ORANJESTAD – Bon Dia Aruba a acerca e directiva Parke Curason mirando cu ainda tin comentario di comunidad cu e parke tin falta di mantencion. Parke Curason na Jaburibari ta conoci pa hende cu ta train core, hunga basketball, y pasa tempo recreativo cu famia.

Na e sitio Bon Dia Aruba a papia cu algun famia mientras cu nan yiunan tabata hunga den e speeltuin. Nan ta splica cu e parke ta uno bunita pa pasa tempo y cu ta un lastima cu tin algun cosnan cu no ta ser uza.

E parke caminda cu muchanan tin cu hunga tin hero frustra y esaki por causa cu un mucha por rasca nan curpa of haya heridanan serio. E mayor ta bisa su yiu cu e por bay hunga, pero mester tene cuidou y no pega su curpa mucho na e hero pa evita cu e ser herida.

Un otro persona presente a splica cu un biaha el a drenta baño y no tabatin papel pa e muchanan den baño. Esaki a crea un discusion entre famia y e persona encarga di e luga a splica cu no ta su fout cu e organisacion no ta zorg pa cumpra material necesario ora e pidi nan. “Pa un luga publico ta normal cu mester tin un cantidad grandi y acceso di papel di wc.”

Segun e ta bisa cu no tabatin papel di wc pa un temporada largo. “E luga mester mantencion pasobra hende gusta bin”, e persona encarga a bisa. E borchinan unda e reglanan tabata skirbi a perde su color, agregando cu cualkier area di e parke mester tin e regla visual pa asina tur bishitante por lesa y cumpli cu nan.

E persona encarga cu e luga a bisa cu su preocupacion ta cu e parke ta den mal estado y ta sigui bisa cu ta tristo pasobra cu e luga ta yena cu hende cu ta bin haci uzo di e parke pa train. “Muchanan ta feliz ora cu nan ta haci nan deporte, personanan cu ta bin haci Zumba y otro actividadnan. Mi ta purba di mantene cosnan bou control”.

Tambe tin keho cu usuarionan mester staciona nan auto pafo di e parke, pa motibo cu no tin suficiente luga pa autonan por staciona paden; mientras cu tin auto ta yega pa djis pa e persona baha y bay subi den otro auto cu hende y ta keda rato den auto probablemente haciendo cosnan contra decencia. E persona encarga ta lamenta cu e parke ta wordo usa pa tipo di encuentronan asina y ta pidi pa no hacie na un luga publico frecuenta pa famia y mucha.

Pa un parke recreativo pa tanto hoben, mucha como adultonan mester ta bon manteni, pa asina comunidad por haci uzo di dje pa keda activo. “Nan ta bisa cu lo bin cambionan, pero esaki no ta tumando luga. E ta bisa cu e borchi ta un prioridad y e stoelnan cu ta kibra no a ser busca y ta forma un peliger muchanan”.

Director Junior Tromp di Parke Curason a splica nos cu e problema ta cu unda e parke ta situa actualmente tabata un landfill y no a haci un bon trabou prome cu el a ser converti den e parke, pero e mantencion ta tumando luga.

Segun Tromp e luga a sak y kibra, pa e motibo aki no por traha nada. “Mester traha un base prome y haci un investigacion di suela pa por construi ariba te caminda esaki por.”

E ta bisa cu tin buraco y cada biaha ta yena nan, pero cada biaha cu awa yobe e tera ta sak, e ta agrega cu nunca a haci un test y no por kibra esakinan tampoco pa motibo cu mester di permiso y tambe fondo pa haci esaki posibel.

Sinembargo nan ta sigura pa e luga ta sigur pa evita cualkier cos malo. “Tin cierto caminda cu ta keda monitoria pasobra cu hendenan no mag di bay eynan. Pa locual ta trata e cambio di borchi, e ta bisa cu tabata tin algun problema cu material y pa e motibo ey e compania cu ta haci esaki a tarda.

Tambe e speeltuin lo traha riba e speeltuin pe muchanan por ta safe y lo bin cu cosnan nobo pa e skate park. “Semper nos ta purba di mantene e luga e fondo cu nos tin pa tur e facilidad Deportivo”, Tromp a finalisa.