Kico ta haciendo pa economia bay dilanti atrobe?
Diahuebs venidero Camara di Comercio tin un evento grandi atrobe, celebrando su di 85 aniversario y pa e ocasion aki a trece un orador di Fondo Monetario Internacional cu lo papia riba e tema di con pa incentiva economia. E evento bao di e nomber “From red tape to red carpet” ta pone enfasis un biaha mas riba necesidad pa haci Aruba mas atractivo pa e empresario, kitando proceduranan innecesario den gobernacion for di caminda.
Aña pasa caba, KvK a laga prof. de Vries haci un encuesta bao di empresario na Aruba tocante medidanan cu gobierno a tuma o lo bay tuma pa stimula economia, y tambe pregunta di loke nan mes como empresario lo a desea di mira realisa. E resultado no tabata mucho alentador pa e plannan di gobierno, cu tabata pone enfasis riba Aruba como ‘gateway’ entre Europa y America (Latino) y e concepto di Aruba como vanguardia den Caribe riba tereno di energia renoba. Tambe a introduci e zona fiscal special na San Nicolas cu no a produci practicamente nada te na e momento aki y no por conta cu tanto interes.
E deseo di e empresario tabata bay mas den direccion di simplificacion di procesonan burocratico y di sistema fiscal, y introduccion di sistema digital di comunicacion cu gobernacion. E siman aki nos por haya atrobe un ‘grito al cielo’ pa realmente haci loke mester haci pa Aruba ta atractivo pa inverti, y no solamente pa e inversionista internacional cu ya caba ta haya un ‘red carpet’ na e despachonan di e diferente ministronan, sino tambe pa e inversionista chikito y mediano na Aruba mes. Y esey ta necesario, pasobra despues di tanto aña cu nos ta papia regularmente tocante e necesidad di diversifica nos economia, nos por a mira cu nos a bay net den e direccion contrario. Tambe ta bira bisto cu no por lanta un pilar nobo economico ‘from scratch’ simplemente deseando esey.
Nos a mira e refineria cera, loke tabata un proceso logico y previsible. Pero na luga di sinta pensa kico lo por bin na su luga, a critica y ridiculisa Camara di Comercio pasobra nan tabatin e ‘osadia’ di indica otro rumbo pa San Nicolas, a base di e cantidad di otro actividad economico cu ta posibel riba e tereno inmenso aki, asina cu no tin un refineria mas na e luga. Awor, nos ta pega entre dos campo den e partido den gobierno, unda esun grupo no tin mas creatividad cu habri e refineria atrobe, y e otro cu no sa nada mas cu habri hotel grandi pa stranhero haya trabao. Mientras tanto nos a mira tambe practicamente henter e sector financiero offshore bay perdi, bao di influencia di reglamentonan nobo internacional cu a haci cu Aruba no ta hunga un papel mas den e sector aki.
Si no ta posibel saca un sector nobo for di sombre di mago, anto ta bira tempo pa realmente cuminsa move den direccion pa haci negoshi bira mas facil pa tur empresario, pero no solamente pa e grandinan cu di tur manera por paga abogado di categoria pa percura pa tur cos ta cana nechi pa nan. Nos mester simplemente mehora e posibilidad pa tur tipo di compania cu tey caba, por mehora nan operacion y bira mas eficiente y competitivo.
Y ora nos bay sinta pensa con pa haci esaki, nos mester ta consciente tambe cu na e momento aki, tur cos cu nos por pensa pa haci Aruba mas atractivo pa inversionista internacional, ta pensa y den cierto ta ser haci caba na otro islanan den Caribe. Den e sentido ey, nos mester tene na cuenta cu tur caminda, tur hende ta bay den direccion di mas turismo, y ta bay mas den crea condicion faborabel pa haya mas tanto inversionista bin nan pais, den cualkier sector. Manera nos a publica algun tempo pasa den e corant aki, tin hasta luga den Caribe unda nan ta ofrece nacionalidad na esunnan cu ta interesa di establece nan mes y inverti den e pais ey. Nos no ta kere cu na Aruba hamas nos mester yega asina leu, pero esaki djis pa duna un bista riba con fuerte e competencia den nos region ta.
Si nos kier haci e diferencia, anto e mester ta den otro asunto. Por ehemplo nos ta un di e teritorionan mas conecta y integra den mundo digital compara cu cualkier otro luga den Caribe. Y esey a pesar di cu gobierno den su maneho no ta laga ningun oportunidad bay perdi pa stroba sector priva den nan intentonan pa mehora y expande, solamente pasobra contra ’viento y marea’ ta purba salvaguardia loke a keda di e monopolio den telecomunicacion di Setar. Tambe den comunicacion aereo y maritimo tin hopi di haci, cu e vision corecto. Nos por tuma un bentaha, no ofreciendo condicionnan extravagante, pero door di ta competitivo riba e puntonan cu ta conta den trafico economico internacional.
