Ta mustra positivo ora bo lesa cu fundacion pa Reclassering ta bay haci un proyecto pa hoben delincuente, pero cu ayudo di nos… En principio ta parce cu no tin nada malo cu e iniciativa aki. Te ora bo realisa cu: esaki ta cay bao di Husticia, no? No ta esaki ta e ministerio cu a laga nan corta 3 miyon di su presupuesto recientemente? No ta esaki ta e ministerio cu a cancela un proyecto di guia na hoben delincuente ora nan sali for di prizon? Un proyecto hopi necesario, pasobra sin guia y acompañamento, den corto tempo nan ta den man atrobe di nan amigonan cu nunca a sali di e circulonan delincuente aki. Asina ta, sin un alternativa pa un bida diferente, cu posibilidad di otro rumbo, cu educacion y trabao, nan lo bay inmediatamente di unda nan ta bin. Awor, despues di tur cos cu a pasa, despues cu e ministro mester a soporta un avalancha di critica di tur banda, ta bin awor cu un iniciativa… pa nos paga cu donacion?
Riba su mes e proyecto ta mustra simpatico. Pero prome cu tur cos aparentemente ta hacie pasobra e ta sali barata. E idea ta cu e hobennan ta haya un enkelband anto di e manera ey ta mas facil pa sigui nan paso. Pero, pa bo sigui hende tambe bo mester personal. No ta cuestion di simplemente castiga nan ora nan ta bay unda nan no mester bay; bo mester brinda mas cu esey. Loke ta sali na cla tampoco ta con e proyecto aki ta conecta cu otro proyecto bon cu e fundacion tin o tabatin. Por ehemplo e proyecto di ‘Leer- en werktraject’ unda ta busca empresanan cu ta dispuesto di duna e hobennan aki un oportunidad pa haya experiencia den cierto tipo di trabao. No cu necesariamente e hobennan ta keda na e empresa, pero e por ta un bon estimulo tambe pa por ehemplo nan bolbe den enseñansa regular pa amplia nan posibilidad den bida.
Pero ki dia nos a tende e ministro aki mes bin dilanti y para fuerte pa logra cu su gobierno ta pone placa disponibel pa por ehecuta e proyectonan aki. Y ora nos ta criticando e ministro di Husticia pa su maneho invisibel y desconoci, nos no mester lubida e otro responsabel grandi pa esaki. Esey ta e ministro encarga cu Asunto General, cu pa ley ta tambe e persona encarga cu y responsabel pa Orden y Siguridad Publico: nos Prome Ministro cu a bira casi mes invisibel cu e plan di combati criminalidad di su colega. Pa bisa berdad, e ministro di Husticia ta primeramente responsabel pa e medionan cu Husticia mester. E ta percura pa polis, ministerio publico, prizon, reclassering, etc. tur tin loke nan mester pa por traha y ta coordina tur esaki. Pakico e no ta sinta hunto cu ne como responsabel maximo den parlamento? Mester tin un colaboracion estrecho entre e dos ministronan aki y esey ta loke na ningun momento nos por ripara.
Naturalmente nos lo bay tende cu e malcontento cu a desemboca den un accion di protesta contra e maneho hiba contra criminalidad ta un iniciativa politico, cu ta e partidonan di oposicion ta tras di e iniciativa. Y, di esey nos mester conclui cu e no tin derecho di existencia? Si tin un protesta masal o no, esey no ta cambia e situacion di delincuencia cu a aumenta. Y ora e ministro ta bisa cu e reisnan di e delincuencia ta origina den nos mes comunidad, esey ta berdad. Y e consecuencia ta cu bo no por haci nada otro cu elabora un plan a largo plaso pa bringa esey. E ta exigi un plan cu ta abarca varios ministerio y no por ta otro cu henter e gabinete mester carga esaki. Pero bo no por uza esey como argumento pa keda man crusa y no haci a corto plaso loke por haci awor. Y esey ta ekipa e organonan di Husticia di e miho manera pa nan por haci un trabao optimal.
Loke nos ta mira awor cu den banda ta saca noticia ‘positivo’ di un solo proyecto, na luga cu e ministro mes bin dilanti y conta kico e ta bay haci; esey no ta e caminda pa logra algo. Y asina e ministro ta keda blanco di critica, y cu rason. Pasobra e unico plan cu e ministro y gobierno tin ta sigui gasta lo minimo na Husticia, invitando nos pa join y pone placa disponibel pa proyecto cu nan mes no kier financia. Importante ta kico ta bay pasa ora presupuesto di Husticia keda trata den parlamento dentro di poco. Ey ta unda e ministro mester mustra kico ta e diferencia cu e aña aki, pa purba convence hende cu haciendo tur cos manera e tin añanan ta haci, lo duna un resultado diferente… Di su coleganan den parlamento e no tin nada di teme, pasobra nan tambe ta parti di e unico plan cu ta conta, y esey ta yega eleccion otro aña hunto ainda. Un par di atraco mas no mag stroba esey!
