Nochi Informativo pa muchanan cu Dislexia

Fundacion Pro Persona Cu Dislexia lo tene nan anochi di informacion pa motibo cu a ripara cu ainda falta colaboracion di persona cu tin dislexia, y tambe lo presenta e protocol cu e fundacion a traha pa uza na scol.

Anochi informativo lo tuma luga awe na MFA Paradera pa 7pm te cu 9pm. E siguiente anochi lo ta dia 2 di juli MFA Savaneta, 4 juli na MFA Noord, 9 juli MFA Santa Cruz y 11 juli San Nicolas; pero ainda tin cu duna localidad. Tur ta e mesun orario di 7pm te cu 9pm.

Roraima Arends, secretario di Fundacion Pro Persona Cu Dislexia, a splica cu e mes acerca e fundacion pasobra el a biba esaki. “Mi yiu muhe te cu dia di awe no a haya su certificacion cu e tin dislexia. Mi ta bisa, nos como mayor semper mester t’ey pa nos yiu.”

E ta bisa cu ta mustra dificil pa motibo cu e mucha tin problema pa lesa, anto nan ta purba haci nan miho esfuerso, pero e no ta bay. Como mayor ,ta pensa ‘ay no e mucha no gusta lesa, e ta floho’, pero esey no ta e caso.

Arends ta splica cu mester apoya e mucha e momento ey. E ta bisa cu na Aruba no tin persona of instancia cu ta test e mucha cu dislexia. Awo a cuminsa cu prome grupo pa haci’e. “Nos ta purba como mayor t’ey semper pa bo yiu y keda pusha na unda mester pusha”, e ta expresa.

Ora ripara cu e mucha no ta lesa, no ta pone atencion, e ta cuminsa cay atras y e frustracion ta cuminsa, e mayor mester pone atencion di trempan. Si como mayor si no ta haci nada, tin e posibilidad cu lo pone e mucha den ‘un scol special’, siendo cu e mucha no mester bay scol special.

Pa e motibo aki ta organisando algun anochi informativo pa mayornan, unda e fundacion por mustra con pa maneha un mucha cu dislexia. “Si mi tabata sa, mi lo yuda mi yiu prome.” Arends ta bisa cu nunca el a pensa cu su yiu lo tin e. El a bisa cu den caso si mayornan tin e, por ta cu yiunan tambe lo por hay’e.

“Ta increibel cu tin persona cu a studia, ta persona profesional y despues ta bin realisa cu tin dislexia. Nan a triunfa, pero nos no sa con hopi nan a sufri. Den mi caso, ami a keda pusha mi yiu. Ta dificil pa splica pero como mayor mester compronde, nos yiu mester di nos. Si bo rindi, e mucha tambe lo rindi”, Arends a finalisa bisa.

Nan a dicidi despues di scol cera, pa asina mayornan dedica na e mucha y nan mes cuminsa wak si nan yiu mester un extra guia, of si e por ta dislexia.