Minister di Husticia, Arthur Dowers a nenga rotundamente cu decision a cay pa kita of move Procurador General di su funcion como hefe di Ministerio Publico.
Cualkier rumor of informacion rond di e topico aki no ta cuadra cu berdad. “Absolutamente cu no”, e mandatario a declara na Bon Dia Aruba.
Minister Dowers a bisa cu kitamento di un PG ta un proceso cu no por cana nunca asina cu nan por kita un funcionario for di decision tuma den conseho di minister. “Bo no por djis, mescos cu otro ambtenaar, y bisa cu esaki nos a dicidi den Ministerraad y retira un ambtenaar.”
E mandatario splica cu esaki ta un proceso bon institui pa ley riba kico ta e modo y na ki momento por yega na un conclusion di kita un PG. E ta agrega cu e por imagina, considerando cierto hendenan, con nan ta agita y protesta contra Ministerio Publico.
Mas fiscal
Segun minister Dowers- nan a percura pa OM por funciona optimal. Actualmente a bin cu e di 8 fiscal cu ta e fiscal cu a wordo agrega na e team, ya cu e team aki ta forma parti di e plan di maneho of plataforma nobo riba tereno di husticia “veiligheidshuis”, presenta oficialmente diahuebs ultimo.
Minister Dowers a laga sa cu nan lo sigui den e direccion cu nan ta bayendo y nan ta sumamente positivo cu e trabou cu ta wordo haci den OM. E ta reconoce cu sigur tin espacio pa drecha no solamente den OM, sino den tur departamento. “Di esey tambe nos ta consciente y nos a constata tambe den nos plan di maneho.”
