Ayera atardi manifestacion di 60 pa 70 hende a aglomera dilanti Kill Cage na Wayaca pa asina vocifera nan preocupacionnan pa loke ta trata e trato humano di bestianan riba nos isla.

Aunke e manifestacion no tabata contra e Kill Cage specificamente, esunnan cu a haci e yamada pa aglomera esta Crijojo Trappers a vocifera cu nos na Aruba tin cu cambia mentalidad ora ta trata di cuido di pushi y cacho.

Lentamente un cantidad basta grandi di auto a busca luga di para cerca di e Kill Cage ayera atardi unda Crijojo Trappers, un proyecto di Nisicanis Foundation a haci un yamada na comunidad pa mustra nan apoyo pa e bestianan riba nos isla cu ta wordo maltrata y ta wordo mata di manera inhumano, segun nan.

Aunke e fundacion aki ta kere cu e concepto mes di Kill Cage ta na su luga, nan no ta di acuerdo primeramente cu su ehecucion. Pero mas profundamente nan ta haya cu e mentalidad cu ta prevalece na Aruba pa loke ta trata cuido di mascota y bestia ta loke ta haci e Kill Cage asina problematico manera e ta actualmente.

Un di e boluntarionan di Crijojo Trappers Geraldine Kock a conta e publico cu a presenta cu nan ta bogando pa cambia e manera con ta mata e pushi y cachonan cu ta haya nan mes enfrenta cu e ultimo stap den nan bida na e Kill Cage. E fundacion a entrega un plan di accion na e minister concerni kende actualmente ta Dangui Oduber (MEP)- pa asina e Kill Cage cumpli cu normanan y tratadonan internacional di veterinario. Aunke nan a sinta cu minister antayera nan ta spera cu lo bin cu un solucion pronto pa e asunto aki. Tur esaki mientras cierto personanan tabata keda ripiti: “Exigi certificacion den menos cu 24 ora!”

Specificamente kier exigi pa e persona cu ta encarga cu eutanasia ta un persona cu ta de facto un veterinario, pues cu e tin e certificacion necesario pa haci e trabou. Esaki pasobra segun sra. Kock e persona cu ta encarga cu esaki actualmente na Aruba no ta un veterinario. Algo cu na Merca y Europa ta un standard pa tin e persona adecua ta haci e trabou.

E procedura pa eutanisa

Segun sra. Kock, e proceso lo mester cana di tal manera cu tin 2 persona cu ta ehecuta e eutanasia y cu mester haci uzo di 2 hangua pa haci e trabou. Pero segun su persona actualmente na Aruba ta uza e di 2 hangua so y un persona su so ta encarga cu e eutanasia. Loke ta primordial segun sra. Kock ta cu mester percura pa e procedura wordo sigui segun normanan internacional pa percura cu e bestia no wordo ehecuta di manera inhumano. Pues aki nan ta cuestiona cu si un persona cu 1 hangua ta encarga cu esaki, si e persona tin suficiente tempo pa haci tur cos di manera corecto pa e bestianan por bay den paz.

Sinembargo segun boluntario na Aruba Animal Shelter Eddy Prins, e no ta di acuerdo cu e manera con e personanan di Crijojo Trappers ta trece e situacion dilanti. Sr. Prins ta di completamente di acuerdo cu e preocupacionnan pa loke ta trata e trato inhumano, pero segun su persona ya caba e prome hangua ta mortal. E boluntario mes a yega di haci e procedura, e ta conta nos. Pues pa e ora cu ta uza e di dos spuit segun sr. Prins e bestia ya caba ta na caminda. Y e di dos spuit no ta importa unda e wordo poni, pasobra en fin esaki ta relaha e musculonan di e bestia, incluyendo su spiernan di curason.

‘Dolor paso inyeccion ta bay den curason’

Riba e mesun aspecto di procedura, casi na final di e manifestacion, un persona cu ta trahando den veterinario pa algun aña, a elabora mas profundo riba esaki. Segun e trahado di veterinario, e manera con ta haci esaki actualmente ‘no ta djey humano’ pasobra ora di hinca e hangua den e bestia esaki claro lo bay haci dolor, specificamente esun cu ta inyecta stret den curason. Sinembargo algun clinica veterinario a stop di haci esaki, segun su persona. E manera mas humano cu algun clinica ta uza ta cu ta pone e bestia pa e drumi y djey ta inyecta e bestia den nan ader/catheter. “Bo no por haci e inyeccion via musculonan. E no ta logico y mucho menos humano.”

Inyeccion y medicina ta di acuerdo cu peso

Un otro punto cu e trahado di veterinario a trece dilanti ta cu pa inyecta e bestia cu e dosis corecto di e medio di eutanasia mester sa precisamente cuanto e bestia ta pisa. “Si nan tabatin un weegschaal ki den (mustrando riba e Kill Cage) nos lo por a considera pa haci e cosnan aki. Pero si bo no tin e peso di e bestia con bo por bisa cu bo ta haciendo cosnan humanamente?”

Segun e trahado, hopi di e bestianan cu ta yega na Kill Cage ta wordo considera hopi menos pisa di loke nan ta. Por ehempel un bestia grandi cu ta wordo evalua y ta bisa cu e ta 10 kilo solamente. “Si ta asina cu e cacho ta 25 kilo, e ta bay keda den agonia pa basta tempo prome cu e yega na su final.”

Na final di su discurso e trahado a wordo aplaudi pa e publico presente ora el a expresa cu ‘pueblo di Aruba tin cu para hunto y stand for their rights. Nos tur mester ta nan bos pasobra nan no tin’e. Ban corda cu boso palabranan ta nan stem, nan gritonan’.

No tin otro persona pa haci e trabou

Durante e manifestacion poco desorden a wordo crea aunke nunca a escala cu violencia pasobra cierto personanan no tabata di acuerdo cu otro y emocionnan a bay halto. Segun sr. Prins e persona cu ta haci e trabou aki no ta un hende cu ta disfruta di e trabou. “Mi mes a yega di wak e ta yora ora e tin cu haci su trabou.” Sr. Prins ta haya cu aunke e causa di e manifestacion ta uno bon, mester percura pa haya informacion corecto.

Scan bestia na Kill Cage

E fundacion bou cual Crijojo Trappers ta resorta ta bogando pa basta tempo pa conscientisa pueblo di Aruba riba e importancia di sterilisa nan mascotanan. Sra. Kock ta haya cu ainda mester bin par di cambio den e mentalidad pa loke ta trata bestia na Aruba. E ta haya cu hopi biaha hende ta pensa di sterilisa e bestia femenino so, mientras cu mester percura pa tur bestia wordo sterilisa. E fundacion te hasta ta contribui di nan banda di manera financiero pa percura cu mas hopi cacho y pushi riba nos isla wordo sterilisa. Nan ta bay asina leu pa ora sterilisa un bestia y nan nota cu ta haci falta di cierto vacunanan of medicina, e fundacion ta paga esaki di biaha. “Esaki ta pa percura pa nos inversion wordo sigura, pasobra si e mascota no tin tur cos den orden tanto bal nos sterilis’e y e tin heartworm cual lo tin chens grandi di mat’e.”

Pero e cambio cu lo mester trece pa e bestianan lo mester pasa di manera mas holistico, segun sra. Kock. El a splica nos cu mester trece cambionan den e aspecto di educacion y conscientisacion, tanto como den Veterinaire Dienst mes como den polis. Polis lo mester duna boet pa ora bestianan wordo maltrata, segun sra. Kock.

Fundacion cla pa contribui di cualkier manera pa mehora situacion

E fundacion actualmente ta bogando pa e Kill Cage haya un scanner unda lo por determina si e cacho ta di caya of si e tin doño, pasobra esaki ta algo cu lo por scapa hopi bestia di wordo mata inhustamente. Es mas, segun Crijojo Trappers tin hopi mascota na Aruba cu ta wordo venena pa malo. “Nos mes como boluntario a pasa awe cu e scanner y nos a haya un cacho cu un persona a laga akinan. Nos a saca e cacho y djey a puntra e persona cu a lag’e dicon a laga e bestia akinan. E di cu e cacho di e bisiña tabata un molester pa su galiñanan. Esaki ta e tipo di situacionnan cu nos kier stop.”

Segun sra. Kock a papia cu e minister pa asina trece e scanner den Kill Cage. Esaki e minister a reacciona hopi positivamente riba dje, segun sra. Kock. Pues e fundacion lo spera cu nan plannan wordo tuma y si nan mes como fundacion mester contribui di manera financiero of di otro manera nan ta cla pa haci esaki.

Casi na final di e manifestacion nos a tende papia di posiblemente trece camaranan rond di e Kill Cage.