo hubenil, di cual mas aki un rato. Pa e persona cu ta traha un siman di 45 ora, e salario ta bira NAf 1787,75. esunnan cu ta traha un siman di 48 ora ta haya como minimo NAf 1906,93.
Awor e comparacion cu Aruba. Desde aña pasa, den pleno campaña na augustus, e salario minimo a keda ahusta na Afl. 1711,15 pa luna, sea bo ta traha 40, 42 o 45 ora. Trabao di 48 ora nos no conoce mas, desde e cambionan den ley laboral di 2013. Pero, como cu nos no conoce un salario minimo legal pa ora, nos tin un sistema den cual esun cu ta traha 40 ora, tin un salario pa ora mas halto cu esun cu ta traha 45 ora. Esun cu ta traha 40 ora ta haya Afl. 9,98 pa ora; esun cu ta traha 45 ora ta haya Afl. 8,87 so pa ora. Nos por conclui cu esunnan cu ta traha 40 ora tin un salario pa ora miho cu na Curaçao, pero esun cu ta traha 45 ora ta gana menos…
Esaki ta husto? Segun hopi hende no. Probablemente mayoria di nos lo haya cu esun cu ta traha mas ora, mester cobra mas na fin di luna. Esey cerca nos no ta e caso. Cerca nos bisiñanan pa basta aña caba nan a pasa pa introduci un salario minimo defini pa ora, y esaki ta sirbi como base pa calcula salario minimo diferente pa siman y pa luna, cu consecuencia cu esun cu ta traha 45 ora, ta haya un salario minimo mas halto, segun e oranan mas di trabao.
Esey no ta tur, tin mas pa discuti. Na Aruba e salario minimo ta conta pa tur persona di 18 aña pariba. Y esunnan di 15 te cu 17 aña? Bon pregunta; pero lo mester warda bastante pasobra esey no ta regla pa ley. Na Curaçao al contrario, nan conoce un salario minimo hubenil. Cada categoria di edad desde 16 aña te cumpli 21 aña, tin un salario minimo cu ta un porcentahe di e salario minimo pa esunnan di 21 aña o mas. Na 20 aña e ta 90%, na 19 aña 85%, etc. Pa edad 16 y 17 e empleado ta solamentelmente 65% di e salario minimo pa adulto. Inhusto? Depende di cual banda bo ta mir’e. E filosofia na Curaçao ta cu mester stimula hoben pa keda studia, na luga di cuminsa traha na edad hoben caba. E salario abao pa hoben ta un incentivo negativo pa bay traha tempran. Bo por ta di acuerdo of no, pero esey ta e pensamento. Bon pregunta: esey ta funciona den practica? Nan ta mira cu e ta un estimulo pa hoben keda mas tempo na scol? Honestamente, na e momento aki nos no sa, pero no lo tarda pa nos investiga esey. Esey no ta kita cu cerca nos tin situacion cu ta pidi atencion, pasobra nos ta haci net lo contrario. Nos di un banda ta introduci un ley di leerplicht, cu e idea di tene hoben na scol y pa e caba esaki tambe, y di otro banda tin e incentivo pa bay traha, gana – den mayoria di caso – e salario minimo completo di un adulto, aunke no tin un obligacion legal pa paga e salario completo na esun bao di 18 aña, cu consecuencia cu no tin incentivo pa caba scol, pasobra si nan caba e scol mes, nan no ta bay haya mas salario. Cos pa drecha den e asunto aki…
En todo caso, pa bolbe riba e asunto di e salario minimo na Aruba, a keda e pregunta, pakico nos a termina cu un salario minimo pa luna uniforme, mientras cu common sense ta bisa cu un salario pa ora ta mas facil y mas husto tambe. Loke a sucede ta cu na Aruba a uniforma pago di salario minimo cu tabata diferente pa cierto sector cu tabatin orario semanal diferente, y a omiti introduci un cambio di ley pa tuma e salario pa ora como base. Nos ta asina custumbra cu e sistema troci aki, cu ni pregunta ta ser haci pa remedia e cos aki, tampoco di banda di sindicato. Tempo pa un cambio?
