Tubo di beerput ta bay directamente den lama pazuid di Embassy Suites
Te ainda no tin clarificacion di parti di instancianan oficial kico ta pasando cu e matanan di mangel dilanti di e proyecto enorme di Embassy Suites. Pero mientras cu Parlamentarionan di Aruba ta compromete cu nan coleganan di Reino Hulandes cu ta urgi Gobiernonan pa sigui tur paso pa cumpli cu e Sustainable Development Goals, SDG’s, destruccion y falta di respet pa medio ambiente ta continua sin ningun control.
Na Boneiro, Parlamentarionan di Aruba a compromete pa percura cu nan Gobiernonan ta cumpli cu SDG 14 cu ta proteccion di bida marino y lama.
Tanto DOW como Direccion di Naturalesa y Medio ambiente, DNM a bay controla pa mira kico ta pone cu e mangelnan na altura di e hotel enorme ta secando. Te cu Diabierna, apesar di a haci e preguntanan, Director di DOW a bisa cu e no a haya ‘feedback’ di esnan cu a manda bay controla. Di DNM no a ricibi ningun reaccion.
Pero Bon Dia Aruba a ricibi potretnan di e area cu claramente ta mustra cu tin un tubo grandi cu ta drenta e awa di lama banda di e mangelnan. Segun e persona cu a saca e potret, ta trata di un tubo cu ta hiba awa sushi for di e area di construccion di Embassy Suites. Segun e persona, locual ta sosodiendo ta cu ta pomp e awa di e beerput pa lama y cu probablemente esaki ta causa e daño na e medio ambiente.
