Nos poblacion mester compronde importancia di un Aruba sigur y limpi

Ayera operadornan y socionan turistico di Latino America presente den CATA 2016 a participa di e  “Vitrina Turistico” organisa pa ATA den Grand Caribbean Ballroom na Hilton Hotel.
Directora di ATA pa Latino America y Venezuela, sra. Miriam Dabian a mustra su satisfaccion con e vitrina aki cu ta un plataforma pa haci negoshi a bay. El a bisa cu nan no tin un cifra stipula como meta den e vitrina turistico aki. Sinembargo ATA tin un obhetivo corporativo estableci anualmente. El a splica cu cada mercado turistico di Aruba tin su propio meta y obhetivo. E meta tras di CATA ta pa e operadonan presente cera conoci miho y directamente cu nos producto, y asina e operadornan aki por haya mas interes riba nos isla, y wak den cual segmento nan por promove y mercadia mas Aruba den nan pais, ya sea: honeymoon, vacacion di famia, etc… 

All inclusive y siguridad 
Sra. Dabian a bisa cu nan ta haya hopi solicitud pa “all inclusive”, pero nos isla no ta un isla all inclusive so, ya cu nos tin diferente opcion. 
E concepto afo di all inclusive ta hopi fuerte ora cu nan ta bay mercadia turisticamente nos isla. Ta dificil pa mustra nan cu Aruba no ta un pais “all inclusive”. P’esey ta importante e presencia di e operadonan aki den seno di CATA, ya cu nan mes ta ripara y expresa cu berdaderamente Aruba no ta un “all inclusive island”. 
Un aspecto cu el a destaca ta cu e operadornan por expresa cu nan ta sinti nan mes facil y sigur pa nan por cana rond y comparti cu nos hendenan. “P’esey pa nos ta hopi importante pa nos poblacion Arubiano compronde e importancia di tin un Aruba sigur y limpi. Un Aruba cu nos por invita e hendenan sali fei di nan hotel. Esaki ta un cos cu anos como Arubiano por haci”, el a laga sa.

Vitrina turistico   
Den su declaracion na Bon Dia Aruba e ehecutivo importante di ATA a bisa cu e aña aki nan a haya un number bastante halto di operadornan di aerolinea di full e region presente den e vitrina turistico di CATA 2016. Esun cu tabata presente den e vitrina aki ta e socionan y no socionan di AHATA. Nan tabatin e posibilidad pa sinta cu e operadonan, segun sra. Dabian. Nan a traha a base di citanan programa y e dinamica di negoshi tabata bon.  Te 2’or atardi tur esunnan cu ta bende e producto Aruba na Latino America a haya posibilidad di papia cu e establecimento comercial of turistico di nos isla. “Tin hopi interes y esey ta duna nos mas optimismo pa un mercado cu varios di nan ta pasando den problemanan economico, ya sea pa devaluacion di moneda, pa falta di awa y prijs di petroleo, etc…”, el a bisa. Den e reunion cu nan a tene cu nan socionan di turismo na Latino America nan por scucha cu tin hopi potencial pa Aruba. E operadonan cu no a yega di conoce Aruba antes a bisa cu nos isla ta un bon producto cu nan por bende masha facil mes. 

Durante henter un siman e operadonan presente den CATA 2016 tabatin e posibilidad pa conoce nos producto turistico.  Ayera tabata e dia clave pa nan cera negoshi y papia riba contract, tarifa, potencial di promocion mutuo. Otro establecimento a presenta nan producto local pa nan por pidi e sector hotelero apoyo pa bay ya sea den nan magazin, sistema di promocion y distribucion di informacion di e productonan cu nan ta bende.