Minister di exterior Noruego a bisa cu Rusia ta tras di un atake riba sistema di e-mail di parlamento di Noruega na augustus, yamando e intrusion ‘un incidente serio cu ta afecta nos institucion democratico di mas importante’.

“Nos evaluacion ta cu Rusia ta tras di e actividad aki”, minister di exterior, Ine Eriksen Soereide a bisa.

Prome minister Erna Solberg a bisa agencia noticiero Noruego, NTB ayera cu tabata ‘importante pa gobierno duna un mensahe cla na e Rusonan cu nos no ta acepta esaki’. “Ta p’esey nos ta bisa claramente cu nan ta tras di e robo aki”, Solberg a bisa NTB. “Mester wordo condena.”

Den un post riba Facebook, embahada Ruso na Oslo a rechasa e acusacion, bisando cu ‘no a presenta evidencia’ y cu ‘acusacionnan asina ta inaceptabel’. “Nos ta considera loke a pasa como un provocacion serio intencional, destructivo pa relacionnan bilateral”, e embahada a bisa.

Parlamento Storting di 169 miembro a bira victima dia 24 di augustus ultimo di loke a describi como ‘un atake cibernetico coordina’ y ‘a hack e cuenta di e-mail di un cantidad chikito di parlamentario y miembronan di personal’, segun Marianne Andreassen, cabesante administrativo di e asamblea. El a bisa cu a download varios cantidad di data.

E atake cibernetico, cu a ser para inmediatamente, a ser reporta na polis. E servicio di seguridad di e pais. PST tabata investigando esaki.

E parlamento despues a bisa cu ‘por a perde’ informacion priva, manera number di seguridad social, informacion di banco y otro informacion personal, y data di contacto y trabao politico preparatorio.

E dos pais ta comparti un frontera terestre di casi 200km, y ta atravesando un momento di desacuerdo den lunanan recien.

Berano ultimo, tanto Moscu como Oslo a expulsa un diplomatico cada un, despues cu a cera un ciudadano Noruego den prison na Noruega bao acusacion di spionahe industrial pa Rusia. E spion sospechoso a ser aresta na un restaurant na Oslo dia 15 di augustus. E sospechoso ta rechasa e acusacionnan.

Un inspector di frontera Noruego pensionado a ser sentencia na Rusia na 2019 na 14 aña den prison pa spionahe. El a ser aresta na Moscu na december 2017, y acusa di colecta informacion tocante submarino nuclear Ruso pa inteligencia Noruego.

Na november 2019, inspector Frode Berg tabata parti di un intercambio di spion na momento cu e y dos ciudadano di Lithuania a keda libera a cambio di dos Ruso cu tabata cera na Lithuania. Mientras cu a entrega Berg na embahada di Noruega na Vilnius despues cu el a crusa den Lithuania, e intercambio di spion a tuma luga na un checkpoint di frontera cu e exclave Ruso di Kaliningrad.