Manera nos a anuncia caba den nos edicion di dialuna ultimo, conseho di ministro a nombra un miembro di e ekipo di maneho, cu ministro de Meza a manda pa dirigi departamento di Estadistica na 2015, como director di CBS. Esaki a base di un decision di 5 di januari 2016, cu vigencia entrante 1 di januari 2016. E documento cu ta duna cuenta di e decisionnan tuma den conseho di ministro di 5 di januari, ta fecha dia 11 di januari 2016.
E decision pa e nombramento aki aparentemente a ser tuma diripiente, sin ningun proceso di solicitud habri, unda lo a duna otro profesional e oportunidad pa reacciona riba e oportunidad aki. Ademas lo por a busca un profesional cu un profiel mas apto, ya cu e preparacion di e persona aki, cu ta mas riba tereno huridico y di impuesto, no ta e miho pa dirigi un departamento cu ta exigi un profesional na cabes cu tin un formacion y experiencia solido riba tereno di demografia y estadistica.
Manera nos a indica caba den nos relato di dialuna ultimo, e persona en cuestion, Marlon Faarup, ta forma parti di e ‘management team’ cu e ministro concerni a manda pa e departamento ora cu drs. Martijn Balkestein a laga e departamento como director na fin di 2014. Inmediatamente por a ripara e diferencia pasobra trabao no tabata avansando mas manera custumber.
Entre otro, na 2015 no a saca e “Statistical Yearbook 2014”, cu segun nos informacion si a keda prepara pa e personal di CBS, pero a keda drumi riba desk di e persona cu awor a keda nombra como director. Pues, aki nos tin un caso con un persona ta ser premia pa su ineptitud como dirigente, pasobra ta e mes lo ta esun cu ta tranca trabao rutinario di e departamento. Esey ta priminti di bira un problema grandi pa futuro, si ta asina ta cuminsa un carera como director. Como agravante mester bisa cu e publicacion di e Yearbook aki no ta mara na problema financiero, pasobra si no tabatin placa pa imprimi, keto bay por a saca sikiera e version digital.
Aparentemente e ekipo di maneho, di cual Faarup ta forma parti te awor, no ta consciente con importante e publicacion na tempo di e tipo di informacion aki ta pa sector publico y sector priva. Den sector priva tambe, profesionalnan mester di informacion actualisa riba tur diferente area den economia, pa nan por duna conseho na empresa nobo y existente den maneho y planificacion. Un ehemplo ta cifra di importacion y exportacion, empleo den diferente sector economico, cantidad y tipo di studiante cu ta termina cierto forma di educacion, etc.
Banda di esaki tin diferente tipo di informacion cu e departamento mester produci segun compromiso internacional cu Aruba tin traves di cierto tratadonan internacional. Den un solo aña sin un dirigencia di nivel ya por mira con e departamento a bay atras y no ta produciendo loke e mester. Awor pa colmo, un di e personanan responsabel pa maneho deficiente aki, ta sali premia cu un nombramento pa cual e no tin e formacion profesional mas adecua. Loke si aparentemente ta yuda ta cu e ta pertenece na e circulo di amigo di e ministro. Talbes si haci un proceso di solicitud habri tambe e ministro por nombra e persona cu e ta desea, esey semper ta posibel. Pero bao di e condicionnan actual, unda varios ministerio di e mesun gobierno aki ta mantene nan mes na e regla general di tene solicitud habri, ta na su luga pa e ministro en cuestion bin splica ta pakico e ta haya necesario pa keda sin duna otro profesional un oportunidad pa solicita.
Den e decision di december ultimo di conseho di ministro tambe ta inclui cu, banda di e salario regular di director, pa cual tin schaal fiho stipula, ta duna e persona un toelage ex articulo 25 di LMA di 25% riba su salario normal. Esaki ya caba ta trece e pregunta ta a base di ki merito e persona aki ta haya un toelage ex articulo 25, cu no tur director tin. E decision no ta indica esey, pero por ta cu e ministro en cuestion por duna cuenta publicamente di esaki.
Lamentablemente, e manera di opera di e gobierno aki ta tipico pa un gobierno den su di dos periodo di gobernacion, unda ta cuminsa perde bista riba regla di bon gobernacion cu nan mester mantene. Y den e caso aki mester bisa cu esaki no ta un custumber general den e mesun gobierno, pasobra tin ehemplo di ministro cu si ta respeta e proceso di solicitud habri. Pero e ora ta mas incomprendibel ainda con tur e ministronan, o en todo caso mayoria, a bay di acuerdo cu e nombramento aki. Banda di splicacion di e ministro encarga cu e cartera aki, lo ta bon pa tende di e presidente di conseho di ministro, Premier Eman, ta con e ta carga responsabilidad pa e tipo di cosnan aki.
