Nos gobierno ta den negociacion ainda cu un consorcio di empresa cu tin e plan pa recupera e refineria di Aruba, cera desde maart 2012. Den e mesun luna ey di mesun aña, otro refineria grandi a cera su porta, e refineria di Hess Oil y Pdvsa na St Croix. Algun aña atras a bin interes di un consorcio, Limetree Bay, pa recupera e instalacionnan y a logra haya e financiamento tambe. E rehabilitacion a costa hopi mas cu loke a pensa inicialmente, y desde mas cu un aña pasa ta haci intento pa start e refineria na un manera safe, pero no ta logra. Aparentemente e partinan cu e ingenieronan a kere cu tabata bon ainda, no tabata y mas di cuatro luna den 2021 por lo pronto a yega un final na su operacion. Autoridad ambiental Mericano EPA a laga cera e planta pa 60 dia pa bin cu un plan con pa drecha e situacion pa e no ta un menaza mas pa e poblacion. Esaki despues cu dos biaha caba e barionan mas cerca a haya un baño di azeta y gas cayente y toxico. Mas detaye den un noticia den e edicion aki, mientras den e ultimo añanan regularmente nos tabata dedica atencion na e proyecto, pa su similaridad cu e situacion na Aruba.

E situacion aki a haci nos corda loke un testigo ocular a yega di conta tocante e situacion ambiental na Aruba, tempo cu e refineria tabata opera ainda: “Tabata na final di añanan 50 di siglo pasa, San Nicolas, Aruba, un dia manera awe. Despues cu den curso di diaalgo a bay robez den refineria di Lago, un nubia preto a baha riba e lugar, biento tabata di banda robez ademas, y suelo den gran parti di e ciudad a keda cubri cu algo cu nos, mucha ainda e tempo ey, inmediatamente a yama ‘sneeuw preto’. Naturalmente nos lo no tabata asina entusiasma si nos tabata sa kico tabata e daño cu e tipo di contaminacion aki por representa.”

Pero no tabata e muchanan di e tempo ey so tabata desconoce e peligronan di un situacion asina. Den e tempo ey no tabatin autoridad cu lo por a mustra preocupacion y lo por a evalua e situacion pa yega na e conclusion cu e empresa a surpasa cierto norma di contaminacion di aire o di suelo o subsuelo, si tabata trata di contaminacion cu sustancia manera petroleo o derivado di esaki. Pero, un momento! Pensando esaki bon, te dia di awe nos no tin e autoridadnan ey, cu manera na St Croix ta interveni, cu ley den man, na fabor di e poblacion. St Croix ta teritorio Mericano, y pesey ta conta cu vigilancia di EPA, e autoridad federal pa supervision di leynan ambiental.

Gobierno di Aruba ta trahando riba un acuerdo pa reapertura di e refineria, mientras ainda nos no tin ley ambiental pa un industria asina, cu tur su peligronan, cu a cuminza casi 100 aña pasa riba e isla aki. Den e tipo di asunto aki nos gobierno(nan) ta mescos e ciudadano cu ta core auto sin seguro, y ora e haya un accidente, e ora e ta bay wak ta con ta remedia e situacion. Si nos confronta nos dirigentenan di poder publico cu e comparacion aki, sigur nan lo condena e ciudadano sin seguro como totalmente iresponsable… pero no lo reconoce cu realmente nan ta mustrando nos e mesun actitud repudiable ey. Si nos haya dentro di poco un compania cu ta acepta e reto di reconstrui e refineria, por bisa cu historia (reciente) lo ripiti. Ta apenas 6 aña pasa cu gobierno di e tempo ey a cera un acuerdo cu un consorcio propiedad di e peor escoria di e continente aki, e regimen socialista di Venezuela. Fuera di tur e advertencianan cu nan a haya, tabatin e keho/reclamo cu no tabatin ley ambiental pa duna un cuadro di proteccion na e poblacion, pasobra contrario na mas di 60 aña pasa, awendia nos ta pensa otro den e asuntonan aki. Mundo a cambia rond di nos y nos tambe mester cambia, pa nos mes bon.

Awor atrobe tin otro intento di habri e refineria, y ainda no tin ni sombra di ley ambiental pa vigila e asunto, ademas di e interogante si, si nos tabatin mes, lo a implementa e supervision ey tambe? Ta tambe ironico, y lo no ta causalidad, cu den un entrevista cu Bon Dia Aruba tabatin recientemente cu e representante di e consorcio cu ta considera reapertura di e refineria, cu nan ta entusiasma pa bin Aruba, pasobra Aruba no ta asina estricto den asunto ambiental manera Merca, unda varios refineria mester a cera, pasobra cumpli cu e requisitonan di EPA lo a bira demasiado costoso. Riba e reaccion oportuno di e reportero puntrando cu ta esey nan a bin haci na Aruba: cos cu nan no por haci mas na Merca, el a cambia e conversacion…

Nos sa cu den e actual campaña, e – pa nos – ilusion di habri e refineria lo subi escenario atrobe. Ta importante pa den e debate haci e preguntanan clave na esnan cu, envez di busca un destino nobo, ta keda maha riba e tema aki. Cu 9 aña cera, nos kier bira e siguiente St Croix?