Diahuebs pasa nos por tabata testigo di un tremendo show di patriotismo, amor eterno pa bandera, himno y Betico, mientras cu e observacionnan negativo den direccion di Hulanda a bira incontable. Si nos a comprende bon, a bira tempo pa nos pone tur cos na nan lugar, entre otro loke tin di haci cu e tan afamado ‘autonomia’, palabra cu ta aparece tur caminda pa enfatisa cu nos, ciertonan entre nos, realmente, no ta ‘tuma mas humiyacion.’

A bira ora pa tuma loke ta di nos, y ‘para e metemento den nos asuntonan’… Palabranan fuerte cu ta haci hende corda e momentonan prome cu un final di un campeonato profesional importante ta bay cuminsa, y e coach ta lansa su ultimo cartucho, cu ta su ‘peptalk’ prome cu su atletanan subi cancha. Un ambiente di sobresalto, merecedor di un miho causa. Pakico nos ta bisa esaki? No pa menosprecia e sentimentonan di esnan envolvi, cu segun nos impresion ta kere sagradamente den e mision cu nan a formula pa nan mes. Sin embargo, ta nos tarea pa balora e mision ey, y yega na conclusion si e ta valioso, no solamente pa e actornan den e caso aki, sino tambe pa esnan cu ta paga pa nan representacion parlamentario, y esey ta e ciudadano comun y coriente.

Y ban ta franco cu otro: mientras e specialistanan huridico ta saborea e sucedido di diahuebs den parlamento como algo ‘unico’, aunke lo tin diferente opinion kico e ‘unico’ ey ta encera, e ciudadano comun y coriente no ta al tanto di e detayenan, y mucho menos di e necesidad y sentido di e debate tocante supervision financiero. Al menos, esey ta nos impresion, y nos tin motibo pa pensa esaki. En corto, esaki di mes no tabata un tema cu ta genera hopi atencion publico, y e poco audiencia riba tribuna ta testigo di esey. Loke tabatin su bentaha tambe pasobra no tabata necesario pa pidi publico pa stop di haci desorden, loke na varios ocasion sa ta bastante diferente.

Di banda di oposicion tambe no a duna tanto atencion na e asunto, den e sentido di a limita nan mes den haci uso di nan tempo pa papia. Talvez esey na e momento ey tabata un di e poco cosnan sensato cu nos a mira e dia ey. Y di otro banda, ta dificil pa defende un ley troci cu a surgi como un alternativa pa otro opcion cu tabata menos atractivo ainda, aunke cu nan lo tabata mas corecto y di acuerdo cu nos Constitucion y Statuut. Nos no ta biba den un mundo perfecto y e ley di supervision financiero crea na 2015 ta e bibo ehemplo di esey. Pero, loke nos te ainda no ta comprende, ta kico tabata e meta – positivo – di e ehercicio cu a tuma lugar den parlamento. Nos te awor ta mira e hecho obvio cu e ehercicio legislativo aki a sirbi pa satisface orguyo herida di varios parlamentario, cu no a gusta cu gobierno anterior a hinca nos den e situacion di supervision di Hulanda/Reino aki. Esey por ta bon pa nan personalmente, pero kico ta e utilidad cu tur esaki tin pa e pais y pa pueblo en general?

En realidad nos no a mira nada mas cu un ambiente di ‘nos ta bay siña e ma…..nan ey ta ken nos ta’. Pero ningun hende a sinta pensa un rato kico e asunto aki ta bay trece, den sentido positivo, y tambe e eventual efectonan negativo? Esaki lo no ta un exigencia normal den cada caso di crea legislacion? Y, si nos ta papiando di crea legislacion como tarea primordial di un parlamento, ta posible pa splica kico lo tabata e beneficio pa pueblo en general di henter e operacion aki? No ta pesey nos tin un Conseho Consultivo (Raad van Advies) pa conseha y guia den e situacionnan aki? E pregunta cu a keda, cerca varios hurista di taya den e pais aki, ta ken a sinta pensa e cosnan aki? Y, atrobe, cu ki meta?

Loke nos a keda cune, ta un pida legislacion totalmente inutil cu no ta bay yuda nos niun stap mas leu den direccion cu nos mester bay, y esey ta: guia gobierno riba e caminda cu ta hiba nos mas pronto posible na un situacion financiero saludable den gobernacion, asina mas pronto posible nos por libra di e supervision Hulandes. Pero esey ta exigi un parlamento critico cu no ta bay na Amen di e gabinete sin mas. Esey ta rekeri cu mester cuminsa cuestiona e rumbo financiero, unda nos ta mira solamente estudio di con ta saca mas placa for di economia, pero nos no ta mira practicamente nada ta sucede pa baha gasto. Di e manera aki nos ta pone un crecemento economico hopi fragil na riesgo, desanimando inversion local y stranhero, sin practicamente ningun medida positivo pa haci e clima di negoshi mas atractivo, al contrario. Nos ta tende nos parlamentarionan ta lanta voz contra esaki? Of nan tambe ta haya cu ta simplemente mahadera di un par di empresario cu pa nan no tin relevancia? Goberna ta algo otro cu inventa legislacion inutil.