E boletinnan noticiero recien den nos sector di energia combina cu e black-outs nacional y local a pone mi sinti pa skirbi un articulo con pais Aruba por produci coriente completamente renobable cu ta 80% mas barata cu nos ta paga awo dentro di 5 aña, y con por crea un modelo nobo di relevancia pa Elmar N.V. y habri un industria nobo di traha Hydrogen Green+.

Heavy Fuel Oil di Venezuela pa Baha Prijs di Coriente

Como ciudadano di pais Aruba, mi ta sinti un berguensa asina profundo ora mi wak un Minister traha un video y post e cu yen di fanfaria cu lo baha prijs di coriente usando HFO di Venezuela. Dus letterlijk usando energia di mas sushi cu ningun hende kier, di un pais cu ta sanciona y ta viola derechonan humano basico riba un nivel diario. Si ami tawata Minister di Energia lo no por ni wak mi mes mas den spiel.

Tur esaki pa mantene control y un monopolio anticua cu ta Utilities mientras cu anos como henter pueblo ta sufri den forma di coriente y awa caro y inflacion secundario.

Prijs di Energia Solar
Segun un reportahe oficial publica na Reuters, e prijs di panel solar di mas nobo a cay cu 42% den 12 lunanan cu a pasa. Na Aruba panel bieu di aña pasa ya caba, awe ta duna un return-on-investment di mas cu 30%. Esaki ni papiando di e panelnan mas experimental basa riba Perovskite. Usando un paper cientifico di Bastiani et al. 2023 (Energy Environ. Sci., 2023,16, 421-429). E panelnan solar den futuro cercano (dentro di 5 aña) por produci coriente pa 3 cen US per KwH. cu ta mas cu 85% mas barata cu e tarifa awo di Elmar N.V.

Awo cu e hermentnan aki disponibel nos como pais ta bay usa HFO??? Esaki ta completamente ilogico.


Excess Energy

Den futuro cercano e problema na Aruba lo ta cu prijs di coriente lo ta asina barata y lo tin tanto produccion di mas cu nos mester pensa kico lo bay haci cu tur e “Excess Energy” di mas aki. Den e ramo aki por usa tur e electricidad berde aki pa produci “Green Hydrogen”. Esaki lo tin 2 bentaha sumamente grandi.

E Hydrogen lo funciona como grid stabilizer cu por wordo usa pa stabilisa e grid. Den tur dos situacion: Ora tin dimas coriente esaki lo bai e planta di Hydrogen y produci esaki cu e coriente excesivo. Na momentonan cu tin di menos coriente e Hydrogen por wordo mobilisa pa mantene e voltahe na nivel adecua.

E Hydrogen “Green” aki lo por wordo exporta na tur sorto di pais full rond mundo. Creando un pilar nobo economico y entrada directo pa Gobierno.

E Stappenplan

Awo ta skirbi un articulo publico pa full pueblo di Aruba y vooral nos Parlamentarionan puntra den manera hopi serio dicon nos no ta usa e don grandi cu Aruba tin cual ta su Solo y ta dicidi di kima HFO di un pais cu ta viola derechonan humano. Simpel pa beneficia gobierno y so monopolio anticua den energia. Wel e monopolio aki ta 100% morto awe caba, awo e pregunta ta con nos por crea un relevancia nobo pa Utilities N.V. wel nos baha prijs di coriente y inflacion pa full pueblo dentro di 5 aña.

Ban papia den terminonan duidelijk kico Gobierno ta suppose di haci:

Papia cu fondonan nacional & internacional pa cu e transicion di energia aki. MinEZ ta haciendo hopi bon cu Aruba Investment Summit. Tremendo, awo ban bin cu accion y fondonan pa ehecuta esaki.

Bin cu financiamento pa panel solar a-la-DUO di Hulanda: Mescos debe di estudio cu ta sin interes y cu mester wordo paga den un termino di 20 aña plus. Haci mesun cos pa full pueblo Aruba. Bo kier instala un 10Kw sistema di panel solar na bo cas. Well ata bo financiamento di 0%. Mesun cos cu e financiamento di un estudio na Hulanda.

Bin cu Open Flex Markets. E sistema di tarifa constante ta uno asina primitivo cu mester update esaki cu mercadonan di coriente full open y transparente unda e prijs ta update cada minuut y unda abo por kies ki ora pa bende of cumpra bo coriente. Wak paisnan manera Australia pa cu esaki den terminonan concretisa.

Usa e exceso di coriente pa hydrogren. Un sistema di back-up, grid stabilizer y export den 1.

Cada momento cu Gobierno ta kies pa no stima pero te hasta bringa e revolucion solar, cada un di nos ta sufriendo directamente. Ban baha prijs di coriente y crea pilar economico nobo.