Anticipando e celebracion di Pasco Grandi, Minister di Salud Publico, Cuido di nos Grandinan y Deporte, dr. Carlos “Alex” Schwengle a sorprende tur hende na San Pedro De Verona, St. Michael Paviljoen, Centro di Cuido San Nicolas y Maris Stella na Savaneta cu un dushi bolo pa asina nos grandinan por disfruta durante e dianan aki di fiesta.
Coordinador di SABA Playa, Ivy Goeloe a remarca cu nan ta hopi orguyoso di a haya esaki. Diaranson e dia a bay hopi bon y nan tabatin actividad di egg hunt na San Pedro De Verona y grandinan a gusta esey hopi. Dos di e grandinan a gana premio y nan a keda masha contento cu esey. Diahuebs na St. Michael Paviljoen tabatin actividad di egg hunt y e cuidadonan di nos grandinan a canta cu nan y pasa un rato placentero. “E bolo a wordo corta pa nan diahuebs”, Ivy Goeloe a conta.
Asina diahuebs tambe a sigui e celebracion na Centro di Cuido na San Nicolas, unda Guchi Dancers a baila pa nos grandinan, den compania di “mama” y “reina” di cultura. E evento a tuma luga den e sala “Nos Neishi”, cu mayoria di e 50 clientenan presente. Claro cu e bolo a cay den masha bon tera y a pas net cu e celebracion. Na Maris Stella tambe a tuma e bolo cu brasanan habri, pendiente pa nan celebracion diadomingo riba Pasco Grandi.
“Ta mi intencion di sigui haci e bishitanan aki. Nos a inverti hopi den infrastructura pa nos grandinan y nos tin hopi mas pa inverti tambe. E intencion ta pa promove mas independencia den nan cuido, unda nan por keda den casnan isola, pero riba tereno di e casnan di cuido, cu ayudantenan cerca pa duna nan un man”, asina Minister dr. Alex Schwengle a duna di conoce. “E bolo, aunke tin un poco sucu aden, ta net pa e celebracion. Leu a leu mester por, no hopi si”, e mandatario a termina bisando cu un sonrisa riba su cara.
