E asuntonan bochornoso cu a tuma lugar den parlamento, no a keda rega ainda. Despues di e votacion iregular cu ta desafia cualkier sentido comun, presidente di parlamento a bay di bishita cerca Gobernador. Ta practicamente sigur cu esey lo tabata iniciativa di Gobernador y no di e presidente di Staten. Loke a papia eyden ta keda eyden, pero en todo caso por lo pronto e presidente di e organo, cu regularmente e ta gaba como esun mas halto den nos sistema gubernamental, no tin un papel pa hunga mas den e asunto aki. E bala ta den otro parti di e cancha awor y nos ta hayando falta di cierto voznan cu ta indispensable den e asunto aki.

Pa cuminza, pasa un mocion di desconfianza contra un ministro no ta un asunto minusculo, e ta algo unda un di e personanan cu mester actua, ta nos promer ministro. Ta inimaginable cu den e situacion aki no ta tende nada di e persona aki, cu eventualmente mester pone su firma bao di un landsbesluit pa retira e mandatario en cuestion, hunto cu Gobernador. Nos no a tende nada di nos promer mandatario, tampoco den otro medio di comunicacion. Straño ta cu nos a haya señal (no comproba, mester bisa) cu diabierna atardi caba tabatin un tal decreto di retiro na despacho di Gobernador. Nos no ta kere esey pasobra esey lo ta duna muestra cu e mocion aki lo tabata algo ‘pre-cooked’ hunto cu lider di ehecutivo. Normalmente normanan di prudencia y di trato normal ta exigi cu no ta core saca un decreto asina, ni den e caso cu e mocion a ser trata di un manera normal den parlamento, loke absolutamente no tabata e caso. Ademas, a pesar cu loke ta discuti den despacho di Gobernador ta keda confidencial, nos por imagina cu e conversacion cerca Gobernador no tabata tocante e tapijt nobo pa parlamento. Lo a papia di e proceso cu a tuma lugar den parlamento cu a pone nos den un situacion di berguenza colectivo, y esaki pa un presidente di parlamento cu no kier comprende cu desconfianza den un ministro ta algo cu por sucede, den cualkier pais, pero cu ta requeri un cierto trato, pasobra ta trata di un funcionario na e nivel mas halto di gobernacion. Na Aruba nos a custumbra demasiado cu ta yama tur ministro na nan nomber y ta haci manera ta nos tur a sinta hunto cune den klas. Y ni si esey ta e caso, ta indispensable pa mantene cierto respet, pa tambe por exigi di e mandatario, cualkier mandatario, cu nan ta mantene respet pa tur ciudadano, cualkier ciudadano.

Ta pesey cu ta normal cu ora e relacion cu un mandatario yega na e nivel cu un gran parti di parlamento ta duda si e ministro merece nan confianza ainda, ta pone reunion unda explicitamente ta agenda e asunto: debate riba maneho di e ministro; ni mas, ni menos. E manera di asalto ‘achterbaks’ aki no ta digno di un parlamento y e presidente, si e ta kere cu e merece e puesto ey, mester a realisa su mes e gravedad di e situacion cu nan a hinca nan mes aden. Si en berdad tin un mayoria pa aproba un mocion di desconfianza, pakico ta asina dificil pa mantene ‘fatsoen’ y atende e asunto aki manera mester ta. Nos tambe a haya e comentario di varios banda cu ta bisa: “Pakico ta asina dificil pa e ministro comprende cu nan no kier e mas? Pakico e no ta tene honor na su mes?” Esey, na nos manera di mira e asunto, lo tabata e pregunta corecto, si a trata e asunto manera esaki mester tuma lugar den un pais civilisa, di manera civilisa, digno di un parlamento cu ta respeta su mes y ta respeta e pais y pueblo cu nan ta representa. Tur e parlamentarionan cu a presta nan mes pa e actuacion bochornoso aki ta lubida cu cualkier dia nan por ta e politico cu di representante a bira ehecutivo, y por ta suheto na e mesun trato sin respet aki. Den un Editorial caba nos a yama e practicanan aki ‘struikroverspraktijken’ y cu e sucesonan di diahuebs pasa no tin motibo pa cambia e opinion ey.

En todo caso, cu e reaccion di e mandatario encarga cu Infrastructura cu e no ta acepta e mocion pasobra e no tin validez pa e forma con esaki a yega na bida, di su parti ta poco probable cu algo ta bay sucede, di manera cu en principio nada ta bay pasa. Si tin un landsbesluit pa Gobernador dicidi cu ta firma si of no, ta asunto con nos lider di gobierno ta evalua loke su coleganan di partido a haci den parlamento, y principalmente loke e presidente mester a haci. El a actua malo como presidente, poniendo duda den nivel di e organismo aki, cu supuestamente ta esun mas halto. Ministro Presidente por haya cu e mocion a ser aproba na un manera regular, y esey ta habri caminda pa un landsbesluit di retiro, cu hunto cu su firma ta bay pa Gobernador. Como cu nos promer mandatario no ta duna ningun señal di kico el a haci o lo haci, nos ta keda pendiente di su comunicacion, manera por spera di un lider di gobierno. Nos lo tende.