Te ainda no ta conoci oficialmente e compania cu Refineria di Aruba (RdA) a huur e takinan di almacenamento di combustibel den e compleho di e refineria na San Nicolas.
E ta un pregunta cu Bon Dia Aruba a yega di formula dos biaha na Prome Minister, Evelyn Wever-Croes kende tambe ta minister di Energia. Ayera un biaha mas e matutino aki a bin cu e mesun pregunta cerca e mandatario, pero el a reitera cu e mes no tin e nomber ainda.
Sinembargo el a pidi RdA pa bin cu un conferencia di prensa pa duna mas informacion rond di deal aki. El a referi cu RdA ta un compania estatal, y e intencion di esaki ta, pa gobierno tin distancia di dje. A pesar cu e ta minister di Energia e ta distancia su mes pa RdA por bin cla cu e proceso aki pa asina e placa por cuminsa drenta den caha di gobierno. “Nos mester di e cen,” el a declara.
Prome minister a bisa cu e huurmento ta consisti di 7 tanki cu ta den bon condicion y bashi. Unabes cu e prome pago drenta pa concepto di e lease aki, esey lo wordo destina pa haci limpiesa di e tankinan. Eventualmente e pago aki a drenta, pero e mandatario no a sigura nada ainda.
Sinembargo trabao den e compleho di refineria ta tumando luga pa haci e otro tankinan cu ta den bon condicion disponibel pa wordo lease tambe. Na medida cu mas fondo ta drenta RdA lo cuminsa drecha e tankinan cu ta den mal condicion.
