Nos coral den estado precario ta menasa nos economia

Bon Dia Aruba ya a publica riba e efectonan di e desaster ecologico si nos coralnan lo bira extendi. Sinembargo e consecuencianan ta mas grandi como cu esaki tambe lo afecta nos economia drasticamente.

Investigacion cientifico ya ta mustra cu nos coral ta den un situacion precario. Y cu e maneho actual cu Aruba ta hibando ta sigui deteriora e estado di e coral. Esaki no ta algo cu ta toca Aruba so, pero tambe e otro islanan Hulandes Caribense. Manera nos a skirbi e situacion ta mustra cu si nos no ta hiba un maneho mas activo pa conserva e coralnan y preveni cu awor nan ta muriendo, aki 30 aña e situacion ta irevocabel. Esaki ta nifica entre otro cu nos lama lo bira asina sushi, como cu alganan veneno lo crece, cu ta bira hopi dificil pa keda landa den dje. Tambe nos beachnan cu santo blanco lo wordo afecta como cu e coralnan den e sistema ecologico ta percura pa nan keda blanco.

E investigacion aki entre otro ta algo cu a conduci na un Delta Plan cu bou guia di profesor Han Lindeboom di Universidad di Wageningen na Hulanda ta tumando su forma. Cu e plan aki e profesor kier uni e colaboracion y sosten den Reino pa combati e problema mas eficiente. E profesor lo bin Aruba atrobe y riba 11 di october 6.30 pm na MFA Noord lo duna un presentacion di e Delta Plan.

E charla ta organisa pa Koninklijk Instituut Van Ingenieurs (KIVI), un instituto di ingeniero cu tambe tin miembronan na Aruba. Sinembargo nan ta bisa den nan relato cu publico en general tambe por atende e charla.

E profesor y e instituto kier enfatisa cu e situacion di coral den e region aki no ta un problema ecologico so, pero tambe uno cu ta desastroso pa nos economia cu ta depende di turismo. Y e tambe ta afecta e industria di piscamento. Problemanan principal nan ta mira cu ta afecta e coralnan ta erosion, piscamento (di mas), desaroyo robes di nos costanan, contaminacion. Mester entre otro mehora e sistema di procesa awa sushi (riool) y tambe restaura e populacion di pisca, pero tambe yega na un desaroyo mas sostenibel di nos costanan.

 Cu e Delta Plan nan kier inicia accion, nan ta bisa. Tin basta proyectonan caba, nan ta india sinembargo nan ta fragmenta y isola. Y asina no ta yega na e meta final pa preserva y restaura e coralnan.

Den mundo tin mas areanan unda coralnan a muri y asina ta causando situacion fastioso. Entre otro e ‘red tide’ unda alganan cora cu ta hopi malo pa salud (hasta por muri di dje), ta afectando e lamanan.