Aruba a manece, pa di tantisimo ovez, cu un caso di usurpacion di tereno publico, canto di lama, unda un empresa hotelero ta laga nan propiedad atras riba tereno publico, di e manera ey strobando publico en general di haci uso di e beach, segun nan derecho legal. E pregunta ta si mester warda te dia autoridadnan haci nan trabao, algo cu nunca ta garantiza. Sin embargo, tin otro manera pa regla e asunto.

Mas di cincuenta aña pasa tabatin un situacion parecido na e suceso actual dilanti St Regis Hotel. E tempo ey dilanti Aruba Caribbean Hotel gerencia di e empresa ey a haya un bon idea pa pone un heki te den lama, pa asina stroba pasada di hende, local y turista, cu e claro obhetivo di limita presencia di hende cu no tabata nan huesped riba e beach dilanti nan hotel. E experimento no a dura tanto; di mes hende tabata drenta awa y pasa riba e parti dilanti e hotel, y ademas un grupo di hoben tabata sistematicamente subi pasa riba e heki, di manera cu dentro di poco tempo el a debilita y sucumbi. Algun confrontacion cu security cu tabata kier implementa orden di nan superiornan no a yuda drecha ambiente y lo a hiba gerencia di bay busca apoyo cerca gobierno, suponiendo di ta den nan derecho pa stroba pasada di hende. Nan a sali decepciona ora a haya tende cu nan mester mantene e regla di no pone nada riba beach cu ta dentro di e limite di 10 meter di e ‘hoogwaterlijn’ bay paden. Esey ta e parti publico cu mester keda habri semper. E hotel a dicidi di kita e obstaculo completamente. Awendia mayoria di nos hendenan no ta na altura di loke a pasa tanto aña pasa; nos si sa ainda.

Segun nos, e regla ey ta vigente ainda. Si e hotel den e caso actual ta haya cu nan tin derecho di pone parasol riba tereno publico, esey no ta asina y ta significa cu un persona, local o un huesped di otro hotel, por bay sinta eynan tranquilamente pasobra nan no ta riba tereno di e hotel. Claro cu, como nos ta hende pacifico, nos no a trece e experiencia di pasado pa invita incidente o agresion, y e mihor manera pa evita esey ta pa autoridadnan concerni tuma rienda den e asunto aki y regla esaki manera nos reglanan legal ta stipula. Caso contrario, no mester ta sorprendi si tin ciudadano cu toch kier haci uso di nan derecho.

Nos costa y lama a atrae nos atencion den otro sentido tambe. Nos por a tuma nota di un relato di nos ministro demisionario encarga cu entre otro Naturaleza, unda e ta boga pa un seguro pa nos piscadornan, cu den caso di un calamidad por perde loke nan tin inverti pa por realiza nan actividad economico. Nos ta kere cu por ta un bon iniciativa, pero tin un opinion diferente den con mester atende e asunto. Pa cuminza, ta parce nos necesario cu e mandatario mester tin su prioridadnan defini. Tin varios otro tarea den e area di naturaleza cu ta hopi mas importante y lo ta bon si e ta boga pa e siguiente gobierno atende eseynan como prioridad. Ta straño cu e ministro ta menciona e National Climate Resilience Council of Aruba, institui aña pasa, hopi laat, pero ‘mas vale tarde que nunca’, pero no ta pone e trabao di e conseho aki como prioridad number uno. Pakico esey? Pasobra Aruba ta carece di un institucion cu ta abarca un equipo profesional cu ta recolecta y analiza dato di diferente indole, pa nos por tin un idea kico ta estado di nos naturaleza y kico ta e prioridadnan pa atende di inmediato. Pa specifica esaki mas: nos tin dato di varios aña, con serio y na unda e areanan di mayor deterioro ta, tanto riba tera como den lama? Manera nan ta bisa na Hulandes: “Meten is weten.” Si bo no tin dato obhetivo, di hopi diferente indole, bo ta bay keda pega den trabao elogiable, pero cu no ta avanza di e nivel di e ‘dede di advertencia’ cu ta bay laira de vez en cuando, manteniendo e fase ‘bon intencion’.

Y, ohala si nos tin e tipo di informacion aki, pa negativo cu e ta, por fabor comparti esaki cu comunidad. Mientras cu talvez awor nos ta haya e reaccion di: “Claro, esey mester,” nos ta desea di adverti seriamente cu esey no ta e practica di nos autoridadnan, di cualkier color politico. Semper e scondemento di e tipo di informacion aki a prevalece y solamente den algun caso nos ta topa cu ciudadano consciente cu ta dicidi di kibra e silencio tan venera den gobernacion. Ehemplo di esaki ta e caso di e rapport encuanto e casi desaparicion di calco na e costa pabao di Aruba, cu a yega na nos man como medio, pasobra un persona valente a dicidi cu tabata basta cu secretismo gubernamental.

Pa nos bolbe na e asunto di sigura piscador: tin cierto tipo di riesgo cu en general gobierno sa asumi, pasobra no ta factible pa laga esaki na sector priva – compania di seguro – pa atende. Den e caso aki nos ta mira cu, si tin un calamidad cu ta afecta piscador di forma serio, probablemente lo tin otro ciudadano cu tambe ta sufri daño grave. Nos ta duda cu cualkier gobierno lo tin tanto gana pa bay discuti e tipo di scenario aki awor, si no ta den un contexto hopi mas amplio.