Tin indicacion fuerte cu e acuerdo cu Hulanda pa nos por haya e ayudo cu, sigur despues di e di dos ola di Covid-19, ta parce indispensable, ta practicamente cla. Naturalmente nos no a scucha ainda opinion di e forzanan politico di nos pais, pero ta di supone cu en todo caso e partidonan di coalicion, a pesar cu nan ta keha cu nan ta ‘tranca’, lo mester a tuma nota di talvez no tur, pero en todo caso e puntonan principal.

Lo ta logico cu oposicion lo bay keha cu net e partido di Betico Croes a benta su herencia afor, pero nos no ta mir’e asina. Esun cu den e dianan aki kier lamenta e perdida di nos ‘autonomia’ mester realisa cu nos no a perde esey awor. Nos a tuma 34 aña pa haci un ‘morspot’ (pa usa un palabra netamente Arubano) di e tan afamado autonomia. Y de paso mester bisa tambe cu esaki ta literalmente autonomia: cierto libertad di hiba bo propio maneho pero semper cu un capa superior di supervision cu na cierto momento tin derecho y obligacion pa interveni pa drecha e asunto. Nos sa cu tin ciudadano cu no kier acepta e definicion aki di autonomia, pero e otro versionnan ta bastante pega riba soño politico y bastante aleha di realidad den Reino Hulandes.

Di tur manera, como cu Hulanda ta bisa cu ta interveni pa drecha cos, ey ta nos oportunidad pa contribui na un berdadero mehoracion, trahando estrechamente cu nan. Esey no tin nada que ver cu ‘entregismo’ pero ta e forma corecto y practico pa busca lo mejor pa nos pais. Sin duda algun lo bay tin momento unda cu ta propone mehoracion cu ta mustra masha bunita, pero den practica di e isla aki no ta bay funciona. Poniendo un banda e ponencianan di esnan cu ta desea di sigui cu e practica cu a pone nos unda nos ta awe, no ta cuestion di laga nan ‘take over’ y haci y deshaci loke nan ta kere ta bon, pero para firme pa loke ta kere cu ta un mihor solucion. Y ban ta honesto cu otro, en principio loke ta propone di banda Hulandes, pa crea un Aruba mas resistente y resiliente, cu na un proximo ocasion si por tuma e golpi y lanta back riba su propio forza, ta algo cu realmente lo mester ta nos lema tambe. Pues no ta propone algo cu no por carga nos aprobacion, pasobra en berdad nos no kier pasa nunca mas den e situacion den cual nos ta awor, y manera Ministro Presidente tambe ta bisa, nos no por sali di e situacion aki riba nos propio forza.

Naturalmente lo nos tende tambe esnan cu ta bisa cu tur esaki tabata evitable, si no tabata pa un secuencia interminable di gobiernonan menos cu mediocre, cu tabata pusta cu otro ken ta gasta mas y ken ta fia mas. Esey ta asina tambe, aunke cu e detaye cu cualkier di nos, cu cifra den man, por deduci ta ken tabata e gastadornan mas grandi, cu a pone nos unda nos ta awe, cu un debe di mas di 4.000 miyon florin. Unico punto ta, cu nos no mester bolbe pa pasado, no den e sentido aki, pero tampoco den ningun otro: nos no mester bolbe na e pasado di gobernacion deficiente cu a marca henter e periodo di autonomia aki.

Pero, pa nos bolbe na loke mester bay haci den e proximo añanan y unda nos tin un papel importante di hunga, e pregunta grandi ta kico ta bay haci y con ta haci esaki. Pa cuminza lo tin naturalmente un paro riba tur gasto innecesario, pa hopi aña. Esaki ta toca na promer lugar e presencia excesivo di personal den e aparato publico, pa cual lo mester bin un solucion. E solucionnan ta en general conoci y lo implementa nan tambe, pero e lo no ta un proceso di corto duracion y lo no ta facil tampoco. Curaçao den e sentido ey ta un ehemplo, positivo y negativo, unda si no tabatin presion Hulandes e propio politiconan nunca lo a efectua e plan di austerisacion y restructuracion aki. Cerca nos tambe lo no tin politico cu lo reconoce, loke den profundidad di nan curazon nan mes tambe sabi, cu nan mes nunca lo ni propone algo asina. Aki nos tin un di e puntonan clave den e reforma cu ta bay bin, cu lo tuma lugar solamente pasobra tin un intervencion di afor.

Pero nos mester pensa tambe cu e cambio no ta algo di sentimento so, tin cifra pa sustenta loke esaki ta bay significa pa nos pais. Ehemplo: si nos logra reduci e payroll di awe di Afl. 735 miyon, mas cu mitar di presupuesto 2020 promer cu Covid-19 a aparece, te bao di 500 miyon, nos ta economisa mas di 200 miyon. Hunto cu e 230 miyon na interes cu nos por reduci considerablemente a traves di fianza Hulandes, esaki ya ta duna nos rosea pa paga loke nos mester paga. Lo ta un alivio grandi pa hopi hende si e proceso aki bay acompaña pa e trato igual cu nos mester urgentemente, na lugar di valora hende pa nan color politico. Tempo pa cambio.