Nos a keda pega… Cu energia sostenible…?

Nos mester bisa cu nos no tin pura pa bolbe na e dianan di propaganda caro pa cantidad di proyecto di energia renovable di e gabinete anterior. Di otro banda, a bira hopi keto riba e tereno aki. Nos no ta mira ni tende di plannan nobo pa combati e situacion cu nos ta aden kimando heavy fuel oil dia aden dia afo pa percura cu nos tin energia electrico den tur hogar y tur lugar di trabao. E urgencia a desaparece? Asina leu cu nos sa, e plannan mundial, y di nos tambe, pa kier logra un planeta mas sostenible den e añanan cu ta bin, no a cambia, al contrario, nan a bira mas urgente.

Saliendo for di e punto di vista cu no tin hopi persona entre nos cu ta kere den e actitud di ‘denial’ di e actual presidente Mericano, cu ta kere cu tur e problema di calentamento di mundo ta algo inventa pa radicalista di izquierda cu ta purba pa haci nos bira preocupa pa algo inexistente, lo ta logico pa pensa cu nos tin nos dilanti un tarea continuo, por lo menos te cu 2030, pero realmente despues di esey tambe. Nos ta haya e sentimento cu nos mandatarionan y e departamentonan cu mester ta ocupa cu esaki a tuma un break. Naturalmente ta importante pa termina e asunto di nos presupuesto pa e aña aki, pero si tabatin un planificacion a largo plazo, anto lo nos tabatin mas vista riba e asuntonan riba cual mester sigui traha, mientras cu ta atende asunto di recurso financiero di gobierno.

Segun nos opinion, e impasse actual den e asuntonan aki tin tur cos di haci cu e falta di claridad unda nos ta bay. Ehemplo bibo di esaki ta e situacion alrededor di e refineria. Mientras cu nos por scucha cu poco poco ta yegando na un solucion di e convenio cu PDV Holding y su subsidiarionan bao di e denominacion Citgo, realmente no tin un vista ainda riba kico ta bay pasa despues. Ora caba di regla e asunto, nos ta bay en busca di un partner nobo pa evalua posibilidad pa habri e refineria atrobe…Really? Tin ora nos ta duda si ta di berdad e afan di e gobierno aki ta asina grandi pa mira San Nicolas hogando den huma atrobe, o cu ta haci henter e propaganda aki djis pa kita e contrincante politico for di caminda, cu no ta haci nada mas cu lamenta cu nan ‘deal di oro’ cu e delicuentenan cu a secuestra e pais bisiña a cay na awa. Si nan tabata na poder ainda, lo nan tampoco por a salba e refineria, pasobra e tabata insalvable caba di hopi aña atras.

En todo caso, si ta asina cu pa motibo politico so ta keda maha tocante e refineria, anto den cierto sentido e ta un preocupacion menos, pero na mesun momento e ta haci cu no por tin un debate real di kico nos por haci na San Nicolas, cu ta e lugar principal y prioritario unda e plannan innovativo mester haya nan concresion. Y e plannan ey lo mester bay hopi mas leu cu loke por haci cu e tereno di refineria. Atrobe, y nos no ta keda sin menciona esaki ‘time and again’: nos mester un plan di re-desaroyo di henter un ciudad cu pa 40 aña ta den un slump economico y social.

Pero pa bolbe na e tema di energia, nos miedo ta cu tanten no ta cera e capitulo di e refineria, no ta bay busca alternativa pa substitucion di fuel oil pa produccion di electricidad, y nos produccion di coriente lo keda na mesun caminda cu e ta pa hopi aña, a pesar di e intentonan pa haci e produccion mas eficaz. E critica tocante e uso di e fuel oil mas barata, y mas contaminante, a para un poco, pero nos a haya tende cu lo ta cumprando combustible di mihor calidad? Tambe riba tereno di aplicacion di otro forma di genera energia, di fuente renovable, nos no ta tende tanto mas. Esey no ta malo pa esnan cu a protesta contra e yegada di un parke di molino na Alto Vista, pero e siguiente pregunta, kico si nos ta bay haci, no a haya contesta.

Di otro banda, maneho di energia renovable no ta solamente un asunto di gobierno. Tuma por ehemplo e fila enorme di vehiculo tur tereno cu bao di un boroto di otro mundo y sacando huma y produciendo igual cantidad di stof, ta cuminsa bira un desesperacion pa hopi hende cu ta biba riba nan ruta. Y no pa papia mes di con por ta cu no ta haci nada cu e daño cu nan ta causa den naturalesa. Pa cuminsa, sikiera por prohibi e vehiculonan di tin motor di gasolin y duna e companianan un tempo pa nan pasa pa usa solamente vehiculo electrico. Tur parti di mundo nan ta pensando caba den e direccion aki. Ta pakico anto nos aki tin un preferencia asina selectivo di loke nos ta acepta di e mundo moderno aki?Aki poco dia ta 18 di maart atrobe, y hopi di nos ta bay duna prueba di nan amor patrio. Berdad nos ta stim’e asina hopi?