No tur 83 solicitud pa bende klapchi lo haya permiso

Vocero suplente di cuerpo di polis (KPA), Liliana Rasmijn a anuncia cu a pesar cu e reglanan riba di benta di klapchi no a conoce cambio, nan lo bin cu control y inspeccion mas stricto e aña aki.

“Aña pa aña nos ta bira mas streng.” E ta haya cu mayoria di e bendedonan ta e mesun hendenan, pues nan sa kico ta e condicionnan poni den e permiso di tur aña.

Nan a yega di sinta cu tur importadonan y bendedonan y lamentablemente e ta haya cu cosnan no agradabel ta keda pasa. E aña aki un total di 83 permiso a wordo pidi, pero no tur lo haya e permiso aki. Ya cu hopi biaha nan a ricibi yamada di atencion y toch algun di nan no ta cumpli debidamente. El a trece como ehempel un caso di un bendedo cu te cu dia di awe ainda no a kita su container y polis a bin cu e decision cu ‘ta basta’ y nan a bin cu medida stricto. Den e caso aki mester tene cuenta cu siguridad di nos pueblo.

Pa esunnan cu mester busca nan permiso, nan por pasa dia 4 di december den adelante for di 8’or di mainta te cu 12’or di merdia y di 1’or di merdia te cu 4’or atardi na warda di Noord.

E ta recorda cu e parti di benta ta cuminsa dia 27 di december te cu dia 31 di december. Dia 1 di januari te cu 1’or di merdia no mag di tira mas klapchi. Si tin hende ta haci fastioso y sigui tira klapchi bo por yama polis na number 100. Bo por bisa polis unda el a pasa ya cu ora patruya di polis yega por ta e klap a wordo tira caba. Pa loke ta e parkenan di luz cu ta cera dia 6 di januari nan mester pidi permiso. Pa loke ta e parti di control e documento di permiso mester ta visibel pa wak si e ta cuadra cu e adres y persona su nomber. El a haci un suplica pa no bende klapchi na e muchanan bou di 12 aña si e no ta den compania di un adulto. Nan no kier pa incidente di persona herida cu klapchi por pasa e aña aki.

Igualmente el a bisa cu e ora di benta ta for di cu solo sali te cu 9’or anochi. Si nan ta haya luga cu ta habri despues di e ora aki, nan ta haya un aviso di atencion y nan ta core e riesgo cu polis ta kita nan permiso di benta.

Ferdinan Ponson di brandweer ta bisa cu nan a check e formulario di permiso pa wak cual di nan a yega di haci nan foutnan y bin cu medida pa nan no haya nan permiso e aña aki. “Di un manera nos tin cu siña e bendedo nan.”

E ta lamenta cu ora nan ta organisa reunion cu e importadonan y bendedo nan di klapchi mayoria di nan no ta bin atende e reunion aki. A pesar cu nan ta conoce e reglanan nan no ta mantene na dje. Pero unabes cu e comision di vuurwerk ta realisa su trabou, nan tur mester keda responsabel pa e consecuencianan cu por trece cu ne, si nan no ta cumpli cu e reglanan cabalmente.

Sr. Ponson a bisa cu tur cu a haya vuurwerk den nan adres, nan no por pidi permiso ariba nan nomber ni adres mas. Ya caba nan a papia y splica nan e medida aki. Si nan a importa klapchi caba, e ora nan mester busca otro hende pa haci benta pa nan.