Nos mes por… Yega na eficiencia…?

Algun dia pasa un di nos redactornan a bay busca su numbernan di auto. Normalmente algo cu mester tuma lugar na inicio di aña pero culpando, atrobe, e crisis di Covid-19, a bira september promer cu a logra haya esakinan. No cu den e caso aki nan no tabata paga, esey a sucede na tempo na comienzo di aña.

E motibo cu a logra di haya e numbernan sin cu mester a para oranan largo den rij y den solo pa logra esaki, ta pasobra a habri e posibilidad pa traha un cita online y esey a haci cu e fila di warda tabata hopi mas cortico. Y si bo mes cumpli di bo parti percurando cu bo ta na ora pa bo cita, no tin ningun problema. En todo caso, no tin problema pa haya nan, aunke ta keda e pregunta pakico nos ainda ta pega na e sistema anticua aki di un desperdicio increible tur aña di aluminio di tur e numbernan obsoleto ey. Berdad ta cu nos a cambia caba pa un sistema di sticker, pero como siempre, cada gobierno ta bin cu su propio version di ‘innovacion’ y den cuadro di esaki nos a haya e innovacion di bolbe atras pa pasado.

Pero esey nos tur sa caba y no ta e proposito di e Editorial aki. Loke por a observa durante e bishita na e oficina di Impuesto ta cu bo ta entrega bo comprobantenan di pago di impuesto y di seguro di bo vehiculo(nan) y e funcionarionan ta bay busca nan den e rekkinan unda por cierto tin miles y miles di number ainda. Pero esey ta tampoco loke nos kier comenta. Loke mas a hala nos atencion cu ta e ora ey ta bay busca e numbernan… Si bo tin varios auto por dura basta tempo promer cu nan logra haya tur pa bo. Finalmente nan ta logra, pero mientras tanto henter e fluho a dal para… Y ta aki nos kier a yega: aki no conoce e idea di prepara trabao? Si bo ta laga hende bay online, y duna nan un cita un par di siman despues, no ta factible pa laga e funcionarionan busca e numbernan cu hende ta bin busca, di antemano pa cada fecha y pone nan cla pa esnan na loket por djis gara nan y duna e cliente? Asina por yuda hopi mas hende riba un dia… Pa no comprende nos malo, e trato di e empleadonan concerni ta amigable y cordial, nada di keha ey, pero organisacion di trabao ta pa nan hefenan haci, nos ta pensa. Obviamente aki a perde oportunidad pa haci un mihor trabao.

Nos ta relata tur esaki como un ehemplo chikito di con falta di organisacion di trabao ta impedi mayor eficiencia, algo cu sigur den gobernacion nos ta topa regularmente. Tambe nos ta haya e mesun asunto aki comenta den tur e comisionnan di evaluacion di ultimo trinta aña cu gobierno a institui y cu practicamente nunca a resulta den algo positivo. No cu no tabatin cambio den manera di traha den gobernacion, pero e cambionan ey tabata mas bien basa riba bon trabao di algun hende na nivel di direccion cu riba nan propio iniciativa a logra mehora algo. Pero ta parce cu tin algo magico y negativo cu ta impedi cu e tantisimo rapportnan cu a mira luz di dia den tur e añanan nos tras, pa despues pa eternidad nan bay for di luz di dia, terminando nan bida cortico y inutil den lachi di algun buro di un o mas funcionario.

Awor, por bien ta cu tin lector cu ta haya cu nos ta exagera e situacion aki, pero esey no ta asina. Laga nos duna un ehemplo. Den e intento pa yega na un plan di accion pa gobierno actual, unda segun nos promer ministro un par di cien hende a duna nan cooperacion gratuitamente, loke ta di aprecia, a dedica atencion tambe na e famoso ‘red tape’ cu mester bira ‘red carpet’. Aki a dedica atencion tambe na e problema grandi unda ta dura lunas promer cu por habri un negoshi. Papiando cu algun persona cu ta interesa den e materia aki actualmente, nan a keda sorprendi di tende di nos cu na aña 2013/2014 un grupo di funcionario publico di diferente departamento, fortifica pa hende di sector comercial, a haci un analisis completo di henter e trayecto di lanta negoshi, desde e momento cu bo bay notario te ora bo tin bo permiso(nan) den man y por cuminza opera. Tabatin un motibo pakico e intento ey a caba na e tradicional plato crioyo (aroz con coco) pasobra ora a yega na actua, tur cos a pega riba e falta di voluntad di e mandatarionan. Y, manera tur hende por comprende, si nan ta contra, nada ta move riba e isla aki.

Contal cu nos ta tanto aña despues y un grupo nobo y entusiasma a bay dedica nan bon energia na e mesun tarea noble aki. Tambe e Hulandesnan den nan condicion y plannan pa mehora gobernacion ta bin cu e mesun puntonan aki. E pregunta cu ta surgi cerca nos awor ta: lo ta logico pa taha e Hulandesnan di yuda nos, y bisa nan ‘cu nos mes por’?