E nombramento di Charleson Oduber den Hunta di Aruba Tourism Authority a lanta hopi discusion riba e termino ‘Friends and Family.’ Sr. Oduber ta un persona capacita, kende ta traha na FCCA. Pero e pregunta cu a lanta y tabata circula den weekend tabata dicon mester nombra otro famia di mandatarionan den funcionnan asina clave. Sr. Oduber ta primo di Minister di Turismo, Dangui Oduber.

E comentarionan cu a yega na Bon Dia Aruba ta cu e nombramento ta enfatisa e nocion cu otro personanan cu mesun capacidad nunca lo haya e oportunidad, tanten cu tin miembronan di famia cu por haci e funcion.

Prome Minister Evelyn Wever Croes a sigura cu Gobierno ta mantene su mes na reglanan di integridad y cu e ley screening Ministers ta bisa bon cla cu no por pone famia den funcionnan crucial. Minister di Integridad, Ursell Arends a declara enfaticamente cu den Gabinete Evelyn Wever Croes II no tin e fenomeno di ‘friends and family.’

Na 2021, Parlamento a aproba e ley Integridad Ministers (Landsverordening houdende regels betreffende de integriteit van kandidaat-ministere en ministers), basa riba e concepto cu promocion di integridad administrativo ta di importancia esencial, cu promocion di integridad administrativo ta den e acuerdo di Gobernacion, cu ta specifica cu introduccion di un ley cu ta regla e screening di Minister, y cu evita corupcion y bon funcionamento di e pais ta depende entre otro di integridad di esnan cu ta carga responsabilidad politico. Den e ley a cuminza pa bisa ken ta e miembronan di famia cu ta cay bao di e ley. Nan ta casa of partner, como tambe yiunan y nan partner of casa, yiunan di crianza y nan casa, y mayornan di e candidato.

Prome cu e ley specifico aki tabata traha cu e decreto nacional (landsbesluit) di 2013, unda articulo 4 ta papia cu e candidato pa Minister mester duna formador informacion di tur su interes comercial y financiero, como tambe di esnan di su miembronan directo di famia y asina cu ta posibel, di tur miembro di famia di e prome te cu di tres grado. Famianan te na e prome grado ta e pareha, mayor (mama y tata, por ta adoptivo of padrastro/madrastra), suegro, suegra, yiunan (adoptivo of yiu di crianza), y casa di yiunan. E famianan na di dos grado ta ruman, nieto, welo, wela, cuña, yiu di madrastra of padrastro. Famia na di tres grado ta omo, tanta, sobrino, sobrina, bisa welo, y bisanieto. Den otro palabra, no ta papia di primo.

Di otro banda, articulo tres di e mesun decreto nacional ta bisa cu e candidato pa Minister ta duna por escrito, tur e funcionnan paga y no paga, y tur otro actividad, tambe esan di su famianan, y asina leu cu e por afecta un bon funcionamento di su tarea, di tur otro miembronan di famia, te cu den tercer grado. Drs. Marisol Lopez Tromp en todo caso a interpreta e pasada aki como un indicacion cu primo y prima tambe ta inclui den e lista.

E interes financiero y comercial di e candidato y su miembronan directo te cu e di tres grado ta aplicabel ora ta papia di interesnan den companianan of fondonan, cu tanto den sentido nominal como di porcentahe ta nifica cu tin cierto nivel di autoridad of co-autoridad; interes den companianan cu ta bin na remarca pa sosten di Gobierno y/of trabao pa Gobierno; y ta doño di propiedadnan movibel y inmovibel cu ta maneha na forma comercial.

Den e decreto nacional cu ya no ta na vigor ta bisa cu e candidato ta dicidi den deliberacion cu formado riba medidanan relaciona na e interes comercial y financiero, manera stipula den inciso uno, esta cu ta duna formador informacion riba e interes comercial y financiero di famianan te cu tres grado. Pero unda ta sali di punto di bista cu cualkier riesgo di conflicto di interes y e posibel percepcion di kiebro di un decision obhetivo ora di eherce e trabao di Minister, mester keda evita.

Primo y prima

Realidad sinembargo di e gabinete actual ta cu dos di e miembronan di Gabinete ta primo cu prima. Prome Minister Evelyn Wever Croes ta prima di Minister Glenbert Croes. Minister Glenbert Croes tin su rumannan Guisette Croes, mr. Glendeline Croes y Sr. Gilbero ‘Juni’ ta traha cune den despacho como consehero. Su ruman homber Gilberto Croes tabata den hunta di directiva di RDA ora cu e tabata bao encargo di Prome Minister Evelyn Wever Croes, mientras cu Richard Lacle, primo di Minister Croes, recientemente a haya un funcion di directiva den RDA.

Prome cu nombramento di e Director di WEB actual, tabata cuña di Prome Minister Evelyn Wever Croes, Sr. Lati Wever kende tabata dirigi e compania estatal despues cu a duna e Director prome cune un golden handshake. Minister Endy Croes ta famia mas leu di Prome Minister Wever Croes y Minister Glenbert Croes y su ruman muhe, ta e vocero di Gabinete.

Como tal, e nombramento di Charleson Oduber, primo di Minister Dangui Oduber no ta for di e norma cu Gabinete Wever Croes ta mantene su mes na dje. Segun e ley di screening actual e nombramento di primo y primanan ta legal. Pero manera a señala caba, hopi cu a acerca Bon Dia Aruba ta puntra, si e ta den e spirito di e nocion cu Gobierno y institucionnan publico ta den control di entre otro, miembronan di e mesun famia.