Hopi persona ta usa nan manera di bisti como un manera di expresa nan mes y ken nan ta. Sinembargo, pa hopi persona, tin cierto aspecto di nan bistimento cu no ta haya hopi consideracion ni tampoco atencion.
Ora di cumpra paña, e ta hopi facil pa sinti nos mes atrai na nos color faborito, of un estilo di paña cu nos a mira riba otro persona of riba internet, y asina sinti nos mes motiva pa cumpra esaki. Sinembargo, tuma un decision basa riba e factornan aki no semper ta trece un bon resultado, of un resultado cu ta cumbini nos.
E manera cu nos ta bisti ta introduci nos prome cu nos boca haya e oportunidad di haci esaki. Pa e motibo aki, e ta importante pa bo paña no solamente ta e model adecua pa bo tipo di curpa, sino tambe pa esaki representa bo identidad y bo personalidad.
Di mesun manera cu nos tur a personanan unico, cu un personalidad diferente, nos bistimento tambe mester ta unico y di acuerdo na nos personalidad. Bo abo ta bisti e paña, no vice versa, e manera cu bo ta bisti mester representa bo persona di e miho manera posibel.
Bo bistimenta ta bay di acuerdo na bo estilo di bida, bo edad, bo tipo di curpa, entre otro.
Por ehempel, un persona cu tin un cierto personalidad un poco mas serio, posiblemente no lo sinti su mes comodo bistiendo un bistimento cu ta yamativo, pa motibo cu esaki no ta bay di acuerdo na su personalidad. Aunke cu posiblemente bo mira e tipo di vestuario aki riba otro persona y e mustra bon, ora cu bo dicidi di sea cumpra of comisiona un costurera pa traha un paña igual o similar, esaki no lo sinta mesun bon riba e persona di un personalidad mas serio, compara cu un persona cu ta mas alegre y social, na ken un vestuario yamativo of di colornan cu ta hala atencion lo sinta bon. Esaki no ta nifica cu un persona serio no por bisti di e manera aki, sino cu usualmente esaki por causa cu e persona por sinti su mes inconfortabel, of den cierto ocasionnan por trece comentarionan manera “e ta bisti straño” of “e paña a ked’e straño.”
Tambe e tipo di curpa ta hunga un rol ora di scoge nos vestuario. Tin cierto tipo y model di paña cu no ta keda mesun bon riba un persona cu ta mas diki, compara cu un persona cu ta mas delega, y vice versa, tin cierto paña cu ta mustra miho riba un persona mas diki, compara cu un persona cu ta mas delega. Personanan cu ta cortico, tambe mester tene na cuenta e largura di un paña, mirando cu cierto modelnan ta mara na un cierto largura, e paña por mustra miho riba un persona mas largo compara cu cortico, y vice versa tambe.
Si bo tipo di curpa uno ectomorph (straight), esaki ta nifica cu bo cintura no ta bon defini, cual ta haci cu pañanan cu ta duna e ilusion di un cintura defini, por trece mas forma na bo curpa, causando cu e paña lo accentua y duna un miho look. Por ehempel, si bo tin un shimis, haci uso di un faha cu ta pas cu e tema di e shimis, mara esaki na bo cintura, y asina bo ta crea un poco mas definicion na o tipo di curpa. Uso di e tactica ‘color block’ unda cu bo ta usa diferente colornan cu ta complementa otro, tambe ta yuda trece definicion na bo curpa.
Si bo curpa ta e tipo cu ta yama Mesomorph (hourglass), esaki ta nifica cu bo schouder y bo heup ta mas o menos mesun hancho, causando cu bo cintura ta defini caba. Si bo ta sinti cu bo cintura ta demasiado defini pa un tipo di model di paña of pa bo mesun gusto, e uso di colornan scur y strepi riba bo bistimenta ta yuda camufla y perde un poco di e definicion di bo cintura, pero si bo kier accentua bo cintura y haci bo curvanan mas prominente, un faha na bo cintura lo yuda cu esaki.
Si bo tipo di curpa ta manera un Endomorph (appel), unda cu bo schouder y heup ta mas o menos balansa, pero tog bo cintura no ta hopi defini, bo por balansa bo figura cu carsonnan of sayanan cu ta mas yen. Sigura cu e largura di bo blusanan ta yega net bao di bo heup, pa asina por duna ilusion di un cintura mas largo y defini. Uso di diferente capa tambe ta yuda crea un miho forma, manera uso di jacket of bachi cu ta accentua bo cintura y curvanan.
Ademas di e aspectonan personal, tambe tin e teoria di color cu mester tene na cuenta cune. Cierto ocasionnan ta mara na un color, y tambe tin cierto colornan cu no ta apropia pa un cierto evento, y tin cierto tipo di colornan cu a base di bo color di piel por haci bo ta mustra mas cla of mas scur di loke enrealidad bo ta.
En general, moda y estilo ta un topico sumamente amplio, unda cu tin un gran cantidad di factornan cu mester considera y tene na cuenta cune. Lo bunita di esaki ta, cu bo por crea un estilo unico pa medio di usa e factornan aki na bo beneficio, y combina varios diferente articulo y tips pa asina crea bo estilo unico, y expresa bo mes na un manera cu ta presenta bo persona hustamente manera bo ta. Econocemento di tur e diferente factornan aki ta duna nos e conocemento necesario pa asina crea un estilo cu ta accentua y trece dilanti lo miho di nos.
