Diabierna pasa tabatin dos anuncio grandi envolviendo nos sistema hudicial. Esun cu a haya mas atencion tabata e veredicto di Hoge Raad encuanto derecho di contrae matrimonio pa pareha di mesun sexo. E otro tabata e sentencia di Corte di Husticia pa e Islanan, cu a trata e caso Avestruz den apelacion di ambos banda pa un parti di esnan envolvi dilanti Huzgado di Promer Instancia. No tabata un sorpresa cu e caso aki a haya menos atencion publico; nos no sa sigur cu por papia di un cierto cansancio, o inmunidad pa noticia tocante mandatario cu ta haci negoshi cu gobernacion envez di eherce nan tarea manera ley ta prescribi. Si esey ta e caso, nos tin un problema como comunidad, pasobra di tur manera nos no mester yega na e punto unda un mayoria ta pensa cu tur politico ta corupto y no ta importa mas ta ken pone na e puestonan di reponsabilidad aki. En todo caso ta importante pa medio di comunicacion haci nan trabao y sigui reporta di forma obhetivo tocante e tipo di suceso aki.
E sorpresa grandi den e sentencia pronuncia siman pasa tabata cu Corte di Husticia no a bay di acuerdo cu punto di vista di e huez anterior, cu a condena e sospechoso principal, e ex-ministro di Planificacion, Desaroyo Teritorial y Integracion, actualmente parlamentario pa e partido democrata cristian, na solamente un aña, descartando varios di e acusacionnan haci. Corte a honra e exigencia di 48 luna di prison di Ministerio Publico, cu e diferencia cu un aña di e cuatronan lo ta condicional. Esaki ta significa cu Corte si a considera e pruebanan treci dilanti di caracter contundente, pa yega na e castigo imponi. Cu esaki e caso probablemente no a termina; ta parce logico cu e politico lo busca apelacion cerca Corte di Casacion (Hoge Raad) na Hulanda. Esey por resulta na un resultado final na 2026, mirando e practica di caso dilanti e corte di ultimo recurso aki. A resalta tambe cu algun otro acusado importante a haya castigo di prison mas halto, corespondiendo cu esun halto di e ex-ministro. Cu esaki ta parce cu Corte di Husticia a considera positivamente e acusacion di existencia di un organisacion criminal, encabeza pa e actual parlamentario, algo pa cual e anterior huez tabata haya cu no tabatin prueba.
Pakico esaki ta un punto asina importante? Pa varios motibo; uno ta cu esaki ta e di dos caso di delincuencia, condena caba, den di un ministro na Aruba, unda por mira e fenomeno di un organisacion criminal encabeza pa e mandatario. Algo incomun cerca nos, pero si nos sigui noticia di por ehemplo nos continente, por tuma nota cu esaki ta un practica cu den hopi caso ta yega te na corte na varios pais. Esey ta implica cu nos a pega cu un enfermedad contagioso di nos continente? Nos no sa di unda e afan ta bin pa varios di nos mandatarionan subi e caminda di corupcion den nan funcion; mas importante ta cu e t’ey y por lo pronto no lo bay tampoco. No mester lubida cu nos tin varios caso di mesun caracter na caminda ainda, cu por desemboca den persecucion hudicial.
Kico ta haci pa mehora?
Otro motibo pa considera gravedad di e casonan aki ta cu si nos ta keda confronta cada vez cu caso di set-up di organisacion criminal, specialmente den e ministerionan cu ta maneha permiso, tin algo structural eyden cu no ta anda bon. Loke ta trece e siguiente pregunta: kico ta haci pa mehora control administrativo pa minimiza e posibilidad di corupcion, explicitamente na nivel halto? Muy probablemente nos lo haya como respuesta rapido cu gobierno actual ta trahando duro riba introduccion di codigo di bon gobernacion, loke ta un bon iniciativa pero cu no ta remedia e situacion fundamentalmente, y hasta por sirbi como cobertura pa no introduci medida contundente den e curazon: e procesonan administrativo. Como cu e maximo responsable pa e mehoracion referi ta e propio Promer Ministro, lo a pensa cu e lo a duna ehemplo den e proceso aki, ya cu el a tuma rienda di un di e principal trayectonan ‘canceroso’, esun di emision di tereno. Nos a mira investigacion a tuma lugar contra e director di e departamento ey, cu a desaparece for di mapa sin cu ta conoci cu ta suspendi e ta of no. A nombra un director interino cu ta encarga cu… kico? Loke ta importante pa comunica na comunidad, banda di critica dirigi contra anterior ministronan cu tabatin e cartera di Infrastructura y Planificacion, kico ta e mehoracion structural cu ta su contesta como mandatario riba tur e fayonan cu e administracion lo tabata sufri te na su intervencion? Ademas, e urgencia pa haci algo concreto ta e hecho cu corupcion a keda continua den e gabinetenan cu el a, y ta dirigi. Esey ta implica anto cu no ta simplemente un problema di ‘norma y valor’ cu tabata algo desconoci pa e partido cu a goberna anterior na su entrada, pero ta parce un cancer cu ta keda afecta cualkier cu ta den e puesto. Esaki ta pasobra keto bay, a pesar di tur critica y lamento cu e anterior mandatarionan tabata genio di maldad, e procesonan administrativo ta keda brinda oportunidad di haci negoshi cu propiedad di pueblo? Por ta cu e menos interes publico pa e casonan hudicial aki tin su raiz den e hecho cu hende ta realiza cu ‘no ta haci nada toch’? Banda di lema di ‘good governance’, kico mas ta haci?
