Esey tabata loke a keda resona cerca nos despues di scucha palabranan di Promer Ministro y di director di departamento di Finanzas den e reunion den Parlamento ayera, unda cu a duna bon di comprende cu nos a yega ‘end of the line’, cu nos no tin rosea mas…

Promer Ministro di otro banda tabata keda mustra riba e hecho cu ainda tabatin negociacion andando, motibo pa cual awe (diabierna 14 di augustus) Aruba lo no ta riba agenda den Conseho di Ministro di Reino. De paso e no a duna claridad den ki direccion e asunto ta bayendo, mientras segun nos e documento cu el a manda Staten, cu un par di cambio cosmetico, ta papia pa su mes.

E presentacion di director di departamento di Finanzas a haci nos corda un chiste di hopi aña pasa den e revista semanal Vrij Nederland, unda a haci e expresion “Aan het eind van mijn geld hou ik een stuk maand over…” Nos tambe, ora nos placa caba, nos a keda sinta cu tur e obligacionnan financiero y no tin caminda di sconde. For di su presentacion por a comprende bon cla, cu no solamente djis aki no tin placa pa paga mayoria di cos, pero cu ademas e perspectivanan a mas largo plazo tambe ta sumamente serio. Por ehemplo, pa otro aña otro 500 miyon florin cu mester fia… Y nos no sa sikiera con nos economia ta para pa e tempo ey. Y, pa cera porta pa esnan cu ta pensa cu Aruba por sigui riba su mes, buscando financiamento riba mercado local y internacional, el a splica bon cla cu ningun di dos ta viable. Mercado local ta demasiado limita y pa bay fia placa den exterior nos mester aprobacion di  e mesun Hulanda, y nos pa e tempo ey sigur ta firmemente den categoria di ‘junk’ pa loke ta nos calificacion pa prestamo. Pues, no tin otro alternativa cu acepta e oferta Hulandes.

Scuchando e diferente fraccionnan na palabra durante e reunion den parlamento ayera, por a ripara cu banda di cierto realismo tabatin esnan tambe cu ta beligerantemente contra y ta pensando riba tur sorto di alternativa, pa protesta, no pa trece solucion, pasobra esey nan no tin. Tur mester tabata bon consciente cu despues di mas di un luna di consulta y negociacion, gobierno no ta bisa cu tanto palabra cu ta aceptando e propuestanan Hulandes, pero e hechonan ta mustra den e direccion ey. E mero hecho cu cierto cambio cosmetico a tuma lugar, nada mas,  ta indicacion caba cu e organismonan di supervision mes ta acepta caba; ta Promer Ministro no ta bisa esey.

Di e banda ey tabata di aprecia e intervencion di e parlamentario di e partido mas chikito den e coalicion, cu a puntra pa gobierno bisa bon cla unda gobierno ta para! Pasobra ta facil pa bisa cu ainda ta negociando, pero esey ta riba detayes y no riba e puntonan principal. Di tur manera, gobierno debe nos un contesta pronto y nos sa kico e contesta ey lo ta. ‘So far, so good’, nos por bisa. Di otro banda, nos tin comprension pa e sentimento den Parlamento, pasobra ora gobierno bisa Hulanda cu ta acepta, Parlamento no tin e potestad pa cambia e rumbo aki. Ta den Tweede Kamer ta dicidi con e leynan di Reino ta bay ta y den proximo añanan nan lo ta defini hopi asunto pa nos. Esey no ta implica cu e nivel parlamentario lo ta para completamente fuera di combate, pero hopi cos lo bay dicidi riba nan y nos cabez.

Sin embargo, den tur esey nan mes tambe a hunga un papel. Tuma por ehemplo e sucesonan alrededor di e ley Arubano di supervision financiero. Si no tabatin un intento pa sabotea esaki aña pasa, anto lo no tabatin necesidad di bin cu un ley di Reino pa esaki. Y cu e experiencia ey bon imprimi den nan memoria, nan a diseña e otro ley di Reino aki, pasobra nan no kier tuma ningun riesgo cu Parlamento di Aruba ta bay crea problema pa implementa cierto cambionan. Y nos por kita nan razon? Ban tuma otro ehemplo aki: ken den Parlamento lo bay vota pro pa cambio drastico manera reduccion di nos aparato publico? Nan tur sa masha bon cu e monster cu nan a crea conhuntamente ey, ta otro hende lo mester bin clear e job ey. Di e banda ey mira nos ta kere tambe cu na e momento aki tin hopi gritamento y zundramento, pero tur politico ta bon consciente cu nos no tin otro recurso.

Mirando anto unda nos ta para awe, ta importante cu mas pronto posible Promer Ministro duna claridad cu tin un acuerdo y cu tur esnan, e milesnan cu ta depende di e ayudo Hulandes, por ta trankil cu e ayudo indispensable lo yega. Y asina mes, cu e ayudo ey durante bastante tempo, ta dificil pa predeci unda nos ta para aki un aña. Recuperacion di economia absolutamente no ta depende di gobierno so. E ta tuma hopi mas, cu no ta den nos man. Recuperacion di economia Mericano ta indispensable pa nos por bin back riba nos pia. Y aki tampoco tin claridad kico nos por spera. Pero ban percura pa nos tin rosea ainda.

LJMADURO – 13-AUG-2020