Ayera a tuma luga un debate den parlamento pa aloca un suma di 16 miyon florin cu a resta di Fondo di Desaroyo Aruba (FDA). E fondo aki despues di casi dos decada di existencia a conoce su final.
E tratamento di e ley aki a wordo caracterisa pa ta uno relativamente cortico y un presencia pober di miembronan di e fraccion di oposicion.
Presidente di parlamento, Mervin Wyatt-Ras ta informa cu parlamentoa aproba e resto di suma pa proyectonan di FDA. Un suma di 7,3 miyon florin di contribucion di Aruba y 8,8 miyon florin di parti di Hulanda. Tabatin 15 miembro di parlamento presente y ora di vota 13 so a haci uzo di e votacion aki. 11 miembro a sostene e ley, mientras 2 a vota contra. Presidente di parlamento ta lamenta cu 2 miembro di oposicion so a keda te na final di e reunion. P’esey e ta pensa si tin sentido di pone reunionnan prome cu eleccion, ya cu ta un par di parlamentarionan so lo acudi.
Inversion
E suma total di 16 miyon florin ta wordo aloca den proyectonan pa mehora calidad di gobernacion, entre otro:
- proyecto pa standarisacion (SAP) na Departamento di impuesto (2,8 miyon)
2. Desaroyo duradero (600.000) pa Centro di Excellence y proyecto di implementacion di metanan mundial di desaroyo sostenibel
3. Rechtshandhaving pa un suma di 500 mil florin destina pa un dossier di proyecto pa un veiligheidshuis
4. Enseñanza (4,4 miyon) pa segunda fase di edificio di SPO pariba, digitalisacion y cambio di material di EPI
5. proteccion di naturalesa pa un suma di 500 mil florin pa proteha rifnan di coral, mehora conocemento y experticio riba tereno di brownfields y brownwaters.
En total desde 2000, 763 proyecto a wordo entama pa e suma di 542 miyon florin.
Di su banda, minister di Finansa Angel Bermudez a contesta diferente pregunta. E mandatario a laga sa cu durante e ultimo 16 aña, FDA a inverti mas cu 500 miyon florin den nos comunidad y tambe den Aruba su economia den diferente proyecto y diferente sector.
E mandatario ta laga sa cu te na e momento aki no tin un decision concreto tuma pa bin cu un sucesor di FDA. Pero el a bisa cu e aña cu lo continua inverti capital door di nan plan di inversion manera ta wordo conseha door di IMF (Fondo Monetario Internacional). Esaki ta bay normalmente via e presupuesto nacional. El a bisa cu Hulanda lo keda contribui cada aña den cierto forma manera enseñansa via fondo di enseñansa cu ta continua.
Minister di Economia, Richard Arends a bisa cu nan ta explorando un Aruba Investment Fonds. Ainda no tin un consenso riba e forma con e fondo aki lo funciona compara cu esun di FDA cu tabata uno exitoso. E fondo aki a contribui na diferente aspecto, entre nan huridico, siguridad, infrastructura, educacion, etc… El a bisa cu e proceso di lo no cambia y nan kier sigui cu e mesun criterionan, si otro fondo nobo di inversion lo wordo lanta. E rason cu e ta haya cu mester bin cu un fondo di inversion ta cu pa e islanan chikito cu ta demanda cierto inversion grandi, esaki ta pisa di un manera desproporcional ariba presupuesto. Aunke e ta haya cu FDA no ta e unico formula con gobierno por haci inversion.
Tratamento di e ley
Parlamentario di oposicion di fraccion di MEP, Xiomara Maduro a pidi gobierno pa duna un splicacion of publicacion di tur e proyectonan cu a wordo realisa den henter historia di FDA, pa asina e fondo aki administra pa AIB no conoce un final sin pena ni gloria.
Encuanto e suma di placa cu a resta, parlamentario Maduro a indica cu e gobierno tabatin su idea di e forma con nan lo haci uzo di dje. Tambe Hulanda tin su idea riba e forma cu esaki mester wordo inverti. Sinembargo fraccion di MEP ta diferencia di opinion riba e forma con gobierno ta gasta e placa y nan prioridadnan.
Cambio den destino di inversion
El a referi cu den pasado e gobierno aki a yega di cumbini cu Hulanda e inversion di placa pa sector di enseñansa. Pero despues e prioridad a cambia y e fondo a keda destina pa e proyecto manera Producto Aruba cu den esencia ta trabou di infrastructura. Pues e proyecto di un Mavo/Havo/WVO na Noord su prioridad a cambia pa bin cu e proyecto di rehabilitacion y embeyecemento di Oranjestad, y e proyecto di tram. Esaki den mutuo acuerdo entre e gobierno di Aruba y esun di Hulanda.
E ta lamenta cu e cambio aki a tuma luga ya cu e resultado ta cu Mavo ta yen tanto asina cu nan mester uza dependencia nan; ya cu no tin luga mas den e edificio mes. Pero di otro banda Colegio Arubano ta hisa su standard, ya cu no tin mas espacio pa mas alumno. E ta haya cu e consecuencia di e cambio di alocacion di e placa aki a trece cu un cantidad di hoben no por sigui e nivel aki, poniendo nan den otro nivel mas abou cu e risico cu e fenomeno conoci como drop out ta aumenta.
Parlamentario Maduro a vocifera su preocupacion ya cu parti considerabel di e 16 miyon florin cu a resta di e fondo di FDA lo wordo inverti den infrastructura. Mientras cu Hulanda kier inverti riba e parti di calidad den gobernacion. Sinembargo e tabatin su obhecion entre otro riba e proyecto pa standarisacion (SAP) na Departamento di impuesto. Ya cu segun e, e proyecto di SAP tin hopi aña andando. Despues di un serie di complicacion cu otro sistema cu gobierno a kier introduci online. Pero despues di problema cu a surgi na Departamento di Impuesto e tempo aya, e proyecto di SAP a cay. Awor un biaha mas e proyecto aki ta wordo haci. P’esey e ta haya cu ta bon tende un splicacion di e tardansa aki di parti di e departamento concerni.
Tambe el a cuestiona e suma di 600 mil florin destina riba desaroyo duradero (600.000) pa Centro di Excellence y proyecto di implementacion di metanan mundial di desaroyo sostenibel. E ta muestra bunita pero e ta haya cu tin hopi cos na Aruba cu no ta duradero entre otro dump. Gasto ta wordo haci gewoon pa mustra un nomber mundial riba desaroyo sostenibel, mientras cu e realidad ta mustra otro.
Lider di fraccion di AVP, Marlon Sneek a referi cu e ley aki ta producto di un protocol cu nan a yega di atende cu minister presidente y minister di Enseñansa. El a expresa su acuerdo di e forma con e fondo aki a wordo aloca, y unda e atencion ta wordo poni. “Nos ta contento di haya un ley di e forma aki presenta.”
E ta haya cu diferente sector a haya su atencion. Un sector cu a haya 8,8 miyon di e fondo aki ta esun di calidad di gobernacion. El a indica cu e departamento di Impuesto a haya un desaroyo positivo y nan fraccion ta hopi orguyoso di dje
Proceso di proyecto
Parlamentario independiente, Marisol Lopez-Tromp a referi cu e ley aki cu ta un Landsverordening cu ta regula un fondo di presupuesto relacion cu un protocol di 22 di maart 2017. E ta bisa cu e meta poni den e ley por wordo hustifica, pero e punto cu e kier a enfatisa ta cu despues di un proceso serio, largo y transparente, e proceso aki a wordo cambia full.
El a haci e declaracion aki a base di su experiencia como ex minister di Infrastructura, Enseñansa y Social. Sra. Lopez-Tromp ta bisa cu diferente di e proyecto aki a yega di cay bou su encargo. El a trece e caso di scol cu mester bin na Noord cu ta e Mavo/Havo/WVO completamente traha. Aunke el a wordo aproba na aña 2009 cu tur su documento hustifica, e gobierno actual a dicidi pa cambia e destinacion di e proyecto aki pa balor di 29 miyon florin cu placa di FDA.
El a splica tur e esfuerso cu ta wordo hinca pa yega na un proyecto pa construi pa ehempel e scol aki cu a wordo priminti na Noord, te ainda no a wordo concretisa. E ta haya un falta di seriedad cu e mesun gobierno aki cu a kita e placa for di scol na Noord, y aworaki pa 2017 na bispo di un eleccion, nan ta aloca e placa bek. Mientras cu e proyecto aki lo por a bini cla caba na 2013.
Awor cantidad di studiantenan no a haya luga, mientras cu e meta di e scol aki tabata di crea cuponan nobo locual no a wordo cumpli manera a wordo planifica den pasado. “Cu mapa y todo… y aprobacion di tur nos departamentonan.”
