Anualmente alrededor di 80 hoben ta cay cera na Aruba. Actualmente esun mas hoben cu fundacion Reclassering a guia, ta un mucha di apenas 11 aña pa e delito di ladronicia den cas. Ladronicia den cas ta e crimen mas frecuente cometi pa nos hobennan.
Directora di Reclassering, Sra. Seraida Pemberton tin 20 aña trahando den Reclassering for di tempo cu e tabata coriendo stagiaire den e fundacion aki.
For di e tempo ey, el a gusta traha cu e grupo meta cu ta e hobennan cu a cay cera pa stabilisa nan y integra nan den nos comunidad bek.
Durante e dos decada aki el a wak hopi cambio y desaroyo; tambe con e fundacion aki a crece. Sinembargo e ta haya cu su frustracion cu e trabou aki ta cu te ainda e no ta wak un solucion structural. Pa cierto problema algun solucion a bini, pero un solucion stabiel y structural e no a wak den tur e tempo cu e tin trahando pa cu e grupo meta di Reclassering.
Den transcurso di añanan, Sra. Pemberton por wak hobennan cu a bay afo pa cambia nan bida. Of nan ta den KIA of nan a bay den un rumbo mucho mas pio. Pero lamentablemente te ainda e cambio structural cu nos por bisa cu a base di esey hopi hoben nan bida a cambia, e no a wak ainda. E ta kere cu esey ainda mester bini den nos pais, aunke e ta consciente cu naturalmente cu no por yuda tur hoben. Pero alomenos mayoria di e hobennan cu a cay den problema di husticia mester a bay den e rumbo di reestablece nan bida bek.
Hobennan problematico
A pesar cu ainda no a wordo logra un solucion structural, e guia cu Reclassering ta dunando na e hobennan aki ta uno efectivo; y basta di nan a wordo yuda.
Pero e grupo grandi cu Reclassering ta confronta nan mes ta e hobennan problematico cu no ta acepta guia ambulante. Eynan ta sinta e problema y e frustracion cu directora di e fundacion aki tin. Ya cu e grupo aki ta keda un preocupacion, ya cu e grupo aki ta creciendo, ya cu e hobennan aki tin un combinacion di diferente factor cu guia ambulante no ta suficiente pa nan. “Mester saca nan di nan ambiente y yuda nan. Esey nos no tin na Aruba”, el a bisa.
E ta keda bisa cu nos por pone mas polis riba caya, camaranan, alarma, etc. pa combati criminalidad; pero e criminal ta haya un forma sinembargo pa comete e crimen. Y KIA ta keda yena keto bay. Pero si bo ta traha riba e criminal mes pa cambia su forma di pensa e ora ey e no ta bay hacie mas.
“Mi habilidad ta cu e muchanan pasobra nos ta pensa cu nan ta nos futuro. Semper ma bisa cu si nos por haci algo pa e grupo aki, e por haci un diferencia hopi grandi”, el a declara na Bon Dia Aruba.
E ta insisti cu mester keda inverti den e grupo meta aki pa yuda nan cambia nan forma di pensa pa asina combati y preveni criminalidad efectivamente. E no tin di haber cu Reclassering so pero conhuntamente cu otro instancia di e veld aki entre nan KIA.
