Cu mester tabat’ey 15 di februari
Na e momento aki ainda no tin un rapport financiero pa e ultimo tres luna di 2022 entrega na CAft y Staten.
Segun e ley di supervision financiero (Landsverordening Aruba financieel toezicht; LAft), articulo 17, inciso 1, ministro encarga cu finanzas ta manda pa mas tarda seis siman despues cu un kwartaal termina, e asina yama ‘uitvoeringsrapportage’ di e kwartaal pa e organo di supervision CAft, den cual ta duna cuenta di e asuntonan financiero di gobierno, en especial encuanto desaroyo di cumplimento cu presupuesto, den e periodo referi.
E rapport di ultimo tres luna di 2022 mester tabata den man di CAft pa mitar di februari, y na mes momento Staten mester a haya copia cu ta bay pa e parlamentarionan. Redaccion di Bon Dia Aruba a manda siman pasa un pedido di informacion na ministro encarga cu finanzas, sra. Xiomara Maduro, tocante e aparente tardanza di e rapport, pero te na clausura di edicion no a haya contesta. Tambe a averigua na secretariado di CAft y no a ricibi un reaccion ainda. Consultacion cu miembro di Staten a duna cu en todo caso e miembronan no a haya e documento.
Den e casonan cu e proceso di entrega y conseho di CAft ta na tempo, reaccion di CAft riba e rapport lo tabata disponible na fin di februari. Nos ta na inicio di april y no tin tampoco e reaccion di CAft riba nan website, algo cu normalmente ta tuma lugar pronto despues cu e reaccion bay pa gobierno. Ta trata ademas di e ultimo rapport di 2022, cu ta duna un panorama completo di e aña, y ta un interes publico pa conoce mas pronto posible con e aña financiero di Pais Aruba a bay. Redaccion di Bon Dia Aruba ta keda pendiente pa haya sa di e mandatario concerni kico ta e causa di e actual tardanza.
