Profesor Mirko Noordegraaf di Universidad di Utrecht durante e charla ‘Public Leadership in Post-truth Times’ na Aula di Universidad di Aruba a enfatisa cu den dia di awe, liderazgo ta ‘imposibel’, pero indispensabel. Ciudadanonan mester por exigi calidad di gobernacion mas halto, maske menos y menos sociedad ta enfoca riba echonan y mas riba imagen y storianan bunita.

E evento, cual ta e di number 6 den serie di eventonan y charlanan duna pa Aruba Institute for Good Governance & Leadership (GG&L), tabata enfoca riba trece na luz e desaroyonan contemporaneo di liderazgo den sector publico y cua retonan esaki ta enfrenta. Den ultimo tempo, segun profesor Noordegraaf, tin un movemento di populismo y falta di confiansa dirigi na elitenan di sociedad. Banda di esaki tin un fenomeno di politica ‘post-truth’, esta cu politica ta basa su mes menos y menos riba echonan y argumentonan funda. E simbolo mas grandi di esaki actualmente – cual Noordegraaf a aludi na dje pero e audiencia a completa e pensamento – ta presidente di Merca Donald Trump.

Trump ta e simbolo pa e extremo unda un lider ta completamente absorba den su propio interes sin tene cuenta cu otro interes, mientras Noordegraaf a referi na prome minister di su propio pais Mark Rutte, kende den pasado e profesor a bisa a mustra falta di liderazgo fuerte. “Ambos ta liderazgo destructivo. Nos lidernan mester ta honesto cu nos y bisa francamente na publico cu no tur cos ta posibel”.

Rol di universidadnan pa reforsa democracia y impacto den comunidad.
Durante e charla a enfoca tambe grandemente riba e rol di universidadnan den crea impacto positivo den comunidad por medio di envolvimento y vigilancia pa desaroyonan politico y social. Noordegraaf a indica cu na su universidad nan ta purba yega na esaki por medio di tin un departamento multidisciplinario enfoca riba impacto den sociedad. E ta mira cu despues di 10 aña di Faculty of Arts and Science (FAS) na UA, tin desaroyonan cu e ta wak cada biaha cu e ta sorprende di wak y ta indica cu Universidad di Aruba ta bayendo den bon direccion. Un di e desaroyonan aki ta e instituto cu a organisa e charla na unda Noordegraaf a papia mes, GG&L.

DRH ta mira desaroyo unda ta rechasa consehonan basa riba ley y maneho.
Durante e anochi un otro persona a contribui na e charla di Noordegraaf, esta Marielle Meaux, kende ta duna conseho legal bou Departamento di Recurso Humano (DRH). Meaux a indica cu den su experiencia, e ta mira un desaroyo unda politica ta haya conseho basa riba ley y maneho, pues e parti racional, pero ta pidi e departamento pa cambia e conseho pasobra esaki no lo ta un decision ‘popular’. Meaux a comenta bisando cu di e manera aki por mira cu liderazgo y gobernacion ta bira menos tocante echonan y mas riba popularidad of riba crea un opinion faborabel. “Tin un presion social riba politiconan pa cumpli cu peticionnan emocional di comunidad”, Meaux a bisa.

Nota di redaccion: E topico aki ta bira mas interesante si observa e recien diferencia di opinion entre e partido mas grandi den coalicion, MEP, y e ex parlamentario cu awo a bira independiente, Daphne Lejuez. E conflicto principal tabata basa riba e proyecto di ley di Serlimar, cual pa e parlamentario no tabata suficientemente funda, den e aspecto cu ta bay cuminsa cobra un impuesto pa un compania estatal, sin duna cuenta na e parti financiero cu ta motiva e necesidad aki, segun e parlamentario. Ademas den e ley segun e parlamentario no lo tabatin ningun siguransa cu Parkietenbos lo bay cera. Hasta durante su conferencia anunciando su retiro, e parlamentario a indica cu den su concepto ta purba uza ceramento di Parkietenbos como un ‘hook’ emocional pa asina tilda cualkier opositor na e ley como un persona sin consenshi.