Poco poco, casi sin cu ta ripara, nos tin un presencia hopi mas grandi di tanto Rusia como China den nos region. Esey no ta di ultimo añanan. Problema cu Rusia, ta data di tempo di Union Sovietico den añanan 60 di siglo pasa, tempo cu e Rusonan a kere cu tabata un bon idea pa haci uso di e estado socilista recien naci na Cuba, pa pone arma nuclear cerca di costa Mericano. Con esey a caba nos tur sa.

Awendia e panorama ta un poco diferente. Ambos pais, tanto China como Rusia, ta haci uso di nan poder economico pa crea lazonan di dependencia cu partnernan economico, cu banda di esey tambe ta crea oportunidad pa influencia politico. Pero poniendo inteligentemente e aspecto economico dilanti, ta crece hasta cooperacion cu pais cu no ta pertenece na e campo ideologico na cual China sigur ta pertenece. Rusia oficialmente no ta socialista mas, pero den practica si e lazonan di amistad cu e paisnan den nos region di e categoria ey ta sigui manera nunca Union Sovietico no a desaparece. Cuba, Nicaragua, Venezuela y Bolivia ta esunnan cu por conta semper cu Putin.

Pero, manera bisa, poniendo e interesnan economico na prome lugar a haci cu por ehemplo China a logra cooperacion importante cu varios pais. Un di nan ta Jamaica, unda e Chinesnan a crea un waf di container pa nan mes, cu un convenio di 100 aña, cu ta garantisa nan fluho comercial pa hopi tempo. No mester lubida cu Aruba mes, bao di e gabinete anterior tabata explora e posibilidadnan pa China, o su empresa estatal PetroChina, tuma explotacion di e refineria pa nan cuenta. Pa varios motibo esey no a continua. Un di e motibonan tabata cu China tabata desea demasiado control estatal cu no tabata cuadra cu un simple empresa cu mester a cumpli cu nos leynan, y no esunnan di China. Segun algun fuente bon informa, Hulanda a pone finalmente un paro na e negociacionnan. Ademas, e Chinesnan no tabata tanto interesa den e refineria, mas bien den e posibilidadnan di almacena crudo na Aruba, pa despues manda esaki pa China.

Tabatin mas iniciativa grandi di China den e region. Esun mas grandi di tur ta e plan pa coba un canal nobo den e istmo di Centroamerica, den teritorio di e compañeronan Sandinista na Nicaragua. Despues di algun aña, di protesta grandi di e poblacion cu lo perde nan lugar di biba unda e canal mester pasa, no ta tende mucho mas di esey. Aparentemente no ta solamente e gastonan enorme, calcula na por lo menos 50.000 miyon dollar, sino tambe e obstaculonan tecnico, cu ta haci cu e plannan no ta avansando.  Esey tin como consecuencia cu por lo pronto e canal di Panama ta keda e punto central pa transporte maritimo mundial, cu interes di tur riba esey.

Despues ta bin aden e interes di tanto Rusia como China den e enorme rikesanan mineral di Venezuela. Via e industria petrolero, cu prestamo grandi na Pdvsa y Venezuela a crea un dependencia cu actualmente tin Venezuela na merced di e dos paisnan aki. Y awor e Rusonan ta bay un paso mas leu. Despues di e ‘incidente’ cu e avionnan cu potencialmente por carga arma nuclear cu a baha na Venezuela y e rumornan di creacion di un base militar, awor ta surgi problema entre Venezuela y Guyana, cu casi automaticamente ta bira un confrontacion entre Merca y Rusia, ambos apoyando otro banda den e conflicto ey. Y e disputa teritorial ta toca interes Mericano directo, ya cu ta e empresa mas grandi di Merca y di mundo, Exxon Mobil, cu ta explorando y explotando gas y crudo den awanan di Guyana, pero cu Venezuela ta reclama como su teritorio, y por lo tanto su rikesanan natural.

Pa caba di completa obra, tin e papel di Cuba, cu ta probecha di fungi como lider politico y ideologico di e regimennan di mesun sorto, pa percura pa nan propio sobrevivencia y de paso garantisa e otro regimennan e stabilidad cu nan mester, ora nan no ta confia nan mes hendenan mas. Esey ta e papel cu e Cubanonan ta hungando actualmente na Venezuela.

Loke ta bira interesante den e proximo tempo, ta e posicion cu Merca ta bay tuma. Tabatin un tempo cu  por a describi e posicion di Merca cu wowo cera, pero esey no ta asina mas. Awor mester tene cuenta cu na cualkier momento e presidente Mericano, cu ta pone semper ‘America first’ te dia cu e mester a comparti un press meeting cu Putin, por dicidi algo completamente contrario na loke tur su asesornan ta pensa, evaluando henter e situacion manera ta nan tarea.  Den medionan di comunicacion na Guyana ya a cuminsa e tipo di señalnan aki di preocupacion, tambe pasobra ademas di Rusia tambe China y Iran a mustra interes pa bin tene ehecicio militar conhuntamente den region di Caribe. Te ainda Washington no a contesta. Tur esaki ta surgi na un momento cu ta anticipa e collapse di e regimen Venezolano, no pa falta di apoyo militar, sino pa derumbe di e sistema di abastecimento basico. 2019 por bira un aña cayente.