“Nos mester tin determinacion. Nos mester ta determina den logra nos meta: un miho Aruba pa tur ciudadano, irespecto e desafionan. Irespecto con dificil e por ta awor.”
Esaki ta palabranan di prome minister Evelyn Wever Croes ayera durante e ceremonia y acto protocolar na Plaza di Betico Croes. Unda e ta enfocando riba ‘retonan grandi’ cu ta na caminda.
Presente tawata tambe gobernador di Corsou, gobernador di Aruba, prome minister di Corsou y Aruba, presidentenan di parlamento di Corsou y Aruba, demas mandatarionan di Corsou, Boneiro y Aruba y consuladonan.
Prome minister Wever Croes a recorda e importancia di e dia nacional y tambe di nos himno y bandera.
“E tempo ey, na aña 1976, Aruba tabata parti di Antia Hulandes, y den curason di nos pueblo tabata biba e deseo di ta liber. E gran politico y estadista di e tempo ey Betico Croes dfm, a realisa cu un pueblo no por ta liber si e no tin su simbolonan di identidad y libertad.”
El a bisa tambe: “E presentacion di nos bandera 42 aña pasa, tabata un experiencia riba su mes. Ami ta corda e tempo ey con esnan cu tabata mustra interes den nos himno y nos bandera tabata wordo persigui. Den forma casi clandestino nos e tempo ey como muchanan di scol, a participa na e presentacion di nos bandera den Wilhelmina Stadion. Pero cu orguyo y sin miedo. E experiencia di mira nos bandera bay halto pa prome biaha, nunca mi por lubida, y cada aña di nobo, ta yena mi cu emocion.”
Retonan grandi na caminda
E prome minister tambe ta papia di retonan grandi cu ta na caminda. “Ban enfrenta e retonan diario cu e mesun feroz cu nos himno ta bisa. Pa nos lucha pa mantene nos libertad. Aruba ta enfrentando retonan grandi. Retonan social. Retonan financiero. Retonan den relacionnan cu pais bisiña. “
“Pero mescos cu na 1986, momento cu Aruba a haya su status aparte, mi tin tur fe y confiansa cu nos lo surpasa e retonan aki. Mescos cu na 1986, nos a logra cosnan grandi pa nos pais, pasobra nos a sa di uni. Y esaki ta momentonan cu ta exigi union den nos pueblo, union cu nos rumannan den Reino. Union ta nos forsa.”
E tambe ta enfatisa e importancia di innovacion y creatividad: “Pa surpasa e retonan nos mester di vision.Vision unda nos ta mira Aruba aki 10, 20, 30 aña. Vision a traves di innovacion, con nos ta prepara nos yiunan y nan yiunan pa nan posicion den un mundo cu ta cambiando.”
Di naturalesa nos ta un comunidad sumamente creativo, mira e creatividad riba un dia manera awe, of durante periodo di carnaval. Pero ta yega un momento cu nos ta perde esaki door di e desafionan diario. Y p’esey, si nos kier innova, si nos kier prepara nos muchanan pa trabounan cu awe no ta ni existi, nos mester mantene e creatividad ey, a traves di enseñansa y a traves di innovacion.”
“Pero cu vision so, nos no t’ey ainda. Nos mester tin determinacion. Nos mester ta determina den logra nos meta: un miho Aruba pa tur ciudadano, irespecto e desafionan. Irespecto con dificil e por ta awor.”
Curashi
E prome minister tambe ta enfoca riba e importancia di curashi. “Curashi pa tuma e decisionnan dificil cu mester wordo tuma, sabiendo cu esaki lo trece prosperidad y bienestar pa tur despues.”
“Ta tuma vision, curashi y determinacion, pa nos atende cu nos retonan, pa nos surpasa nan y pa asina nos conserva nos libertad, manera nos ta canta tur dia den nos himno.
Como pais nos ta enfrentando retonan hopi grandi na e momentonan aki, pero e dia manera awe, esta Dia di nos Himno y Bandera ta brinda nos e oportunidad pa refleha, yenando nos cu inspiracion, curashi y amor patrio pa den union nos atende cu tur reto, pa garantisa felicidad di e pueblo aki”, asina e prome minister a bisa ayera. Unda e finalmente tambe a dirigi su mes na e invitadonan di e otro islanan y mustra e importancia tambe di union entre e islanan.
