(AP) — Nort Korea a test lansamento di un par di misil balistico capaz di alcansa Hapon riba diadomingo, den un posible protesta contra e adopcion di Tokyo di un strategia di seguridad nobo pa pusha pa mas ofensiva contra Nort Korea y China.
E lansamentonan a yega dos dia despues cu Nort Korea a bisa cu a realisa un test clave necesario pa construi un misil balistico intercontinental mas mobil y poderoso, diseña pa alcansa continente Mericano.
E dos misil a biaha for di e area Tongchangri den nort west di e pais na un altitud maximo di 550 kilometer prome cu aterisa den awa entre e Peninsula Koreano y Hapon, segun gobiernonan Sur Koreano y Hapones.
Vice-minister di Defensa Hapones, Toshiro ino a critica Nort Korea pa menasa e seguridad di Hapon, e region y comunidad internacional. Comando Indo-Pacifico Mericano a bisa cu e lansamento ta destaca e impacto desestabilisador di e programanan di arma Nort Koreano. A bisa cu e compromiso di Merca pa defende Sur Korea y Hapon ta keda fuerte.
Algun experto ta specula cu Nort Korea ya tin misilnan nuclear funcional cu por alcansa henter Merca y su aliadonan Sur Korea y Hapon, mirando e cantidad di aña cu a inverti den su programa nuclear. Pero otronan ta bisa cu e pais ainda falta añas pa adkiri armanan asina, notando cu ainda no a proba publicamente cu tin e tecnologia necesario.
