Nos por o no por para exageracion di turismo…?

Partido extraparlamentario Raiz a tene diabierna pasa un simposio encuanto turismo sostenible, relativamente bon bishita, cu un publico selecto den diferente sentido. Uno ta cu no a mira participacion di hende cu no ta na altura y ta bin pa haya mas conocemento di e materia.

Tampoco ta mira esnan cu ta activo actualmente den formulacion y ehecucion di maneho y politica den turismo y mas en general, di desaroyo economico. Na Aruba ta mas cu ‘logico’ cu no ta mira e ‘decision makers’ di e momento na un evento partidario cu no ta di nan mes. Loke nos ta keda cune, ta un grupo di hende generalmente bon informa caba. Sin embargo, mester mira e otro aspectonan positivo di e nochi di informacion aki.

Un preocupacion cu nos ta haya di un evento asina ta cu parce cu pa di tantisimo vez ta trece un situacion dilanti cu por a keda atendi hopi aña pasa caba, si tabata posible pa influencia maneho gubernamental di berdad, loke ta parce practicamente imposible, y e experiencia di e ultimo decadanan ta proba esey. No ta pornada ta invita un personahe manera Sam Cole, cu años atras a duna su advertencia pa e direccion den cual nos tabata bay, y den tur e añanan nos tras, nada a cambia. Mas grave ainda, ora nos analisa loke ta bin pa nos den e proximo añanan, ta mas di e mesun cos ainda: mas di 4.000 camber, pa cual, manera a bolbe bin dilanti, nos no lo tin trahado. Pero nos gobernantenan, manera semper, kier mantene nos pueblo na soño cantando nan cantica di ‘kinderbedtijd’ y evitando cu realmente gobierno ta dispone di un unidad di planificacion cu no ta pone solamente e bentahanan di e proyectonan proponi, pero tambe e riesgonan cu cual nos mester tene cuenta.

Por ehemplo, un di e aspectonan cu Sam Cole a trece dilanti ta, cu si nos ta laga esnan di parti gubernamental y empresarial haci loke nan kier, nan ta keda haci esey te dia… cu nan cuminsa perde placa, y esey tambe ta conta pa ambos… E ora nan ta core cabes di gay y ta busca manera pa trece cambio den e rumbo, pa cual nan mes tanto aña largo a ignora y impedi cualkier cambio corectivo. Y nos no por spera nada miho di nan, pasobra nan mero existencia den e mundo ta pa keda haci loke nan ta haci, y esey ta keda ripiti loke nan ta haci. Ta p’esey cu nos por lamenta cu net e decision makernan ey no ta presente riba un anochi asina, pero nos no mester ta sorprendi. Simplemente cambio lo no bin di e banda ey. Ta parce cu Aruba mester haya su mes den problema grandi prome cu algo ta bay cambia.

Kico esaki ta implica anto pa e futuro cercano? Nos ta haya mas di 4.000 camber acerca, cu ta rekeri como 10.000 empleado, o mas, di cual solamente un fraccion lo ta disponible riba mercado laboral local. Y e resto? Manera un asesor di e actual gobierno a yega di bisa nos varios aña pasa, ora tabata discuti un moratorium pa camber di hotel, cu lo ta bon pa trece tanto trahado aden, “pasobra nan lo yuda nos cu nan aporte tur luna na AZV y SVb, net bon.” E mal yama ‘asesor’ aki no tabata por o kier comprende cu si bo ta trece trahado di exterior aden cu ta gana suficiente pa paga un par di cien florin pa aña na prima, pero cu e tempo ey tabata costa riba tres mil florin pa aña na gasto medico como promedio, cu ademas na e momento aki a bira cuatro mil florin di promedio caba, bo ta cargando awa hiba lama. Pero enfin, tanten nos ta keda pega na e nivel di conseho aki, unda ta bisa solamente loke e mandatarionan tin gana di tende, nos lo no mira cambio.

Kico ta e alternativa anto? Bay sinta yora den un huki? Esey sigur no ta yuda. Loke talvez no ta yuda pero en todo caso nos por bisa cu nos a cumpli cu nos pais, ta cu e advertencianan contra e direccion den cual nos ta bayendo no por keda sin bin dilanti. Y, tin algo cu por bay sucede. Y esey ta cu e mesun afan pa gana placa cu ta trece inversionista interesa, na un dado momento ta bay haci cu nan ta cuminsa mira e peligro di un inversion na Aruba, cu envez di ta e ultimo cu tambe ta gana placa, lo ta e prome pa perde placa na grandi… Nos a lubida acaso, cu lo tabatin un bunita hotel di cinco strea na Bushiri, pero cu no por a logra financiamento? Nos a lubida acaso cu den pasado caba a traha hotel cu nunca a habri? Ta realmente algo straño cu un hotel di casi mil camber na Sero Colorado no por a presenta inversionista di realmente bon reputacion?

E punto cardinal di e asunto ta cu remedia na tempo ta hopi menos costoso cu mira Aruba fracasa como destinacion sobredesaroya, pa despues nos bay construi un futuro nobo riba ruina di turismo. Ademas, ki futuro esey lo ta?