Diadomingo ultimo, Cruz Cora a realisa su “Charity Bazaar” cu a conta cu sosten di comunidad. E miembro di e organisacion internacional aki na Aruba, Sra. Marieta Wanopa a declara na Bon Dia Aruba cu e tipo di actividad aki ta yuda pa Cruz Cora lo por sigui cu nan pakete di ayudo cu nan ta trahando diariamente pa e miembronan di nos comunidad den necesidad.
“Tur loke nos ta haya di entrada, kiermen loke e hendenan cumpra y bay cun’e, nos ta duna mas tanto pa e muchanan specialmente esunnan cu ta sin pamper y sin lechi”, el a bisa. Tambe el a laga sa cu hopi artefacto y articulonan di prome necesidad den un hogar, Cruz Cora ta sigui yuda e hendenan aki, danki na nos contribucion.
Sra. Wanopa a bisa na e medio aki cu e necesidad ta grandi di e hendenan cu ta bay bati na porta di Cruz Cora pa ayudo. Nan ta haya diariamente hendenan cu ta bin pa ayudo. Den e caso aki e ta aclaria cu nan no por bisa cu e hendenan aki no tin necesidad. “Nan tin necesidad, pasobra nos tambe ta bay na nan cas y nos ta wak e necesidad cu tin”, el a bisa.
El a laga sa cu nos tin cu compronde cu economicamente y mundialmente y no solamente na Aruba, Cruz Cora actualmente ta lantando pa haci campaña pa asina yuda e poblacionnan. Den e caso specifico di Aruba –el a señala- cu Aruba no tin fabrica grandi cu nos por acudi pa alimento. P’esey den e forma di e “Charity Bazaar” nan ta eherce bek. Nan ta obtene fondo pa bay cumpra e alimentonan pa asina yuda nos poblacion mas vulnerabel.
Calamidad social
Cruz Cora como un organisacion internacional cu un trayectorio y prestigio grandi, semper ta wordo caracterisa pa ta presente den e sitionan caminda ta wordo presenta calamidad. Dios a spaar Aruba di sufri un calamidad grandi, pero e ta haya cu e calamidad cu nos pais ta pasando actualmente ta e calamidad social.
“E parti social ta hopi grandi. Y nos mester acepta esey y nos mester trata di yuda tambe, y esey nos ta haciendo”, asina e veterano miembro di e organisacion humanitario aki na Aruba a bisa.
Segun sra. Wanopa, e ayudo cu Cruz Cora ta brinda ta incondicional. Hopi persona y hopi instancia ta kere cu Cruz Cora ta traha solamente pa asistencianan. E ta aclaria cu e pensamento aki no ta cuadra cu berdad, ya cu nan ta traha diariamente cu problema, y e problema no mester ta cuminda of paña solamente.
El a declara cu e problema lo por ta entre otro, nan intermediacion pa personanan cu no ta haya contacto directamente cu departamentonan, Cruz Cora ta yuda nan. “Hopi biaha personanan no sa unda pa bay, y nan ta bin cerca nos, y cu gusto nos ta yuda”, el a declara na e matutino aki.
El a haci enfasis cu ora e ta papia cu Cruz Cora ta brinda su ayudo na nos comunidad, e ta referi cu e ayudo aki ta en general, ya cu nan ta un organisacion cu no ta haci niun sorto di discriminacion.
“Cruz Cora no tin discriminacion, nos no mag”, el a bisa categoricamente. Na final, sra. Wanopa a laga sa cu Cruz Cora ta amplio pa tur nacionalidad cu ta yega y bati na nan porta.
