Nominado pa premio Grammy pa Gospel casi baha for di avion pa canta

(NewYorkTimes) – Un cantante di gospel a haya su mes menasa di wordo baha for di un vuelo di Delta Airlines despues cu el a nenga di stop di canta riba e avion, pasobra, el a bisa, e tabata “haci loke Señor” a bis’e pa haci.

E cantante, Bobbi Storm, a post un video riba su cuentanan di rednan social mustrando e y un auxiliar di vuelo discutiendo trankilamente pasobra Storm tabata kier canta den e avion prome cu despega y e auxiliar tabata kier pa e keda keto.

E video, cu ta dura cuatro minuut, a ricibi critica online di esnan acusando Storm di ta causa interupcion. Pero tambe a ricibi aplauso di otronan, pa loke Storm a post otro dos video splicando kico a pasa y pakico el a scoge pa canta. “Ora nos yega fin di e vuelo, nos ta papia riba telefon, papia cu bisiña, tin biaha nos ta grita den avion, pues kico ta e problema cu puntra hende y nan bisando mi dal bay, pa comparti algo di cual mi ta orguyoso, algo cu Dios a haci pa mi, cu resto di mundo,” el a bisa den un video.

No tabata cla na ki momento e vuelo tabata, unda el a origina, ni unda e tabata bayendo.

Den e video, Storm ta bisa e otro pasaheronan cu el a caba di keda nomina pa dos Premio Grammy. E no ta nomina individualmente, pero el a canta cu Maverick City Music, cual ta nomina pa e Premio Grammy 2024 pa Miho Album Gospel y cu otro artistanan pa Miho Presentacion/Cantica Cristian Contemporario.

E grupo, cu a gana cuatro Premio Grammy na 2023, no a responde inmediatamente na un solicitud pa comentario.

Den e video, mientras Storm ta papia cu otro pasaheronan, e auxiliar ta bin puntr’e “bo ta capaz di keda keto?” Despues cu e par ta argumenta brevemente, e auxiliar ta bisa “si bo no ta capaz di sigui mi instruccion, bo no ta bay tuma e vuelo aki,” pa loke Storm ta contesta cu “si esey ta e caso, e ora esey ta bon.”

Despues cu e auxiliar ta cana bay, Storm ta canta su single nobo, We Can’t Forget Him cu un stem abao pa e pasaheronan, y e auxiliar no ta interveni.

Delta a bisa den un declaracion cu tabata den contacto cu Storm. “Pa seguridad di nos cliente y tripulacion, ta importante pa semper sigui instruccion di e tripulacion,” a bisa.