Nort Korea ayera a acusa oficialnan Mericano di mantene hostilidad contra Pyongyang a pesar di un relacion ‘special’ entre lider Kim Jong Un y presidente Donald Trump, y a urgi Washington pa actua ‘cu sabiduria’ den temporada di fin di aña.
E declaracion di consehero di Ministerio di Relacion Exterior, Kim Kye Gwan, claramente tabata referi na un deadline di fin di aña poni pa Kim Jong Un, pa administracion di Trump ofrece terminonan mutuamente aceptabel pa purba di salba nan diplomacia.
“Contrario na e pensamento politico y intencion di presidente Trump, circulonan politico na Washington y legisladonan DPRK (Democratic People’s Republic of Korea, e nomber oficial di Nort Korea) di administracion Mericano ta hostil na DPRK sin motibo, preocupa cu e mentalidad di Guera Friu y prehuicio ideologico”, Kim Kye Gran a bisa den un declaracion. “Nos kier mira con sabiamente Merca lo pasa fin di aña.”
Negociacion nuclear entre Washington y Pyongyang a stop desde e collapse di e cumbre na februari entre Kim Jong Un y Trump, unda e banda Mericano a rechasa e demanda Nort Koreano pa alivio mas amplio pa sancionnan a cambio di un acuerdo pa entrega parcialmente su capacidadnan nuclear.
Nort Korea a haci un serie di test di misil di rango corto mientras Kim Jong Un a bisa cu e lo ‘warda cu pasenshi te fin di aña pa Merca bin cu un decision cu curashi’.
Washington y Pyongyang a resumi discusion na nivel di trabou na Suecia e luna aki, pero e reunion a caba cu e Nort Koreanonan yamando e palabracionnan ‘enfermiso’ y acusando e Mericanonan di mantene un ‘actitud antiguo’.
Kim Kye Gwam a bisa cu Kim Jong Un ta considera su relacion cu Trump como ‘special’ y cu e confiansa entre ambos lider ainda ta intacto. “Mi ta spera sinceramente cu tin motivacion pa sobrepasa tur obstaculo entre DPRK y Merca, y pa avansa e relacionnan bilateral den un miho direccion basa riba un relacion cercano.”
Kim Jong Un a firma declaracionnan pidiendo ‘desnuclearisacion completo’ di e peninsula den su reunionnan cu Trump y presidente Sur Koreano, Moon Jae-in desde aña pasa. Pero e actitud di e Nort den ultimo lunanan a lanta preocupacion si Kim Jong Un algun dia boluntariamente lo entrega su armanan nuclear, cual e ta mira como e garantia mas grandi pa su sobrevivencia.
Pa decadanan, Nort Korea ta pushando un concepto di desnuclearisacion cu no tin ningun parecido cu e definicion Mericano, cu Pyongyang primintiendo di sigui desaroyo nuclear te ora Merca retira su tropanan y e paraplu nuclear protegiendo Sur Korea y Hapon.
