Segun minister di husticia, Andin Bikker (POR), facilidadnan pa detencion di personanan ilegal ta limita den number.
Pa soluciona esaki e mandatario ta propone colaboracion di Boneiro pa Aruba haya celnan den forma di container.
Asina e mandatario a trece dilanti ayera mainta na conferencia di prensa di gobierno, mirando cu segun e, desde cu el a tuma responsabilidad pa e ministerio nan a tuma nota cu tin limitacion den facilidadnan pa detene personanan wardando expulsion na nos pais.
Ademas di esaki e mandatario a indica cu e departamento di Warda Nos Costa cu ta encarga cu expulsion tin poco incertidumbre pa loke ta trata nan status bou cua departamento nan ta cay. Segun sr. Bikker te hasta den casonan di corte ni corte por a constata si nan ta cay bou IASA of bou Cuerpo Policial.
“Tin biaha p’esey nan ta sinti poco desampara.” Pa soluciona e situacion aki e mandatario a institui un comision of un task force pa asina organisa e departamento bon.
Esaki lo por a bin pasobra anteriormente un decreto institucional a keda forma bou nomber di migracion Aruba, pero awo nan ta bin ta constata cu e instituto aki no a keda forma completamente. “Esaki ta un di e temanan unda nos a kere cu trabounan tabata termina y cu nos por a sigui pero nos a realisa cu nan no a caba e trabou.”
Pa soluciona esaki sr. Bikker a splica cu e ta ocupa pa aclaria e status di e departamento, pero tambe por medio di haya containernan cu lo por sirbi como celnan temporario pa personanan cu Warda Nos Costa detene.
E mandatario a indica adicionalmente cu e situacion aki na isla ruman Corsou a yega na cierto punto cu ‘nan ta man na cabes awo’. Esaki sr. Bikker su colega di husticia, Quincy Girigorie a indica na dje, cu Corsou actualmente tin un problema grandi pasobra nan ta deteniendo mas hende di loke nan por wanta na nan facilidadnan.
“Akinan na Aruba nos capacidad pa detencion tambe ta un reto y p’esey nos ta buscando un manera acelera pa expulsa personanan.”
Ayera e noticia ta drenta tambe cu 3 persona a logra di huy for di detencion di Warda Nos Costa. Con esaki por a pasa no ta conoci ainda.
