Minister Alex Schwengle a laga sa cu e no tin ningun problema pa e proximo gobierno bin cu un investigacion tocante henter e proyecto di construccion di hospital, ni tampoco riba e placa extra cu nan mester a bin cu ne pa garantisa e culminacion di e proyecto aki.
El a splica cu tur esaki ta debi na cambionan grandi cu a bin na caminda y cu no tabata plania inicialmente, pero cu necesariamente mester bin cu nan. Nan ta e sala di operacion, unidad di cuido intensivo y un laboratorio acerca. El a bisa cu tur e tres cambionan aki ta forma e gran parti di e suma di casi 83 miyon florin. Encuanto e suma adicional aki no mester di aprobacion di parlamento ya cu “e ley ta duna mi aprobacion caba”, el a bisa. Ademas si nan no ta bin cu e suma adicional aki e proyecto lo a para. Si un proyecto di e magnitud aki ta para un luna cu bo ta papiando di casi un miyon di debe sin cu bo no tin nada, segun e minister.
El a laga sa cu e ley aki di hospital ta contempla pa bin cu cambio si ta necesario, pero mester notifica parlamento, y “ta net loke nos a haci”. E mandatario a declara cu gobierno a notifica Parlamento na juni ultimo, y nan a haci atrobe recientemente. E ta argumenta cu nan a cumpli cu e ley ‘al pie de la letra’.
Recapitulacion
El a haci un recapitulacion di e proyecto aki. Na aña 2012 a bin cambio den e proyecto aki caminda a wordo palabra kico ta wordo renoba y kico no, y kico ta wordo traha nobo y kico no den e proyecto aki. E balor di e proyecto tabata alrededor di 250 miyon florin cu a keda aproba den parlamento pa medio di un ley. Pero na caminda a bin resulta cu raad van bestuur di hospital a considera pa bin cu algun cambio. Esaki a base di un advies, nan a dicidi di no renoba e unidad di cuido intensivo (ICU). Tampoco e sala di operacion, ya cu segun nan, esunnan cu tabatin ta bon suficiente. Pero despues a bin resulta cu no ta asina pa loke ta e sala di operacion y mester a duna prioridad pa bin cu e sala di operacion.
“Na caminda a bin un dolor mas grandi ainda of mes grandi….”, segun e mandatario. E ta referi cu normanan internacional di ICU a cambia na caminda. “Na momento cu normanan di calidad cambia ami no por nenga nan”, segun e mandatario. E no ta haya responsabel cu si bo ta opera un hende den sala di operacion y despues e ta bira malo den un ICU cu no ta sirbi. Otro cambio grandi ta cu na momento cu e proyecto a wordo firma, lands laboratorium tabata di gobierno y despues a bira un fundacion cu a cay bou stichting di hospital.
Criticanan
E mandatario el a yega di papia extensivamente con el a yega na e decision aki. Sr. Schwengle a bisa cu for di juni caba el a manda tur informacion pa e fraccion di oposicion y muy specialmente pa Glenbert Croes kende a yega di cuestiona su integridad como mandatario.
Tambe el a laga sa cu ta dispuesto pa bin parlamento pa duna mas informacion den detaye pa medio di un team di experto, ya sea di su ministerio, SOGA y/of hospital. “Mi no tin nada di sconde. Mi tin tur documento. E cos ta bon documenta y ami no tin niun preocupacion. Si nan kier investiga, nan por dal bay, ami no tin niun problema cu esey”.
Segun sr. Schwengle, parlamentario Croes no tin niun prueba cu cos a bay robes, ya cu si esaki tabata e caso, e mes como minister lo a para e proyecto. Tambe el a pidi tur esunnan cu a cuestione pa bin cu prueba convincente pa bay OM, pero te e dia di awe no a bin cu niun prueba pa demostra cu tabatin cos robes den e proyecto aki. El a cualifica un hende asina como “charlatan”.
