(AP)—Nort Korea probablemente a enrikece suficiente uranium pa construi un cantidad di “double-digit” di bom y ta haciendo progreso den su esfuersonan pa desaroya misilnan mas poderoso y preciso contra rival Sur Korea, segun e agencia di spionahe na Seoul a conta legisladornan ayera.
E reunion parlamentario di e Servicio Nacional di Inteligencia a bin despues cu Nort Korea a ofrece un bisto den un facilidad secreto pa produci uranium apto pa uso di arma na comienso di luna mientras lider Kim Jong Un a reitera su meta pa aumenta “exponencialmente” su deposito di arma nuclear.
E agencia di Sur Korea a evalua cu e revelacion di Kim di e facilidad tabata probablemente un declaracion di desafio contra Washington prome cu e eleccion presidencial y diseña pa demostra domesticadamente su logronan militar en medio di dificultadnan economico, segun Lee Song-kweun, un di e legisladornan cu a asisti e reunion.
Ora a puntra tocante e capacidad di combustible pa bom di Nort Korea, e agencia a bisa cu e pais tin probablemente 70 kilogram di plutonium y un cantidad no specifico pero considerable di uranium apto pa arma cu lo ta suficiente pa construi arma di “un cantidad di double-digit”, Lee a bisa.
Mientras cu e media estatal di Nort Korea no a revela e sitio di e facilidad di uranium cu Kim a bishita dia 13 di september, e agencia Sur Koreano a bisa cu e lo ta probablemente den Kangson, cerca di e capital di Nort Korea, Pyongyang, segun Park Sun-won, un otro legislador cu a asisti e reunion.
Hunto cu e compleho nuclear principal di e Norte den e ciudad di Yongbyon, e planta di Kangson ta un di e dos sitionan conoci den Nort Korea cu a ser conecta cu actividadnan pa enrikece uranium. Algun analista ta bisa cu Nort Korea lo probablemente tin otro sitionan scondi pa e enrikecemento di uranium.
E bishita di Kim na e sitio a precede un test di misil algun dia despues, mientras e pais ta sigui gaba su capacidadnan di arma en medio di confrontacionnan cu Washington y Seoul. E media estatal di Nort Korea a bisa cu e testnan di lansamento dia 18 di september a envolvi dos tipo di misil nobo—un diseña pa entrega warheads convencional y e otro un misil crucero “strategico”, un termino cu ta implica cu el a ser desaroya pa atakenan nuclear.
E reportahenan di e testnan ta sugeri cu Nort Korea tabata mehorando e capacidadnan di e armanan, cual ta diseña pa logra atakenan preciso riba obhetivonan Sur Koreano, manera e legisladornan a resumi.
Algun analista ta specula cu Nort Korea por purba aumenta presion riba Washington por medio di conduci un test nuclear prome cu e eleccion presidencial Mericano. Pero e agencia Sur Koreano a evalua cu Nort Korea por warda riba test nuclear pa despues di e eleccion mirando cu tin otro stapnan cu e lo kier purba prome, manera un test pa misilnan di distancia largo dirigi riba Merca of lansando un satelite militar, segun Lee.
