Ayera mainta durante e prome presentacion di RENT na Aruba tanto studiante como docente cu a wordo invita a keda conmovi pa e show di Broadway cu a toca tema di LGBTQ y HIV/AIDS.

Ayera mainta e prome presentacion di e musical RENT na Cas di Cultura a wordo presenta pa scolnan.

E musical aki ta wordo mustra rond mundo henter desde su prome show na New York den aña 1996, pero nunca un produccion di e musical aki a yega di wordo mustra na Aruba.

E musical ta sigui e storia di un grupo di artistanan cu ta lucha pa sobrevivi y crea nan arte na East Village, New York, den fin di añanan 80 y cuminsamento di añanan 90 despues cu e crisis di HIV/AIDS a tuma bida di hopi hende den e ciudad. Durante e anochi aki nos por a nota cu e hobennan tabata hopi entusiasma pa mira un musical Mericano pa prome biaha, te hasta nan tabata zwaai nan luz di telefon na momentonan cu e muziek tabata bira sentimental. Aunke cu un alarma a zona durante e presentacion, esaki no a stroba e ambiente den e sala.

E scolnan cu a wordo invita pa e prome mainta tabata Abraham de Veer, Colegio San Nicolas, EPI Unit Ciencia y Tecnologia y Colegio San Antonio. Mas scolnan lo wordo invita durante e maintanan cu lo sigui te cu diabierna, segun Vicky Arens, directora di Cas di Cultura.

‘Nos no tabata sa con e presentacionnan aki pa scol lo bay, pero nos ta mira cu e luganan a yena hopi lihe, pues nos por bisa cu e interes di parti di e scolnan ta grandi pa conoce e musical genre aki na Aruba’, sra. Arens a expresa na e matutino aki.

Durante e presentacion a purba envolve e studiantenan mas cu e musical pa medio di haci un sesion di quiznan unda e organisadonan lo haci un par di pregunta di trivia rondonando RENT. Esunnan cu contesta esey corectamente a haya chens pa gana un carchi pa presencia e presentacion final na Cas di Cultura.

Q&A

Mirando cu scolnan no por perde hopi ora di les pa bay wak un musical, Cas di Cultura y e produccion di e musical a haci un adaptacion di e obra original pa ta mas cortico. “E show mes ta dura 2 ora y 40 minuut. Nos a corta esaki y laga e highlights pa asina yega na un orario rasonabel di 1 ora y mey incluyendo e Q&A session.”

Durante e session Q&A studiante a haya chens pa haci pregunta na e actornan y tambe e team cu a yuda produci e obra. Algun studiante a puntra dicon nan a scoge pa bira actor of artista y tambe con esaki a sinta cu e famia di e artistanan. Di e banda di e actornan, Evan Maltby a expresa cu ‘mi ta kere cu e trabou aki ta uno hopi dificil pa eherce pues mi no lo por haci esaki sin e apoyo di mi famia’.

E actornan a reconoce e stigma cu tin encuanto eherce un profesion como actor, y e sintimento cu esaki no ta un trabou berdadero. Te hasta Lisa Johanson a reconoce cu esaki ta trece dificultad cu ne, pero ‘cu e trabou aki bo por crea un famia nobo en caso cu bo famia no ta acepta bo escogencia di sigui bo pasion’. Johnny Newcomb di su banda a expresa cu como actor. “Bo mester tin pasion pa loke bo ta haci, sin esey e trabou ta bira demasiado duro y lo bo no por enrikece bo mes. P’ami e ta trata di ta mi mes como actor, no di e placa of falta di placa cu lo por tin den e profesion.”

‘Nos mester realisa e embergadura di por wak Broadway na Aruba’

Docentenan di Abraham de Veer School Caroll Croes-Guiamo, Dina Thiel y Lilian Hernandez a comenta na Bon Dia tocante e organisacion di e evento. Segun sra. Croes-Guiamo, ‘e aspecto interactivo di e show mi ta kere tabata hopi bon na su luga, esaki a crea un esfera unda e muchanan por a ta mas activamente envolvi cu e show’. Cu esaki sra. Thiel a concorda, expresando cu ‘mi a mira cu e muchanan a haya mas interes pa sigui wak kico mas ta bin durante e show, te cu ora el a caba e muchanan a keda cu gana di wak mas’.

Esaki segun sra. Thiel lo posiblemente motiva e hobennan pa pasa wak e version ful ora nan wordo presenta riba november 1, 3 4, y 5. ‘Specialmente mi a haya e storia su tras importante, pasobra e tin di haber cu e epidemia di HIV/AIDS. Mi ta haya esaki sumamente interesante y informativo’, sra. Thiel a expresa. Finalmente sra. Thiel a expresa cu ‘nos mester realisa e embergadura di por presencia un show di Broadway na Aruba’.

Sra. Hernandez di su banda a expresa cu e tabata un experiencia nobo y ta curasha tur persona pa pasa wak e musical aki na Cas di Cultura. “Normalmente nos di akinan no ta yega New York pa bay wak un Broadway show, ami mes tin gana di bay presencia esaki despues di a purba un pida chikito di kico e lo por ta”.

Sra. Croes-Guiamo a finalisa pa expresa cu un aspecto sumamente interesante di e presentacion tabata cu na final e studiantenan a haya un chens pa realisa cu e actornan riba e podium a cuminsa mescos cu nan. “Asina e muchanan ta haya un sentido cu nan tambe lo por ta para riba un podium y bay rond mundo pa sigui nan pasion. E distancia entre nan y nan deseonan ta bira mas cortico”.

“No tur hende mester bira un abogado, of un dokter, bo por bira un artista y esaki tambe tin su balor”.

‘Nos no tin hopi cosnan cu ta pone LGBTQ na Aruba den luz’

Un studiante di Colegio San Antonio, Arshmainy Eckmeyer, e conta Bon Dia cu e nunca a yega di conoce e musical RENT ni Broadway en general. Sinembargo el a expresa cu ‘e show a conmove mi hopi. Na cierto momentonan mi a cuminsa yora pasobra e show a toca hopi situacion cu mi a yega di experiencia den mi bida’.

“Mi ta hopi feliz cu nos a haya chens pa bin na e presentacion unico aki, specialmente pasobra el a toca tematica di LGBTQ. Kinan na Aruba nos no ta mira hopi cosnan cu ta positivo pa personanan LGBTQ. E tabata un honor y bunita pa mira cu hende di afo ta bin comparti esaki cu nos. Mi conoce un persona cu ta lidiando cu e tematico aki. Despues di mira e show mi lo curash’e pa bin experiencia e show pa su mes”.