(AP) — Nort Korea ta restaurando postnan di vigilancia di prome linea cu a desmantela durante e ultimo periodo di acercamento inter-Koreano, segun ehercito Sur Koreano a bisa dialuna, despues cu animosidad a aumenta entre e rivalnan pa motibo di e lansamento di satelite spion recientemente di e Nort.
E dos Korea anteriormente a desmantela of desarma 11 di nan post dentro di nan frontera altamente fortifica, yama e Zona Desmilitarisa (DMZ), bao un acuerdo na 2018 cu meta pa alivia confrontacion militar di prome linea. Pero awo ta den peliger di destrui e acuerdo, mientras ambos Korea abiertamente ta menasa di viol’e.
E acuerdo di 2018 ta rekeri pa e dos Korea stop vigilancia aereo y ehercicionan cu arma real na zonanan di no-vuelo y buffer cu a establece riba e DMZ, como tambe elimina algun di nan post di prome linea y minanan di tera. E acuerdo a laga Sur Korea cu 50 post na frontera y Nort Korea cu 150.
Despues cu Nort Korea a bisa di a pone su prome satelite spion militar den orbita dia 21 di november, Sur Korea a bisa cu ta suspende parcialmente e acuerdo y ta reanuda vigilancia aereo riba e DMZ como respuesta. Sur Korea a bisa cu su respuesta tabata “un medida defensivo minimo” pasobra e lansamento ta mustra e intencionnan di e Nort pa reforsa monitoreo di e Sur y mehora su tecnologia di misil.
Nort Korea a critica e decision di e Sur, bisando cu lo desplega armanan poderoso na e frontera den un medida di represalia. E Nort a bisa cu tampoco ta bay sigui atene na e acuerdo di 2018.
Ministerio di Defensa Sur Koreano a bisa den un declaracion ayera cu a detecta Nort Korea construyendo postnan di vigilancia na sitionan di e frontera unda antes tabatin e postnan cu a desmantela, y cu e Nort a desplega trupa y arma pisa eynan. E ministerio a distribui na noticieronan potretnan di soldadnan Nort Koreano construyendo un post di vigilancia y moviendo loke ta sospecha di ta un recoilless rifle na un trench recien construi.
Presidente Sur Koreano, Yoon Suk Yeol a duna orden pa ehercito continua observando e Nort di cerca y keda prepara firmemente, segun su oficina. Ministerio di Defensa Sur Koreano despues a bisa cu ta cla pa “rapida- y fuertemente castiga” Nort Korea pa cualkier provocacion.
Sur Korea, Merca y otronan fuertemente a condena e lansamento di satelite di e Nort, cual nan ta mira como un provocacion cu ta menasa paz regional. Resolucionnan di Conseho di Seguridad di Nacionnan Uni ta prohibi cualkier lansamento di satelite Nort Koreano pasobra e cuerpo mundial ta considera nan un forma encubierto pa test su tecnologia di misil di distancia largo. Nort Korea ta bisa cu tin derecho soberano pa lansa satelite spion pa anda cu loke nan ta bisa ta menasanan militar escalando dirigi pa Merca.
Dialuna, Kim Son Gyong, un oficial senior di ministerio di Exterior Nort Koreano, a yama e condenacion di Merca y otronan pa cu e lansamento di satelite “un expresion tipico di e violacion mas mahos y descarado di soberania cu ta rechasa e hustificacion di existencia” di Nort Korea.
Oficialnan Sur Koreano a bisa cu nan a confirma cu e satelite Nort Koreano a drenta den orbita. Pero nan ta bisa cu nan mester mas tempo pa verifica cu e satelite ta funcionando normalmente.
Medionan estatal Nort Koreano a bisa ayera cu a mustra lider Kim Jong Un potret saca pa e satelite spion di un facilidad militar Mericano na Guam. Medionan estatal anteriormente a bisa cu a presenta potret di satelite na Kim di basenan militar Mericano na Hawaii y sitionan clave na Sur Korea. Nort Korea no a publica e imagennan di satelite aki.
Riba potret: Soldadnan Nort Koreano ta instala nan post di vigilancia na e DMZ, den un potret sin fecha cu ministerio di Defensa Sur Koreano a provee.
