Finalmente tabatin sentencia di hues di Prome Instancia den e caso di ministro encarga cu deporte contra fundacion Lotto pa Deporte (FLPD). Y e resultado tabata loke por a spera, no solamente a base di e sentencia anterior den e caso sumario, sino tambe di otro caso reciente cu tin relacion cu reglanan di bon gobernacion pa loke ta nombramento y retiro di persona den puesto di responsabilidad den gobierno o entidad liga na gobernacion. Asina nos tabatin e sentencianan den casonan manera e retiro di e director di WEB, director di Utilities, e caso di director di Salubridad Publico, y e caso anterior di ministro contra Lotto pa Deporte.

Tin varios aspecto cu ta yama atencion, y un di nan ta cu e hecho cu un ministro, o otro persona cu posicion halto, tin e poder, o facultad, pa actua den un caso determina, no ta kita cu esaki mester sucede tumando na cuenta reglanan general di bon administracion o gobernacion. Realmente no ta tanto relevante si un entidad tin e reglanan aki hinca den un codigo di conducta o un codigo di bon gobernacion, den e sentido cu den un caso specifico den corte, hues mester evalua e comportamento a base di e reglanan general di bon administracion o bon gobernacion, tumando como punto di salida cu cualkier persona cu ta den un posicion di peso den un organisacion mester ta na altura di e reglanan aki.

Esaki a bin bon cla dilanti den e caso di Boekhoudt contra Utilities dilanti Corte Comun di e islanan, unda cu e Corte a critica e veredicto di e hues den Prome Instancia, cu no a tuma na cuenta e reglanan aki pa evalua e actuacion di directiva di Utilities, irespecto si e compania tin un Codigo di Good Governance, pasobra e mester a aplica loke na Hulandes yama ‘de algmene beginselen van deugdelijk bestuur’ cu ta parti di e sistema di norma hudicial Hulandes pa mas di un siglo caba. Cu esey nos ta bisa anto cu no ta importante pa un organisacion tin un tal codigo como guia pa su manera di opera tanto interno como externamente? Sigur e ta importante, den e sentido cu si bo a introduci esaki, y ta bisa cu esaki ta conta pa bo procede como dirigente, sigur bo no por bisa despues cu bo no tabata na altura.

Den e caso actual esaki tambe ta hunga un papel. Ta imposibel na e altura aki, cu e hurisprudencia creciente dentro di nos propio teritorio, y ademas di e otro partinan di Reino, pa pretende cu por ripiti e hazaña di gabinete Mike Eman 1 cu na 2009 a djis core cu tur hende cu tabatin un puesto den un fundacion, empresa estatal, y tur otro entidad liga na gobierno. Mientras nan na 2009 a logra e triki aki, na 2017 nan a hunga e wega mas sabi, y a uza otro triki, di cambio na ultimo momento di e statuutnan di e fundacion (FLPD) pa pone e gobierno nobo dilanti un ‘fait accompli’ manera e hues mes tambe a yam’e den e actual sentencia. Tambe e hues a nota cu cierto asombro, cu e abogadonan di e actual ministro no a haci uzo di e maneho fiho di Corte Comun, pa apela contra e cambionan den statuut di FLPD di ultimo ora. Un oportunidad perdi.

Loke si e mandatario concerni a haci, y aparentemente e kier insisti tambe den su manera di actua, ta cu ainda e ta kere cu pasobra e ta ministro, e por uza e facultad cu e tin na su antoho, sin cu tin limite riba esaki. Y e limitenan ey ta bon defini. Ora a tuma e decision di retira henter e conseho di supervision, e motibonan a base di cual a haci esaki no tabata bon, segun e hues. Por ehemplo, simplemente bisa cu un ministro mester por pone su ‘hendenan di confiansa’ na e puestonan unda tin otro hende sinta, no ta aceptabel mas como manera di proceder den uzo di e poder di decision pa un asunto den un organisacion, manera den e caso aki. Un mandatario por logra cu e actitud aki den un caso unda e persona perhudica asina opta pa no hiba e asunto corte. Den caso cu si e cana e caminda ey, mas y mas nos mandatarionan lo ripara cu no ta suficiente pa djis haci uzo di un poder, pero cu ta importante haci esaki tumando na cuenta cu mester tin un motibo valido, den cada caso individual.

Den tur esaki, e medaya tin dos banda. Hues a bisa bon cla cu e partidonan mester comunica cu otro tumando na cuenta reglanan rasonabel, y no a honra e peticion di e fundacion, cu tabata kier pa e ministro no molestia nan mas. Nan mester siña biba cu e realidad cu e ministro tin algo di bisa, cu nan mester adapta na su maneho y mester provee e informacion cu e mandatario mester pa haci su trabao, esta, controla si e conseho di supervision ta haci su trabao corectamente. Asina, por ta cu tin un futuro ainda tambe pa e ciudadano cu ta profesional, cu ta di confia, pero cu no ta ‘hende di confiansa’ di ningun politico…