Nort Korea a modernisa su armanan nuclear y misilnan balistico door di viola sancionnan di Nacionnan Uni, usa atakenan cibernetico pa yuda financia su programanan, y continua buscando material y tecnologia den exterior pa su arsenal, incluyendo na Iran, segun expertonan di Nacionnan Uni.
E panel di expertonan monitoreando sancionnan na e nacion den nort oriente Asiatico, a bisa den un reporte manda na e miembronan di e Conseho di Seguridad dialuna cu Nort Korea su ‘hortamento total di bienes virtual for di 2019 te november 2020 ta balora na aproximadamente $316.4 miyon”, segun un pais no identifica.
E panel a bisa cu su investigacionnan a haya cu actornan cibernetico vincula na Nort Korea a continua conduciendo operacionnan na 2020 contra institucionnan financiero y casnan di intercambio di moneda virtual pa genera placa pa sostene su programanan di armanan di destruccion masivo y misil balistico.
E expertonan anteriormente a reporta riba e participacion continuo di Iran den e Corporacion di Comercio di Desaroyo di Mineria di Korea, e principal traficador di arma y principal exportador di bienes y ekipo relaciona na misil balistico y armanan convencional cu ta bao sancion di ONU.
Den e reporte nobo, e expertonan a cita un pais no identifica bisando cu Nort Korea y Iran a ‘reanuda cooperacion riba proyectonan di desaroyo di misil di alto rango, cual ta bisa ta inclui transferencia di partinan critico, cu e envio mas recien asocia cu e relacion aki na 2020’.
Iran a contesta dia 21 di december 2021, cu ‘revision preliminar di e informacion cu e panel a provee na nos ta indica cu por a usa informacion falso y datonan fabrica den e investigacion y analisis di e panel’, e expertonan ta bisa.
E expertonan tambe ta bisa cu gobierno di Kim Jong Un tambe a produci material fissile – un ingrediente esencial pa produci arma nuclear – y a mantene su facilidadnan nuclear. “A mustra un sistema di misil balistico nobo di rango corto, medio, lansa pa submarino y intercontinental na paradanan militar”, nan a bisa. “A anuncia preparacion pa test y produccion di warhead di misil balistico nobo y desaroyo di armanan tactico nuclear, y mehoracion di su infrastructura di misil balistico.”
E panel a recomenda pa Conseho di Seguridad impone sancion riba cuatro Nort Koreano: Choe Song Chol, Im Song Sun, Park Hwa Song, y Hwang Kil Su.
E Conseho di Seguridad a impone sancionnan cada bes mas fuerte riba Nort Korea desde su prome test di explosion di un aparato nuclear na 2006. A prohibi mayoria di exportacion di e pais y a limita su importacionnan severamente, purbando di presiona Pyongyang pa bandona su programanan nuclear y di misil balistico.
Pero e resumen di e reporte y algun hallazgo clave y recomendacionnan, obteni pa AP, ta laga cla cu Nort Korea ta continua capaz di evadi sancion y desaroya su armanan y ilicitamente importa petroleo refina, haya acceso na canalnan di banco internacional, y ehecuta ‘actividadnan cibernetico malicioso’.
Arsenal di Nort Korea a escala te bira un menasa mayor pa Merca despues di test na 2017 cu a inclui detonacion di un supuesto warhead termonuclear y vuelonan test demostrando cu su ICBM por alcansa profundamente den continente Americano.
Un aña despues, Kim a inicia diplomacioa cu Sur Korea y presidente Mericano e tempo ey, Donald Trump, cu a faya na 2019 na momento cu e Mericanonan a rechasa exigencia di Nort Korea pa mayor reduccion di sancion a cambio di un acuerdo simbolico parcialmente entregando su capacidadnan di arma nuclear.
Aña pasa, economia destrui di Nort Korea a deteriora mas ainda durante pandemia di Covid-19, cu a conduci cu Kim a cera frontera di e pais. Esey a limita severamente e transferencia legal y ilegal di bienes y movemento di hende, segun expertonan.
Na un conferencia politico Nort Koreano, Kim a critica fuertemente e agencianan economico di su gobierno pa pacifismo no specifica y ‘tendencianan auto-protector’, segun medionan di comunicacion estatal a reporta ayera. Su comentarionan ta yega despues di un congreso di partido luna pasa den cual el a haci un yamado pa mayor control di estado riba e economia, mientras tambe ta priminti pa continua esfuersonan pa reforsa su programa nuclear, cual Nort Korea ta mira como un disuasorio pa Merca y pues un siguransa pa existencia continuo di dinastia Kim.
Cu su esfuersonan diplomatico fayido, Kim mester cuminsa di nobo cu presidente Joe Biden, kende anteriormente a yam’e un ‘thug’ y a critica Trump pa espectaculonan di cumbre na luga di reduccionnan nuclear significante.
Na augustus 2019, e panel di ONU a bisa cu expertonan cibernetico di Nort Korea ilegalmente a obtene bienes ‘calcula na hasta $2 biyon’ pa financia su programanan di arma.
E panel a bisa den e reporte nobo cu a investiga actividadnan ‘malicioso’ di e Reconnaissance General Bureau – e principal agencia di inteligencia di Nort Korea, cu ta riba lista preto di sancionnan di ONU – incluyendo ‘atake riba bienes virtual y proveedornan di bienes virtual, y atakenan riba companianan di defensa’.
Nort Korea ta sigui laba cryptomonedanan horta, specialmente mediante brokernan di bienes virtual na China, pa adkiri placa fiat cu tin sosten di gobierno, manera dollar Mericano, e expertonan a bisa.
E panel a bisa cu ta investigando un hack na september 2020 contra un intercambio di cryptomoneda cu a resulta den robo di cryptomoneda na balor di aproximadamene $281 miyon, y e transacionnan riba e blockchai a indica cu e hack di $281 miyon ta relaciona na e segundo hack di $23 miyon na october 2020.
“Analisis preliminar, basa riba e vector di e atake y esfuersonan subsecuente pa laba e placa ilicito ta sugeri fuertemente cu tin lasonan cu e DPRK’, e expertonan a bisa usando e siglanan di e nomber oficial di e pais (Republica Democratico Popular di Korea).
Segun un pais no nombra, Nort Korea tambe ta sigui genera entrada ilicito door di explota plataformanan di tecnologia di informacion freelance, usando e mesun metodonan cu ta usa pa haya acceso na sistema financiero global – identificacion falso, uso di red virtual priva (VPN), y estableciendo companianan front na Hong Kong, e panel a bisa.
E expertonan a bisa cu nan a investiga intentonan pa viola e embargo di ONU riba arma, incluyendo accionnan ilegal di companianan riba lista preto. Nan a cita e Corporacion di Comercio di Desaroyo di Mineria di Korea, supuesto cooperacion militar di Nort Korea, y e uso di e misionnan diplomatico di e pais den exterior pa propositonan comercial.
E panel a bisa cu tambe a investiga ‘e importacion ilicito continuo di petroleo refina via entreganan directo y transferencianan di barco-pa-barco, usando evasion elabora’.
A cita imagen, data y calculacion di un pais no identifica mustrando cu entre dia 1 di januari y dia 30 di september aña pasa, Nort Korea a ricibi envio di productonan di petroleo refina excediendo ‘varios biaha’ e limite anual di 500mil bari poni pa Conseho di Seguridad.
Sancionnan di ONU ta prohibi exportacion di carbon Nort Koreano, y e panel a bisa cu ta mustra cu a suspende exportacion di carbon desde fin di juli 2020.
A bisa cu aña pasa, Nort Korea a continua transferiendo derechonan di pesca den violacion di sancionnan, cu a resulta den ganashi di $120 miyon na 2018, segun otro estado miembro.
Bao un resolucion di sancion di 2017, tur ciudadano Nort Koreano trahando den exterior mester a wordo repatria pa dia 22 di december 2019. E expertonan a bisa cu a investiga trahadonan Nort Koreano generando entrada den Africa sub-Sahara como tambe trahadonan di tecnologia di informacion manda pa e Departamento di Industria di Municion.
