Ora e refineria na San Nicolas ta bin den discusion, un di e argumentonan cu nos ta tende ta cu pasobra e area ta contamina cu petroleo, miho nos continua cu e actividad aki, ‘pasobra e tereno ey ta daña caba..” En bes di rechasa e pensamento aki, ban purba sigui su logica. Nos ta conclui anto cu, pasobra no por bin cu ningun actividad economico of otro destino sano pa e area di e refineria, nos mester busca, si no tin refineria mas, otro actividad cu ta contamina pa pone ey, pasobra ta esey lo por. Of, djis continua cu e refineria naturalmente. E pregunta ta e ora: nos por pone otro actividad mes dañino cu un refineria, pasobra contaminacion riba contaminacion no ta problema? Parce cu aki ta lubida cu contaminacion tin e mal custumber di bay otro caminda. Contaminacion no ta solamente crudo y otro substancia kimico cu ta penetra den subsuelo, pero e ta tambe huma toxico cu ta sali dia y anochi di e chemeneanan, cu ta afecta e pueblo y si biento ta hibe pa Colombia mes, e ta yuda aumenta contaminacion ambiental cerca nos bisiñanan, loke ta haci nos coresponsabel pa daña medio ambiente den otro pais. Y ya cu nos ta papiando di medio ambiente como un asunto mundial, nos no por core anto pa nos responsabilidad.
Awor, si nos ta insisti cu nos mester continua cu actividadnan toxico, pasobra e tereno di tur manera no ta sirbi pa nada drechi, ken di nos ta bay conta e poblacion di San Nicolas cu nunca mas, pa eternidad, nan por pensa di biba den un luga limpi, cu aire fresco, unda nan yiunan por bay scol y hunga pafo trankilamente, pasobra si no tin refineria mas, pa nan mala suerte esaki ta e luga apto pa dump otro actividad economico, cu ningun hende lo kier na otro parti di Aruba… Danki pa caba di insulta henter San Nicolas atrobe…
Nos por observa cu tur partido den parlamento, cu excepcion di un president cu ta pensa pa su mes, a vota pro pa e refineria habri atrobe. Ta facil pa politiconan grita cu nan ta ‘voor’ pero e asunto no ta asina simpel. E rehabilitacion di e refineria pa por funciona manera te cu tres aña pasa,ta exigi mas di 2000 miyon dollar, segun e experto Nelson English, cu oposicion mes a trece Aruba pa duna un magnifico presentacion. Tambe mester inverti biyones den pone mas di 50 kilometro di tuberia riba tera y bao lama pa haya acceso na gas natural for di Venezuela, y centenares di miyones den conversion di e refineria pa gas natural. Y tur esey pa logra opera un refineria mediocre cu no por produci gasolin y diesel di calidad? Un refineria cu ta produci principalmente nafta cu Venezuela mester na cantidad grandi pa por mescla cu nan crudo ultra pisa? Pakico tin di nos cu ta kere cu e compania yiu di PDVSA aki ta bin realisa e milagro cu Exxon no kier a haci na 1983/84, cu Coastal no por a haci, cu El Paso no por a haci y cu Valero no por a haci? Pakico nos ta kere cu un compania cu tin tres refineria na Merca (Valero tin 16) y tin un balor total di activo di menos di 10 biyon dollar y ta carga cu mas di 2,5 biyon dollar di debe, cu a fia den ultimo dos aña so pa regala PDVSA y e gobernacion mas fatal cu Venezuela a conoce, ta bay fia biyones mas pa inverti den un refineria di tercer categoria, cu no ta ni bira nan propiedad, pero cu nan ta bay lease?
Laga nos no lubida cu na 2013, ora PDVSA tabata negocia cu Valero pa start up e refineria pa produci nafta, tabata papia di 100 miyon dollar, cu PDVSA no tabatin y tabata desea pa Valero pone e placa. E deal no a sigui. Loke ta bay sucede awor ta parce continuacion di e scenario aki: Citgo no ta pone biyones, sino solamente un par di cien miyon pa por opera, y tur e otro storianan bunita di conversion pa gas y conversion pa un refineria ‘berde’ ta bay resulta promesa falso. Venezuela ta bay logra haya e nafta barata cu nan mester y esun cu ta keda sinta cu e sushedad y e tarea pa desmantela aki tanto aña, ta Aruba mes. Y esun cu mas ta paga e cuenta, ta e poblacion di San Nicolas cu por bay biba den huma atrobe. E politiconan responsabel pa esaki lo bisa: “pero no ta esey bo a manda nos haci? Wel paga awor!
Si nos ta pro refineria o contra, esey ta un cuestion di opinion cu mutuamente nos mester respeta. Pero kico di patrimonio di nos pais lo entrega pa yega na reapertura, esey ta e asunto clave cu mester ta tema di debate continuo. Cu cierto preocupacion nos por observa cu mas bien e discusion ta ken a percura pa e refineria habri, no kico gobierno ta regalando pa e por habri.
