12Buki (2).JPG

Segun Directora di SKOA , Sra. Josette Daal ta splica Bon Dia, un limitacion cu Voorgezet Onderwijs tin ainda ta cu nan no tin suficiente buki y e metodonan pa trata cu esaki no a wordo renoba ainda. Esey ta un limitacion cu SKOA tin cu nan ta purba pa wak na kico nan ta yega pa por renoba e tipo di diferente metodonan cu ta wordo uza den MAVO scolnan.

 

Docente y miembro di partido MEP, Sra. Mireille Sint Jago ta splica Bon Dia cu e ta lamenta cu esaki ainda ta un problema na scolnan y cu e cosnan aki sigur ta haci e trabao di un studiante y docente hopi mas duro.

”Mi ta haya esaki algo hopi di lamenta cu specialmente muchanan di Examenklas cu a wordo perhudica pasobra aña pasa tambe tabata tin hopi studiantenan di examen cu mester a traha cu copia pasobra no tin suficiente buki pa nan. Semper nan ta wak e maestro pero esaki no ta algo pa e maestro zorg pe, e por zorg pa e copianan pero tin hopi mas cos andando na e scolnan di MAVO cu tur tin di haber cu e cantidad di placa cu ta wordo poni disponibel pa nan por ehecuta nan trabao na un manera responsabel.” Sra. Jago ta splica Bon Dia.

 

 

Bukinan cu tin ta hopi bieu

Tin un otro factor cu ta hunga un rol den esaki segun Sra. Jago cu e examennan ta basa riba bukinan cu ta porta 3 of 4 aña bieu, y akinan na Aruba ta trahando cu bukinan cu tin 10 pa 12 aña bieu. Esey kiermen cu ora e muchanan bay traha nan examen, tambe ta bay tin cierto preguntanan cu nan no ta bon prepara pe pasobra e ta informacion cu ta traha den un edicion nobo di e mesun metodo y ainda nan no ta haya esey. ”E solucion cu maestronan mes ta bin cu ne ta cu tin maestronan cu ta bay vakantie Hulanda, nan ta cumpra e buki eynan cual ta un buki cu nan ta paga di nan mesun placa. Di esey nan ta saca copia pa muchanan keda ”up to date”. Pero esey no ta algo cu ta wordo haci na tur MAVO of tur scolnan den general.” Sra. Jago ta comenta. Pues ainda bo tin cu cada maestro mes ta tuma su responsabilidad pa traha cu e material cu e tin pa logra haya otro material locual segun Sra. Jago ta algo super inhusto y cu mester caba cu ne di biaha.

Informacion na scol no ta cuadra cu bida pafo di scol

Delaster biaha cu tur MAVO scol a haya buki nobo cu a cuminsa di eerste klas Ciclo Basico, tabata aña 2004. ”Tin algun vak cu despues a cambia e bukinan den derde of vierde klas pero e ta algo cu no ta wordo haci na un manera regularmente. Mayoria di e vaknan ta examennan cu ta bini for di Hulanda caminda nan tin e sistema cu cada cinco aña, e muchanan ta haya buki nobo y esaki ya caba ta un excepcion. Pues cada bes e bukinan mester wordo renoba.  E material mester keda interesante pa e muchanan pa nan haya informacion nobo y no cu nan ta bay bek den tempo. Tambe tin exigencianan di curriculum cu ta cambia, e ora e metodonan mester wordo adapta pasobra e curriculum ta dicta cu tin cierto topiconan cu mester wordo analisa mas of cu mester cay afo. ” Sra. Jago ta bisa.

 

Trabao di maestro ta mas duro

Un scol cu kier ta bon, semper lo keda cu bukinan cu tin pa un maximo di tres pa cinco aña. E situacion na Hulanda ta cu e mayornan mes ta bay cumpra nan bukinan, sinembargo nan tin un sistema tambe cu bo ta haya un vergoeding si bo ta bin di un famia cu no tin hopi placa. ” Si e metodonan y copianan ta malo, tin biaha bo ta haya un copia di un copia pasobra e buki original no tey, tur esey ta acumula pa e problemanan bira mas grandi y e resultadonan bira mas abao y sigur pa e trabao di e maestro bira hopi mas duro.” Sra. Jago ta bisa. Tin material si pa habri e aña escolar nobo pero e MAVO scolnan no tin e material concreto cu ta atractivo pa e studiante ni e docente segun SKOA  pa motibo cu ta traha hopi cu fotocopia. ”SKOA tin un scol cu ta digitalisa cu ta un proyecto piloto cual nos ta mira con e desaroyo ey ta bay. E aña aki nos ta bay cuminsa wak den Voorgezet Onderwijs pa wak cua ta bay digitalisa, y esaki sigur ta costa placa.” Sra. Josette Daal ta bisa. Tin e Samsung Classroom na Bon Bini School cu tambe ta un otro forma di duna enseñansa digitalisa y  tin diferente scol manera Dominicus College cu ta trahando cu borchinan digital pues tin diferente scol caba cu diferente sistema digital. ”Tin di nan ta integra esaki den nan sistema mes y tin di nan cu ta uza e sistema digitalisa como un medio di asistencia.” Sra. Daal ta bisa.

Pa bay over na digital ta un proceso

Pa por bay completamente digital, segun Sra. Daal no ta un cos cu por cera buki awe y tin tur cos den tablet mañan, esaki ta henter un proceso  y cada diferente scol ta tumando e iniciativa den nan mesun manera stap pa stap.  Si digitalisa buki, mester bay mira cuanto esaki ta bay sali pa locual ta e pago di e licencia pues no por bisa berdad si esaki lo ta mas caro of mas barata ainda.  ”E licencia mester paga p’e tur aña, e buki nobo cu bo cumpra ta cada cinco pa ocho aña bo ta renoba buki. Dus esaki ta cosnan cu mester bay wak ainda financieramente kico ta cumbini bo mas.”  Sra. Daal ta bisa.